ކުޑަކުދިންނަށް ޖިންސީ ގޯނާކޮށް އަދި އެ ކުދިންގެ ބަރަހަނާ މަންޒަރު ވީޑިއޯކޮށް، ނުފޫޒު ގަދަ މީހުންނަށް އެ ކުދިން ވިއްކި ސެކްސް ޓްރެފިކަރު، އެމެރިކާގެ ޖެފްރީ އެޕްސްޓީންއާ ގާތް ގުޅުންތަކެއް ބޭއްވި ރާއްޖޭގެ ކުރީގެ ރައީސް މުހައްމަދު ވަހީދަށް ކުރެވޭ ތުހުމަތުތައް އިސްވެ ފުލުހުން ތަހުގީގުކުރަމުން ނުދާ ކަމަށް ހޯމްލޭންޑް މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.
ވީ ކިހިނެއް؟ - އެޕްސްޓީންގެ މެއިލްތައް ހިމެނޭ ފައިލްތައް އެމެރިކާގެ ޖަސްޓިސް ޑިޕާޓްމަންޓުން އާންމުކޮށްފައިވާއިރު، ވަހީދު އެޕްސްޓީނަށް ފޮނުއްވި ބައެއް މެއިލްތައް ސޯޝަލް މީޑިއާގައި އާންމުވެ ފާޑުކިއުން އަމާޒުވުމުން، ރައީސް މުހައްމަދު މުއިއްޒުގެ އެޑްވައިޒަރުގެ މަގާމުން އިސްތިއުފާދެއްވީ މިދިޔަ މަހުގެ 3ގަ އެވެ.
ރައީސް މުއިއްޒު މިފަހުން ވިދާޅުވީ ވަހީދު އިސްތިއުފާ ދެއްވީ އެ މަނިކުފާނު އަންގަވައިގެން ކަމަށެވެ.
ބުނީ ކީކޭ؟ - ހޯމްލޭންޑް މިނިސްޓްރީން މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުުމުގައި އެ މައްސަލަ އިސްވެ ފުލުހުން ބަލަމުންދޭތޯ ނޫސްވެރިއަކު ސުވާލުކުރި އެވެ.
ޖަވާބުގައި އިހުސާން ވިދާޅުވީ، އެ މައްސަލަ އެއްވެސް ފަރާތަކުން ހުށަހަޅާފައިނުވާ ކަމަށާއި ފުލުހުން އިސްވެ ވެސް އެ މައްސަލަ ބަލަމުން ނުދާ ކަމަށެވެ. އެކަމަކު ޖިނާއީ ތުހުމަތެއް ކޮށް، މައްސަލަ އެއްވެސް މީހަކު ހުށަހަޅައިފި ނަމަ އެ މައްސަލަ ބަލާނެ ކަމަށް އޭނާ ވިދާޅުވި އެވެ.
"މިހާތަނަށް ފުލުހުންގެ ހިދުމަތަށް ހުށަހެޅިފައެއް ނުވޭ ޖިނާއީ ކުށެއް ކުރިކަމުގެ ތުހުމަތު އެއްވެސް ފަރާތަކުން. އަދި އަޅުގަނޑުމެން ވެސް އަމިއްލައަށް ފެނިގެން މިހާތަނަށް އެފަދަ ތަހުގީގެއް ފަށާފައެއް ނުވޭ. އެހެން ނަމަވެސް، ވަކި މީހަކު އިސްތިސްނާނުކޮށް ޖިނާއީ ކުށެއް ކުރި ކަމަށް ގަބޫލުކުރެވޭ ހާލަތުގައި އަދި އެއްވެސް މީހަކު ހުށަހަޅައިފި ހާލަތުގައި އެ މައްސަލަތައް އަޅުގަނޑުމެން ބަލަމުން ގެންދާނަން،" އިހުސާން ވިދާޅުވި އެވެ.
އެނގުން މުހިންމު - އެޕްސްޓީން ފައިލްތަކުން ފާހަގަކޮށްލެވޭ އެއް ކަމަކީ ޓޫރިޒަމްގެ މަޝްރޫއަކާ ގުޅޭ ގޮތުން ވަހީދު ފޮނުއްވި މެއިލްތަކެވެ. އެގޮތުން:
ވަހީދު ފޮނުއްވި އެއް މެއިލްގައި ވަނީ އިންނަހެރާ މަޝްރޫއަކީ ވަރަށް ބޮޑު މަޝްރޫއެއް ކަމަށާއި، އެ ކަމުގައި އެޕްސްޓީނަށް ކުރެވިދާނެ ކަންކަމާ ގުޅޭ ގޮތުން ވާހަކަ ދައްކާލަން ބޭނުންވާ ކަމަށް
އެހެން މެއިލްއެއްގައިވަނީ، ފުއްގިރި އަދި އިންނަހެރާ މަޝްރޫއުގެ އަދާހަމަތައް
ފުއްގިރި ތަރައްގީކުރަން ބޭނުންވަނީ ވީއައިޕީ މީހުންނަށް ހާއްސަކޮށްގެން؛ އެޕްސްޓީންއާ ގުޅިގެން، މެދުއިރުމައްޗާއި ރަޝިއާ ވިޔަފާރިވެރިންނާ އެކު މަސައްކަތްކޮށްގެން އެ ރަށް މެނޭޖު ކުރެވޭނެ ކަމަށް
އިންނަހެރާ މަޝްރޫއަށް ސިންގަޕޫރުގެ ވިޔަފާރިއަކުން ހުށަހެޅުމެއް އޮތް ކަމާއި ނަމަވެސް ހުށަހަޅަނީ ދިވެހި ކުންފުންޏަށް އެންމެ %10 ދިނުމަށް؛ ރާއްޖެ ޒިޔާރަތްކޮށްގެން އެކަމަށް އިތުރު ގޮތްތަކެއް ހޯދުމަށް ވަހީދު ހުށަހެޅުއްވި
މީގެ އިތުރުން، ވަހީދު ނައިބު ރައީސް އާއި ރައީސްގެ މަގާމު ފުރުއްވި ފަސް އަހަރުގެ ކަންކަމުގެ މައްޗަށް އިނގިރޭސިން ފޮތެއް ނެރެން މަސައްކަތްކުރާ ކަމާއި އެ ކަމަށް ބޭނުންވާ ފައިސާ ހޯދުމަށް ނޫނީ އެމެރިކާއިން އެ ފޮތް ނެރެދޭނެ ފަރާތެއް ހޯދައިދިނުމަށް ވަހީދު އެދިވަޑައިގެންފައިވެ އެވެ.
އެކަމަކު، އެކަމާ ގުޅޭ ގޮތުން ވަހީދުގެ އޮފީހުން ނެރުނު ބަޔާނުގައި ބުނީ އެޕްސްޓީިންއާ ބައްދަލުކުރެއްވި އިރު، އޭނާގެ މައްޗަށް 2008 ވަނަ އަހަރު ކުރި ތުހުމަތާއި އެކަމާ ގުޅޭ މައުލޫމާތު ސާފުވެފައި ނެތް ކަމަށެވެ. އެކަން އެނގިވަޑައިގެންފައި އޮތް ނަމަ، އެޕްސްޓީންއާ އެކު ބޭއްވެވި ފުރަތަމަ ބައްދަލުވުމަށް ފަހު އިތުރު ބައްދަލުވުމެއް އަދި މުއާމަލާތެއް ވެސް ނުހިންގެވީސް ކަމަށް އެ ބަޔާނުގައި ބުންޏެވެ.