ރޯދަމަހުގެ ފަހު ދުވަހު މާލެ ސަރަހައްދުން ކަރަންޓު ބޭނުންކުރި މިންވަރު އިތުރުވެފައިވާ ކަމަށް ސްޓެލްކޯއިން އިއްޔެ ބުނެފި އެވެ.
ވީ ކިހިނެއް؟ - ސްޓެލްކޯއިން މިހެން ބުނީ ރޯދަމަހުގެ ފަހު ދުވަހު ކަރަންޓު ބޭނުންކޮށްފައިވާ ގޮތް ދައްކުވައިދީ 'އެކްސް'ގައި ހިއްސާކޮށްފައިވާ ޕޯސްޓެއްގަ އެވެ. އެ ދުވަހުގެ ރޭގަނޑު 11 ޖެހުމާ ހަމައަށް އެކި ގަޑިތަކުގައި މާލެ ސަރަހައްދުގައި ކަރަންޓު ބޭނުންކޮށްފައިވާ ގޮތް އެ ޕޯސްޓުން ދައްކުވައިދީފައިވެ އެވެ.
ބުނީ ކީކޭ؟ - ސްޓެލްކޯއިން ބުނީ މާލެއާ ހުޅުމާލޭގައި މިދިޔަ ހޮނިހިރު ދުވަހު ޕީކް ގަޑިތަކުގައި ކަރަންޓު ބޭނުންކޮށްފައިވާ މިންވަރު އޭގެ ކުރީ ދުވަހާ އަޅާ ބަލާއިރު އިތުރުވެފައިވާ ކަމަށެވެ. އެގޮތުން އެންމެ ޕީކް ގަޑީގައި 104 މެގަވޯޓާއި ގާތްކުރާ އަދަދަަކަށް ކަރަންޓު ބޭނުންކުރެވިފައިވާ ކަމަށް ބުންޏެވެ.
ހޮނިހިރު ދުވަހު އެންމެ ގިނައިން ކަރަންޓު ބޭނުންކޮށްފައިވަނީ މެންދުރު 2 އަކާއި 4އާ ދޭތެރޭގަ އެވެ. އެ ޕޯސްޓުން ފެންނަ ގޮތުން:
ހޮނިހިރު ދުވަހުގެ ދަންވަރު 12 ޖެހިއިރު 89،567 މެގަވޯޓުގެ ކަރަންޓު ބޭނުންކޮށްފައިވޭ
އެއަށް ފަހު ކަރަންޓު ބޭނުންކުރާ ވަރު ދަށްވަމުން ގޮސް ހެނދުނު 6 އިން ފެށިގެން 11 ހަމަޔަށް ބޭނުންކޮށްފައިވަނީ 72،384 މެގަވޯޓާއި 94،902 ދެމެދު މެގަވޯޓުގެ ކަރަންޓު
ކަރްންޓު ބޭނުންކޮށްފައިވާ މިންވަރު އެންމެ ބޮޑަށް އިތުރުވެފައިވަނީ  މެންދުރު 2 އަކާއި 4އާ ދޭތެރޭގައި
މި ދޭތެރޭ ކަރަންޓު ބޭނުންކުރި މިންވަރު ހުރީ 101،818 މެގަވޯޓާއި 103،801 މެގަވޯޓާ ދެމެދުގައި
އިރުއޮއްސި 5 ކާއި 7 ދޭތެރޭގައި ކަރަންޓު ބޭނުންކުރި އަދަދު 93،833 މެގަވޯޓަށް ދަށްވި
ކަރްންޓު ބޭނުންކުރި މިންވަރު 103 މެގަވޯޓާ ގާތްކުރާ މިންވަރަކަށް އަނެއްކާވެސް މަތިވެފައިވަނީ ރޭގަނޑު 9 އަކާއި 11އާ ދޭތެރޭގައި
ފާހަގަކޮށްލެވޭ ކަމެއް - ސްޓެލްކޯއިން މީގެ ކުރިން އާންމުކޮށްފައިވާ ތަފްސީލުތަކުން ފެންނަގޮތުން ރޯދަމަހުގެ ފުރަތަމަ ދުވަހު މާލެ ސަރަހައްދުގައި ކަރަންޓު ބޭނުންކުރި ނިސްބަތް އެހެން އަހަރުތަކާ އަޅާބަލާއިރު ދަށެވެ. އެދުވަހު މާލެ ސަރަހައްދުގައި އެންމެ ޕީކު ގަޑީގައި ބޭނުންކޮށްފައިވަނީ 78 މެގަވޮޓުގެ ކަރަންޓެވެ. ރޯދަ މަހުގެ ކުރިން ޕީކް ގަޑީގައި ކަރަންޓު ބޭނުންކުރާ މިންވަރު އެވްރެޖްކޮށް އުޅެނީ 100 މެގަވޮޓުގަ އެވެ.
ރޯދަ މަހުގެ ކަރަންޓާއި ފެން ބިލުން %10ގެ ޑިސްކައުންޓު ދޭން ސަރުކާރުން ވަނީ ނިންމައިފަ އެވެ.