ހަނގުރާމައިގެ ސަބަބުން މެދުއިރުމަތީގެ މަޝްރަހު ގޯސްވެފައިވާތީ ރައްކާތެރި ނޫން ކަމަށް ބުނެ، އެންމެ ފަހު ވަގުތު ފުރުން ކެންސަލް ކުރި އަލްއަބްރާރު އުމްރާ ގުުރޫޕުގެ ހުއްދަ، އިސްލާމިކް މިނިސްޓްރީން ހިފަހައްޓައިފި އެވެ.
ވީ ކިހިނެއް؟ - އަބްރާރު ގުރޫޕުން އަޅުކަމަށް 110 މީހުން ގެންދިޔުމަށް ވަނީ ނިންމާފަ އެވެ. މި މަހުގެ 3 ވަނަ ދުވަހު ކުރަން އޮތް ދަތުރު، އެންމެ ފަހު ވަގުތު ކެންސަލް ކުރުމުން، އޭގެ ތެރެއިން ބައެއް މީހުން އިއްޔެ ރޭ ވަނީ އެ ގުރޫޕުގެ އޮފީސް ދޮށަށް އަޑުގަދަކޮށްފަ އެވެ.
އެނގިފައިވާ ގޮތުގައި، ގުރޫޕުން ކުއްލި ގޮތަކަށް ބޭއްވި ބައްދަލުވުމެއްގައި ނިންމީ، އެ މީހުން އެނބުރި އައުމަށް ނިންމާފައި އޮތް، މި މަހުގެ 26އާ ހަމައަށް ވެސް ހަނގުރާމައަށް ވާނެ ގޮތެއް ނޭނގޭތީ އުމްރާއަށް މީހުން ނުގެންދާށެވެ.
މި މައްސަލަ އިސްލާމިކް މިނިސްޓްރީން އަންނަނީ ބަލަމުންނެވެ.
ތަފްސީލް - އެ މިނިސްޓްރީން މިއަދު ނެރުނު ބަޔާނެއްގައި ބުނީ، މިހާތަނަށް ބެލިބެލުމުން، އަލް އަބްރާރު ގުރޫޕުން އުމްރާ ދަތުރު ކެންސަލްކޮށްފައިވަނީ މަގުބޫލު އެއްވެސް ސަބަބެއް ނެތި ކަމަށެވެ. އެ ތަނުން ބުނީ:
އެހެންވެ، އުމްރާއަށް މީހުން ގެންދިޔުމާ ބެހޭ އުސޫލާ ހިލާފަށް އަމަލުކޮށްފައިވާތީ، އެ ކުންފުންޏަށް ދީފައިވާ ހުއްދަ ވަގުތީ ގޮތުން ހިފަހައްޓަފައިވާ ކަމަށް
އިތުރަށް ސާފުކުރަން ޖެހޭ ކަންކަމާއި މައުލޫމާތު ހޯދުމަށް ފަހު، އުސޫލުގެ ތެރެއިން އަޅަން ޖެހޭ ފިޔަވަޅު އަޅާނެ ކަމަށް
އިސްލާމިކް މިނިސްޓްރީން ބުނީ، މި މައްސަލައާ ގުޅިގެން ނުފުރި ތިބި އުމްރާވެރިންނަށް، އެހީތެރިކަން ފޯރުކޮށްދެވެން ހުރި ގޮތްތައް ބަލައި އެ ހިދުމަތް ފޯރުކޮށްދިނުމަށް މަސައްކަތް ކުރަމުން އަންނަ ކަމަށެވެ.
އެނގުން މުހިއްމު - އަބްރާރު ގުރޫޕުން އުމްރާއަށް ނުދެވުނު 28 މީހަކަށް، ހައްޖު ކޯޕަރޭޝަނުން ވަނީ އެހީވެފަ އެވެ.
އެ ކުންފުނިން ބުނީ، އެތަނުގައި ޖާގަ އޮތް މިންވަރުން، 28 މީހުންނަށް ވިސާ ހަމަޖައްސައި މައްކާ އާއި މަދީނާއިން އެކޮމޮޑޭޝަނާއި ކެއިންބުއިމާއި ދަތުރުފަތުރުގެ އިންތިޒާމްތައް ހަމަޖައްސާފައިވާ ކަމަށެވެ. އަދި އިއްޔެ ހެނދުނު އެ މީހުން އުމްރާގެ އަޅުކަމަށް ފުރާފައިވާ ކަމަށް ބުންޏެވެ.