ސްރީ ލަންކާގެ އައްސޭރިފަށުން ފެނުނު އީރާނުގެ އިތުރު އުޅަނދެއްގައި ތިބި މީހުންގެ ފުރާނަ ސަލާމަތްކުރުމުގެ މަސައްކަތް ކުރަމުންދާ ކަމަށް އެ ގައުމުން ދެންމެއަކު ބުނެފި އެވެ.
ލަންކާގެ ކެބިނެޓް ތަރުޖަމާނު ވިދާޅުވީ، އެ ގައުމުގެ އައްސޭރިފަށުގެ ބޭރުން ފެނުނު އީރާނުގެ އުޅަނދެއްގައި ތިބި މީހުންގެ ފުރާނަ ސަލާމަތްކުރުމަށް މަސައްކަތް ކުރަމުންދާ ކަމަށެވެ. އަދި އެ އުޅަނދު އޮތީ އެ ގައުމުގެ ކަނޑުގެ ބޭރުން، އެ ގައުމުގެ ހާއްސަ އިގްތިސާދީ ސަރަހައްދުގައި ކަމަށް ވެސް އޭނާ ފާހަގަކުރެއްވި އެވެ.
"އަޅުގަނޑުމެން މި ދަނީ މީހުންގެ ފުރާނަ ސަލާމަތްކުރުމަށްޓަކައި ކުރެވެން ހުރި އެންމެހާ މަސައްކަތްތަކެއް ކުރަމުން،" ތަރުޖަމާނު ނަލިންދަ ޖަޔަތިއްސަ ވިދާޅުވި އެވެ.
ނަމަވެސް، ދެވަނަ އުޅަނދަށް ވީ ގޮތެއް އަދި ސާފެއެް ނުވެ އެވެ.
އިންޑިއާ ކަނޑުގައި ދަތުރުކުރަމުންދިޔަ އީރާނުގެ ހަނގުރާމަމަތީ މަނަވަރަކަށް އެމެރިކާގެ ސަބްމެރިންއަކުން އިއްޔެ ދިން ހަމަލާއަކުން ސަލާމަތްވި ފަޅުވެރިންނަށް ލަންކާގެ ގޯލް ސިޓީގެ ހޮސްޕިޓަލެއްގައި މިހާރު ފަރުވާދެމުން އެބަދެ އެވެ.
ގޯލްގެ ނޭޝަނަލް ހޮސްޕިޓަލުގެ އޮފިޝަލުން ވިދާޅުވި ގޮތުގައި، އިއްޔެ އެހީއަށް އެދި ގޮވުމަށް ފަހު އަޑިއަށްދިޔަ އީރާނުގެ ފްރިގޭޓް އައިއާރުއައިއެސް ދަނާ އިން މަރުވި 87 މީހެއްގެ ހަށިގަނޑު މިހާތަނަށް ވަނީ އެއްގަމަށް ގެނެސްފަ އެވެ.
ގެއްލިފައިވާ ކަމަށް ބެލެވޭ 60 ފަޅުވެރިން ހޯދުމުގެ މަސައްކަތް އަދިވެސް ކުރިއަށްދާއިރު، ސަލާމަތްވި 32 ފަޅުވެރިންނަށް ލިބިފައިވާ ކުދި އަނިޔާތަކަށް ފަރުވާ ދިނުމަށް ފަހު، ވަރަށް އަވަހަށް ހޮސްޕިޓަލުން ދޫކޮށްލާނެ ކަމަށްވެ އެވެ.
އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ވަނީ މި ހަމަލާ ދީފައިވަނީ އެމެރިކާގެ ސަބްމެރިންއަކުން ކަމަށް ކަށަވަރުކޮށްދެއްވާފަ އެވެ. އޭނާ ވިދާޅުވީ، ބައިނަލްއަގުވާމީ ކަނޑުގެ ސަރަހައްދުގައި ރައްކާތެރިކަމާ އެކު އޮތް ކަމަށް އީރާނުން ހީކުރި ހަނގުރާމަމަތީ މަނަވަރު، އެމެރިކާގެ ސަބްމެރިންއަކުން ފޮނުވާލި ޓޯޕިޑޯ ހަމަލާއެއްގައި ފައްތާލާފައިވާ ކަމަށެވެ.