އަނބިހާ ވަރިކުރުމަށްފަހު 3 މަސް ނުވަނީސް އަނބިމީހާއަށް ބޮސްދިނުމަކީ ކައިވެނި ރުޖޫޢަވާނެ ސަބަބެއްތޯ؟  
މިކަމުގައި ޢިލްމްވެރިންގެ ބަސްފުޅު ތިރީގައިވާ ލިޔުމުން އެނގިލައްވާނެއެވެ. އިން ޝާ ﷲ   
މި މައްސަލައިގައި ޢިލްމުވެރިންގެ ރައުޔުތައް ތިރީގައި މިވަނީއެވެ. 
1.    ޙަނަފީ މަޛްހަބު: ރުޖޫޢަ ކުރުމުގެ ނިޔަތެއް ނެތިވެސް، އިއްދާގެ ތެރޭގައި އަނބިމީހާގެ ގައިގާ ޝަހްވަތާ އެކު ބީހުނު ނަމަވެސް، ބޮސް ދިންނަމަވެސް، ޖިމާޢުވީނަމަވެސް، ކައިވެނި ރުޖޫޢަވާނެއެވެ.  
2.    މާލިކީ މަޛްހަބު: ޢިއްދާގެ ތެރޭގައި ޖިމާޢުވެއްޖެނަމަ ކައިވެނި ރުޖޫޢަވާނެއެވެ. ޝަހްވަތާއި އެކު ދޮނެއްދިނުމުން ކައިވެނި ރުޖޫޢަވާނީ ރުޖޫޢަ ކުރުމުގެ ނިޔަތުގައި ބޮސްދީފިނަމައެވެ.  
3.    ޝާފިޢީ މަޛްހަބު: ރުޖޫޢަ ކުރުމުގެ ނިޔަތެއް އޮތްނަމަވެސް އަދި ނެތްނަމަވެސް، ޖިމާޢުވެގެންނެއް، އަދި ބޮސްދީގެންނެއް ކައިވެނި ރުޖޫޢަ އެއް ނުވާނެއެވެ.  
4.    ޙަންބަލީ މަޛްހަބު: ޖިމާޢު ވުމާއި ބޮސްދިނުމާއި ތަފާތެވެ. އެގޮތުން ރުޖޫޢަ ކުރުމުގެ ނިޔަތެއް ނެތިވެސް ޖިމާޢުވެއްޖެނަމަ ކައިވެނި ރުޖޫޢަވާނެއެވެ. ބޮސްދިނުމުން ކައިވެނި ރުޖޫޢަ ވުމާއި މެދުގައި އެބޭފުޅުންގެ މެދުގައި ޚިޔާލު ތަފާތުވެފައިވެއެވެ.   
ރާޖިޙް ގޮތަކީ: ބޮސްދިނުމަކުން ކައިވެނި ރުޖޫޢަ ނުވާނެ ކަމެވެ. އެއީ ރުޖޫޢަ ކުރުމުގެ ނިޔަތާއި އެކު ބޮސްދިން ނަމަވެސް ނުވަތަ ނޫންނަމަވެސް އެވެ. والله أعلم 
 
- ޑރ. މުޙައްމަދު އިޔާޟް ޢަބްދުއްލަޠީފް