ސްޕެގެޓީ ކާބޮނާރާ ބޭނުންވާ ތަކެތި 200 ގުރާމު ފިޔާ (ބޮޑު، ގޮޅިކޮށް ކޮށާފައި) 1 ޕެކެޓު ސްޕެގެޓީ (ލޮނު ލާފައި، ތެޔޮ ފޮދެއް އަޅައިގެން ކައްކާފައި) 200 ގުރާމު ލީކްސް (ކައްޗަށް ކޮށާފައި) 200 ގުރާމު ކެޕްސިކަމް (މެދުން ފަޅާފައި، ކަރުގަނޑު ނަގާފައި، ކައްޗަށް ކޮށާފައި) 500 ގުރާމު ކުކުޅު (ކަށި ނެތް، ކުދިކޮށް ކޮށާފައި) 1 ޕަކެޓު ޗިކަން ސޮސެޖު (މެދުން ފަޅާފައި، ކައްޗަށް ކޮށާފައި) 3 ޖޯޑު ދިޔާ ކިރު (ޑަޗްލޭޑީ ނުވަތަ ލެކްނޯ) 1 ދަޅު ޗީޒު (106 ގުރާމުގެ، ގާނާފައި) 160 ގުރާމު ކިރިމު (ނެސްލޭ، އޮރިޖިނަލް) ބައި ސައިސަމުސާ އަސޭމިރުސް (މުގުރާފައި) ހައްދަވާނެ ގޮތް ތެޔޮފޮދެއްގައި ފިޔާކޮޅު މީރުކޮށްލުން. ކެޕްސިކަމާއި ލީކްސްކޮޅު އޭގެ ތެރެއަށް އެއްކޮށްލުން. ދެން އަސޭމިރުސްކޮޅާއި، ކުކުޅުކޮޅު އެއްކޮށްލާފައި، ކުކުޅު ކުޑަކޮށް ރޯފިލީމައި، ސޮސެޖުކޮޅު އެއްކޮށްލުން. ރަނގަޅަށް ކުކުޅު ރޯފިލީމައި، ދެ ޖޯޑު ކިރާއި، ޗީޒާއި، ކިރިމު އަޅާފައި، އެއްކޮށްފައި، ސްޕެގެޓީކޮޅު އަޅާލުން. ދެން ރަނގަޅަށް ހުރިހާ އެއްޗެހި އެއްކުރުމަށް ފަހު ލޮނު ހެޔޮވަރުކުރުން. ގިނައިން ޗީޒު އަޅަން ބޭނުން ނަމަ، އަދި އިތުރަށް ޗީޒު އެޅިދާނެ. ދިޔާކުރަން ބޭނުން ނަމަ، އިތުރަށް ކިރު ވެސް އެޅިދާނެ. ކަދުރު ކޭކު ބޭނުންވާ ތަކެތި 8 މީހުންނަށް 250 ގުރާމު ހަކުރު 250 ގުރާމު ފުށް 250 ގުރާމު ކަދުރު (އޮށް ނަގާފައި، ކޮށާފައި) 2 މޭޒުމަތީސަމުސާ މާޖިރީން 1 މޭޒުމަތީސަމުސާ ބޭކިން ޕައުޑަރު 80 ގުރާމު މޭބިސްކަދުރު (ކުދިކޮށް ކޮށާފައި) 80 ގުރާމު ކަނަމަދު (ކުދިކޮށް ކޮށާފައި) ބައި ޖޯޑު ކިރު (ލެކްނޯ މިލްކް) 2 ކުކުޅު ބިސް 2 ސައިސަމުސާ ވެނީލާ އެސެންސު ހަދާނެ ގޮތް ބޭކިން ޕައުޑަރާއި ފުށް އެއްކޮށްގެން ފުރާނާފައި ވަކިން ބެހެއްޓުން. އެހެން އެއްޗެއްގައި މާޖިރީނާއި، ހަކުރާއި، ކުޅުބިސް އެއްކޮށް ގިރުން. ގިރާނީ ހަކުރުތައް ވިރެންދެން. އެ އަށް ފަހު އޭގެ ތެރެއަށް ފުށް އެޅުން. ފުށް އަޅާނީ މަދުމަދުން ގޮސް ހުރިހާ ފުށް ހުސްވަންދެން. ދެން ކިރު އެޅުން. ފުށާއި ކިރު އަޅާއިރު ވެސް މަޑުމަޑުން ގިރަމުންގެންދިޔުން. ފުށްގަނޑު ތެރެއަށް ވެނީލާ އެސެންސު އެޅުމަށް ފަހު، ކަދުރާއި، ކަނަމަދާއި، މޭބިސްކަދުރު އެޅުން. ރަނގަޅަށް ގިރާލާފައި، ޓްރޭއަކަށް އަޅާފައި ފިހުން. އެޑިޓަރުގެ ނޯޓް: މި ރެސިޕީތަކަކީ، ފާތިމަތު ޚުރުޝިދާގެ ރެސިޕީތަކެކެވެ. އޭނާ އަންނަނީ ދިވެހި ރަހަތަކަށް އިސްކަން ދީގެން އަމިއްލަ ގޭގައި އެތަކެތި ތައްޔާރުކޮށް، އޭގެ ހުރިހާ މައުލޫމާތަކާއި ފޮޓޯތައް ފޭސްބުކް ޕޭޖް "ރުމާ"ގައި ކިޔުންތެރިންނާ ހިއްސާ ކުރަމުންނެވެ. "ހަވީރު"ން މި ގެނެސްދެނީ ޚުރުޝިދާގެ ސަތޭކަ އަށް ވުރެ ގިނަ އުފެެއްދުމުގެ ތެރެއިން 60 ރެސިޕީއެކެވެ. ރޯދަ މަހުގެ ކޮންމެ ދުވަހަކު ވެސް އޭނާގެ ކޮންމެވެސް ދިވެހި ރަހައެއް ކިޔުންތެރިންނާ ހަމައަށް ގެނެސްދޭނަމެވެ.