އައްޑޫ ސިޓީ މަރަދޫފޭދޫގައި މަސްތުވާތަކެތި ބޭނުންކުރުމުގެ ހިދުމަތް ދެމުންދާކަމުގެ ތުހުމަތުގައި، އެ ރަށުގެ ގެއެއް ބަންދުކުރަން މަރަދޫފޭދޫ މެޖިސްޓްރޭޓް ކޯޓުން އަމުރުކޮށްފިއެވެ.
މަރަދޫފޭދޫ މެޖިސްޓްރޭޓު ކޯޓުން އިއްޔެ އެ އަމުރު ނެރުނީ 90 ދުވަހުގެ މުއްދަތަކަށެވެ. މަސްތުވާތަކެއްޗާ ބެހޭ ގާނޫނުގެ ދަށުން ނެރުނު އެ އަމުރަކީ، މަސްތުވާތަކެތި ބޭނުންކުރުމުގެ ހިދުމަތްދޭ ތަނެއް ބަންދުކުރުމަށް މަރަދޫފޭދޫ މެޖިސްޓްރޭޓް ކޯޓުން ނެރުނު ފުރަތަމަ އަމުރެވެ.
މިކަމާ ގުޅިގެން ފުލުހުން ބުނެފައިވަނީ ކޯޓު އަމުރުގެ ދަށުން އެގޮތަށް ބަންދުކުރާ ތަންތަނަށް، އެ އަމުރުގެ މުއްދަތުގައި ހުއްދަނެތި ވަދެނުކުމެ ހެދުމަކީ ގާނޫނީ ކުށެއް ކަމަށެވެ. މިފަދަ ތަންތަނަށް ހުއްދަނެތި ވަންނަ ފަރާތްތަކާއި، އެ ތަންތަނަށް އެކި ގޮތްގޮތުން ގެއްލުންދޭ ފަރާތްތަކާމެދު ގާނޫނީ ގޮތުން އެޅޭނެ އެންމެ ހަރުކަށި ފިޔަވަޅު އަޅާނެ ކަމަށް ވެސް ބުނެފައިވެއެވެ.
އޭގެ އިތުރުން މަސްތުވާތަކެއްޗާ ބެހޭ ގާނޫނުން ފުލުހުންނަށް ލިބިދީފައިވާ ބާރުތަކުގެ ދަށުން، ފުލުހުން ކުރަމުންދާ މަސައްކަތް ހުއްޓުމެއްނެތި ކުރަމުންދާނެ ކަމަށާއި މަސްތުވާތަކެތީގެ ވިޔަފާރިކޮށް، މަސްތުވާތަކެތި ބޭނުންކުރުމުގެ ހިދުމަތް ދެމުންދާ އިތުރު ތަންތަން ހޯދައި، ގާނޫނުގައިވާ ގޮތުގެ މަތިން އެފަދަ ތަންތަން ބަންދުކުރުމުގެ މަސައްކަތް ވެސް ކުރަމުންދާނެ ކަމަށް ފުލުހުން ބުނެފައިވެއެވެ.
މީގެ ކުރިން މި މަހުގެ އަށް ވަނަ ދުވަހު އައްޑޫ ސިޓީ ހިތަދޫގައި ޑްރަގް ކެފޭއެއް ހިންގަމުންދިޔަ އެ ރަށު ލާމިޔާގެއާގެ ވެސް އެ ރަށު މެޖިސްޓްރޭޓު ކޯޓުގެ އަމުރެއްގެ ދަށުން ވަނީ ބަންދުކޮށްފައެވެ. އޭގެ އިތުރުން، ފުވައްމުލައް، ފުނާޑު، ގުލިސްތާނުގޭގައި ގެއެއް ވެސް އެ ރަށު މެޖިސްޓްރޭޓު ކޯޓުގެ އަމުރެއްގެ ދަށުން ވަނީ ބަންދުކޮށްފައެވެ.