ހަވީރު އޮންލައިން ވެބް ސައިޓަށް ދުވާލެއްގެ މައްޗަށް ލިބޭ ހިޓްސްގެ މިންވަރު 1.3 މިލިއަނަށް އަރައިފި އެވެ.
މިހާރު އެވްރެޖްކޮށް ދުވާލެއްގެ މައްޗަށް އެއް މިލިއަން ހިޓްސް ލިބޭ އިރު، ހުސްވި މާޗް މަހުގެ ތެރޭގައި ހަވީރު އޮންލައިން އަށް ލިބިފައިވާ ހިޓްސްގެ ޖުމްލައަކީ، 33629222 ( 33.6 މިލިއަން) އެވެ. މީގެ އިތުރުން މިދިޔަ މަހުގެ ތެރޭގައި އަލަށް ހަވީރު އޮންލައިން ވެބްސައިޓަށް ޒިޔާރަތްކުރި މިންވަރު ވަނީ 7.4 ޕަސެންޓް އިތުރުވެފަ އެވެ.
ވެއަތުވެ ދިޔަ އަހަރު ދުވަހުގެ ހިސާބުތަކަށް ބަލާއިރު އެންމެ ގިނަ ހިޓްސް ލިބިފައިވަނީ، ހުސައިން ސޮލާހުގެ މަރާ ވިދިގެން ގެނެސްދިން ދެ ޚަބަރަށެވެ. އެ ޚަބަރަށް 25497 ހިޓްސް ލިބިފައިވެ އެވެ. އެއަށް ފަހު އެންމެ ގިނަ ހިޓްސް ލިބިފައިވަނީ ވަގަށް އެތެރެކުރަނިކޮށް އަތުލައިގަތް މަސްތުވާތަކެތީގެ މައްސަލައިގެ ޚަބަރަށެވެ. އެއީ 15814 ހިޓްސް އެވެ.
ހަވީރު ވެބްސައިޓަށް ދުނިޔޭގެ ހުރިހާ ކަންކޮޅަކުން ވެސް ވަދެފައިވާ އިރު، އެންމެ ގިނަ ބަޔަކު ޒިޔާރަތްކޮށްފައިވަނީ ރާއްޖެއިންނެވެ. ހަވީރު އޮންލައިންގައިވާ ތަފާތު ބައިތަކަށް ބަލާއިރު އެންމެ ގިނަ މީހުން ޒިޔާރަތްކޮށްފައިވަނީ ޚަބަރުތަކަށެވެ. އޭގެ އެންމެ ގިނަ ބަޔަކު ކިޔާ ބައިތަކަށް ބަލާއިރު، ދުނިޔޭގެ ކުޅިވަރު، ދިވެހި ކުޅިވަރު އަދި މުނިފޫހިފިލުވުމުގެ ޚަބަރުތަކާއި ރިޕޯޓްތައް ހިމެނެ އެވެ.
އަހަރު ދުވަހުގެ ތަފާސްހިސާބަށް ބަލާއިރު ހަވީރު އޮންލައިން އަށް އެންމެ ގިނަ ހިޓްސް ލިބިފައިވަނީ 2006 އެޕްރީލް 15 އަދި 16 ވަނަ ދުވަހު އެވެ. އެޕްރީލް 16 ވަނަ ދުވަހު 565028 ހިޓްސް ލިބިފައިވާ އިރު އެޕްރީލް 15 ވަނަ ދުވަހު ލިބިފައިވަނީ 532984 ހިޓްސް އެވެ. އެޕްރީލް 15 ވަނަ ދުވަހަކީ، ސ. ހިތަދޫ ނާޒުކީގޭ ހުސައިން ސޮލާހު މަރުވެފައި އޮއްވާ މާލޭގެ ދެކުނު ފަރާތު ފަޅުތެރެއިން، ފެނުނު ދުވަހެވެ.
ހަވީރު ވެބްސައިޓަށް މަހެއްގެ ތެރޭގައި ލިބުނު ހިޓްސްގެ އަދަދު އެންމެ ފުރަތަމަ މިލިއަނުން ގުނާލެވިގެން ދިޔައީ ސުނާމީ ހާދިސާގެ ތެރޭގަ އެވެ. އެ ހާދިސާގެ ހަވީރު އޮންލައިން ކަވަރޭޖުގެ ފުރަތަމަ ތިން ދުވަހުގެ ތެރޭގައި 1.3 މިލިއަން ހިޓްސް ލިބިފައިވާ ކަމަށް އޮންލައިންގެ ޑޭޓާތަކުން ދައްކަ އެވެ. މިއީ ހަވީރު އޮންލައިނުގެ ތާރީހުގައި މިހާ ގިނަ ބަޔަކު އޮންލައިނަށް ޒިޔާރަތްކުރި ފުރަތަމަ ފަހަރެވެ.
ދެ ހާސް ހަތަރު ވަނަ އަހަރުގެ ޑިސެމްބަރު 26 ގައި މުޅި ރާއްޖެ ދޮވެލި ސުނާމީގެ ހަބަރުތައް ކިއުމަށް އެންމެ ގިނަ ބަޔަކު ހަވީރު އޮންލައިނަށް ޒިޔާރަތްކޮށްފައި ވަނީ ޑިސެމްބަރު 27 ވަނަ ދުވަހު އެވެ. އެ ދުވަހު އެކަނި ވެސް 611،634 ހިޓްސް ލިބިފައި ވެ އެވެ.
ހަވީރު އޮންލައިން ފުރަތަމަ ޝާއިއުކުރަން ފެށީ 1 ޖެނުއަރީ 1997ގަ އެވެ. ހަވީރު އޮންލައިން އިތުރަށް ތަރައްގީކޮށް ކިޔުންތެރިންނާ ރަހުމަތްތެރި ވެބްސައިޓަކަށް ހެދުމުގެ ގޮތުން، ވެބް 2.0 ޓެކްނޮލޮޖީ އަށް ފެތޭގޮތަށް އަލުން ފަރުމާކޮށް ވެބްސައިޓް ރީލޯންޗްކޮށްފައިވަނީ، މި އަހަރުގެ ޖެނުއަރީ މަހުގެ 8 ވަނަ ދުވަހުގެ ރޭ އެވެ.