ފުލުހުންގެ އިދާރާ ވަގުތީ ގޮތުން ހިންގުން ހަވާލުކޮށްފައިވާ ޑެޕިއުޓީ ކޮމިޝަނަރު، ފަރުހާދު ފިކުރީގެ ދަރިފުޅަށް ތުހުމަތުކުރި ސީރިއަސް މައްސަލައެއްގައި ހެކި ނައްތާލި ކަމަށް ތުހުމަތު ކުރެވޭ މައްސަލަ، ފަރުހާދުގެ މައްޗަށް ސާބިތުނުވާ ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެއެވެ. ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ (241) ކޮމިޓީއަށް، ފުލުހުންގެ ޗީފް އިންސްޕެކްޓާ ރޭންކުން މަތީ 11 އޮފިސަރުން ވިސުލްބްލޯވަރުންގެ ގޮތުގައި ފޮނުވި ސިޓީއެއްގައި ވަނީ ފަރުހާދުގެ މައްޗަށް ބޮޑު ތުހުމަތެއް ކޮށްފައެވެ. އެއީ އޭނާގެ ފިރިހެން ދަރިފުޅު، 18 އަހަރުން ދަށުގެ ކުއްޖަކު ރޭޕް ކުރި މައްސަލައިގައި ތަހުގީގަށް ހޯދާފައި ހުރި ހެކިތަކެއް މަގާމުގެ ނޫފޫޒު ބޭނުންކޮށްގެން ފަރުހާދު ނައްތާލި ކަމުގެ ތުހުމަތެވެ. https://sun.mv/213673 ފަރުހާދަށް ކުރި އިތުރު ތުހުމަތަކީ، މިދިޔަ ފެބްރުއަރީ މަހުގެ 27 ވަނަ ދުވަހުގެ ރޭ އޭނާގެ ފިރިހެން ދަރިއަކު މަސްތުގެ ހާލަތުގައި ހުރެ، ހުޅުމާލޭގެ އެކި ސަރަހައްދުތަކުގައި ބާރު ސްޕީޑުގައި ދުއްވުމުން މަޑު ކުރަން އެންގި ފުލުހަކަށް ހަމަލާ ދިން މައްސަލައިގައި އަމަލުކުރި ގޮތެވެ. އެ މައްސަލައިގައި ދަރިފުޅު ހުޅުމާލޭ ފުރަތަމަ ފިޔަވަހީގެ ޕޮލިހަށް ހާޒިރުކުރުމުން، ޑީސީޕީ ފަރުހާދުގެ ނުފޫޒު ބޭނުންކޮށްގެން އެ މައްސަލައިގެ ތަހުގީގު ހުއްޓުވި ކަމަށާއި ދަރިފުޅު ދުއްވި ސައިކަލު ޓޯކޮށްފައި ހުއްޓައި ގަވައިދާ ޚިލާފަށް ޓޯޔާޑުން ނެރުނު ކަމަށް ފަރުހާދަށް ވަނީ ތުހުމަތުކޮށްފައެވެ. މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު އިހުސާން ވިދާޅުވީ، ފަރުހާދުގެ މައްޗަށް ކުރެވޭ ތުހުމަތުތަކާ ގުޅޭގޮތުން އެ މައްސަލަ ކަމާ ބެހޭ މުއައްސަސާތަކުން މިހާރު ވަނީ ބަލާފައި ކަމަށެވެ. އަދި އެއިން އެއްވެސް މުއައްސަސާއަކުން އޭނާއާ މެދު އެއްވެސް ފިޔަވަޅެއް އެޅިކަން އަންގާފައި ނުވާ ކަމަށް އިހުސާން ވިދާޅުވިއެވެ. މިނިސްޓަރު އިހުސާން މިއަދު ބޭއްވި ނޫސްވެރިންގެ ބައްދަލުވުމުގައި -- ފޮޓޯ/ ރައީސް އޮފީސް އަދި އެ މައްސަލައަކީ އޭނާގެ މައްޗަށް ސާބިތު ނުވާ މައްސަލައެއް ކަމަށް ކަނޑައަޅާފައިވާ ކަމަށް އިހުސާން ވިދާޅުވިއެވެ. "މައްސަލަތައް ބަލައި، ފިޔަވަޅު އަޅަން ނުޖެހޭ ފަރާތެއްނަމަ ބޭއިންސާފުން، ނާއިންސާފުން ފިޔަވަޅެއް ނޭޅޭނެ،" އިހުސާން ވިދާޅުވިއެވެ. ފުލުސް ކޮމިޝަނަރު އިސްމާއިލް ނަވީން، ފުލުހުންގެ ވަޒީފާއިން ޝަރަފުވެރިކަމާއެކު މިދިޔަ މަހުގެ 18 ވަނަ ދުވަހު ރިޓަޔާކުރެއްވުމާ ގުޅިގެން، އެކްޓިން ސީޕީގެ މަގާމާ ފަރުހާދު ހަވާލުވީ އޭގެ އަނެއް ދުވަހެވެ. މިދިޔަ ޖޫން މަހުގެ 10 ވަނަ ދުވަހު ނަވީން ސީޕީކަމާ ހަވާލުވެވަޑައިގެންނެވީ ކުރިން އެ މަގާމުގައި ހުންނެވި އަލީ ޝުޖާއު ކުއްލި ގޮތަކަށް، މިދިޔަ އަހަރުގެ އޭޕްރީލް 26ގައި އިސްތިއުފާ ދެއްވުމުންނެވެ. ޝުޖާއު ވެސް ވަނީ ރިޓަޔާ ކުރައްވައިފައެވެ. ސީޕީ ކަމުގެ މަގާމަށް ނަވީންގެ އިތުރުން ފަރުހާދާއި ސައުތު ޕޮލިސް ކޮމާންޑަރު އެސިސްޓެންޓް ކޮމިޝަނަރު އަހްމަދު ޝަމީމް ވެސް އޭރު ކުރިމަތިލެއްވިއެވެ. ފާހަގަކޮށްލެވޭ ގޮތުގައި ފަރުހާދަކީ ފުލުހުންގެ އިސް އޮފިސަރުންތަކެއް މަގާމުން ވަކިކުރަން ޕޮލިސް ބޯޑުން 2022 ވަނަ އަހަރުގެ އޮކްޓޫބަރު މަހުގެ 10 ވަނަ ދުވަހު ނިންމިއިރު އޭގެ ތެރޭގައި ވެސް ހިމެނުނު ބޭފުޅެކެވެ. ނަމަވެސް ފަރުހާދު ވަކިކުރީ ގޯސްކޮށްކަމަށް ސިވިލް ކޯޓުން ވަނީ ނިންމައިފައެވެ.