އިޒްރޭލާއި އީރާނާ ދެމެދު މިދިޔަ ހޮނިހިރު ދުވަހުން ފެށިގެން މިހާރު ހިނގަމުންދާ ހަނގުރާމައިގެ ސަބަބުން އިޒްރޭލުގެ އިގްތިސާދަށް ހަފުތާއެއްގެ ތެރޭގައި ގާތްގަނޑަކަށް ތިން ބިލިއަން އެމެރިކާ ޑޮލަރު (9.4 ބިލިއަން ޝެކެލް) ގެ ގެއްލުންވަމުންދާ ކަމަށް އެ ގައުމުގެ މާލީ ވުޒާރާއިން ހާމަކޮށްފިއެވެ. މީގެ އިތުރުން، މި ހަމަނުޖެހުންތަކުގެ ސަބަބުން ދުނިޔޭގެ އިގްތިސާދަށް ވެސް ބޮޑެތި ގޮންޖެހުންތަކެއް ދަނީ ކުރިމަތިވަމުންނެވެ. އިޒްރޭލަށް މި ބޮޑު ގެއްލުން ކުރިމަތިވަމުންދަނީ އެ ގައުމުގެ ހޯމް ފްރަންޓް ކޮމާންޑުން އިއުލާނުކޮށްފައިވާ ރެޑް އެލާޓުގެ ދަށުން އަޅާފައިވާ ހަރުކަށި ފިޔަވަޅުތަކާ ގުޅިގެންނެވެ. މީގެ ތެރޭގައި ސްކޫލްތައް ބަންދުކުރުމާއި، އާންމުން އެއްވެ އުޅުން މަނާކުރުމާއި، މަސައްކަތަށް ނުކުތުން ހުއްޓުވުމުގެ އިތުރުން ގިނަ އަދަދެއްގެ ރިޒާވް ސިފައިން ހަނގުރާމައަށް ނެރުން ހިމެނެއެވެ. އިޒްރޭލުގެ މާލީ ވުޒާރާގެ ޑިރެކްޓާ ޖެނެރަލް އިލާން ރޮމް ވަނީ، އިގްތިސާދަށް ލިބެމުންދާ ގެއްލުން ކުޑަކުރުމަށްޓަކައި، މިހާރު އަޅާފައިވާ ފިޔަވަޅުތަކަށް ލުޔެއްދީ "އޮރެންޖް" އެލާޓަށް ބަދަލުކުރުމަށް ހޯމް ފްރަންޓް ކޮމާންޑުގައި އެދިވަޑައިގެންފައެވެ. ފިޔަވަޅުތަކަށް ލުއިދީފިނަމަ، ހަފުތާއަކު ލިބޭ ގެއްލުން 1.4 ބިލިއަން ޑޮލަރަށް ކުޑަކުރެވޭނެ ކަމަށް މާލީ ވުޒާރާއިން ލަފާކުރެއެވެ. މިދިޔަ ހޮނިހިރު ދުވަހު އެމެރިކާއާއި އިޒްރޭލުން ގުޅިގެން އީރާނަށް ދިން ހަމަލާތަކާ ގުޅިގެން މެދުއިރުމަތީގެ މަސްރަހު ވަރަށް ބޮޑަށް ހޫނުވެފައިވާއިރު، ދުނިޔޭގެ ބާޒާރުގައި ތެލުގެ އަގު ވަނީ 10 އިންސައްތަ އުފުލިފައެވެ. އަދި މި ހަނގުރާމަ އެތައް ހަފުތާއަކަށް ދެމިގެންދާނެ ކަމަށް އެމެރިކާއާއި އިޒްރޭލުގެ އޮފިޝަލުން ލަފާކުރައްވާއިރު، މީގެ ސަބަބުން ދުނިޔޭގެ ބާޒާރުތަކަށް އިތުރު ލޮޅުންތަކެއް އަރާނެ ކަމަށް މާލީ ތަޖުރިބާކާރުން އިންޒާރުދެއެވެ.