ދަރިފުޅަށް ތުހުމަތުކުރި މައްސަލަތަކެެއްގެ ހެކި ނައްތާލަން އުޅުމާއި މަގާމުގެ ނާޖާއިޒު ބޭނުން ހިފި ކަމަށް ޑެޕިއުޓީ ކޮމިޝަނާ އޮފް ޕޮލިސް ފަރުހާދު ފިކުރީއަށް ކުރެވޭ ތުހުމަތުތައް ބަލާފައިވާ ކަމަށާއި އެކަން އޭނާގެ މައްޗަށް ސާބިތުނުވާ ކަމަށް ހޯމްލޭންޑް މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.
ވީ ކިހިނެއް؟ - ހޯމްލޭންޑް މިނިސްޓްރީން މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އެކަމާ ގުޅޭ ގޮތުން ސުވާލުކުރީ، ފުލުހުންގެ އިދާރާ ހިންގުން ވަގުތީ ގޮތުން ފަރުހާދުއާ ހަވާލުކޮށްފައިވާތީ އެވެ. ފަރުހާދުއާ އެ މަގާމު ހަވާލުކޮށްފައިވަނީ، ޕޮލިސް ކޮމިޝަނަރުގެ މަގާމުގައި ހުންނެވި އިސްމާއިލް ނަވީން ފުލުހުންގެ ހިދުމަތުން މިދިޔަ މަހު ރިޓަޔާ ކުރެއްވުމާ ގުޅިގެންނެވެ.
ފަރުހާދުގެ މައްޗަށް ސީރިއަސް ތުހުމަތުތަކެއް އޮއްވާ އެފަދަ މަގާމެއް ހަވާލުކުރީ ކީއްވެތޯ މިއަދުގެ ނޫސްވެރިންގެ ބައްދަލުވުމުގައި އިހުސާންއާ ސުވާލުކޮށްފައިވެ އެވެ.
ބުނީ ކީކޭ؟ - އިހުސާން ވިދާޅުވީ، ރާއްޖޭގެ ގާނޫނުގައި މީހެއްގެ މައްޗަށް ތުހުމަތުކުރެވުމުން އަމަލުކުރަންޖެހޭ ގޮތް ވަރަށް ސާފުކޮށް ބަޔާންކޮށްފައިވާ ކަމަށާއި ފަރުހާދުގެ މައްޗަށް ކުރެވޭ ތުހުމަތުތައް ދައުލަތުގެ މުއައްސަސާތަކުން މީގެ ކުރިން ވެސް ބަލާފައިވާ ކަމަށެވެ. އެކަމަކު މިހާތަނަށް އެ ތުހުމަތުތައް ސާބިތުވެގެން ފިޔަވަޅެއް އަޅާފައިނުވާ ކަމަށް އިހުސާން ވިދާޅުވި އެވެ.
"އެއިން އެއްވެސް މުއައްސަސާއަކުން ފަރުހާދުއާ ދޭތެރޭ އަޅަންޖެހޭ ފިޔަވަޅެއް ކަމަށް އަދި ތަނުން ވަކިކުރުމަށް، ނުވަތަ ޕްރޮމޯޝަން ހިފެހެއްޓުމަށް ކަނޑައަޅުއްވާފައެއް ނެތް. އެ މައްސަލަތައް ތަހުގީގުކޮށް ބެލި އެ މައްސަލަތަކަކީ [ފަރުހާދުގެ] މައްޗަށް ސާބިތުނުވާ މައްސަލަތަކެއް ކަމަށް ވަނީ ކަނޑައަޅާފައި،" އޭނާ ވިދާޅުވި އެވެ.
އިހުސާން ވިދާޅުވި ގޮތުން:
ހުރިހާ މީހުންނަށް ވެސް ކުރާ ތަހުމަތުތައް ރަނގަޅަށް ބަލައި ފިޔަވަޅެއް އަޅަންޖެހޭ ނަމަ އަޅާނަން
ފިޔަވަޅެއް އަޅަން ނުޖެހޭ ނަމަ ބޭއިންސާފުން ފިޔަވަޅެއް ނޭޅޭނެ
މިއީ ކުރިއަށް އޮތް ތަނުގައި ވެސް މިފަދަ ކަންކަމުގައި އަމަލުކުރާނެ ގޮތް
އެނގުން މުހިންމު - ފަރުހާދުގެ މައްޗަށް ތުހުމަތުކުރެވެނީ، ދަރިފުޅަކު ހިމެނޭ ދެ މައްސަލައެއްގައި ދަރިފުޅު ސަލާމަތްކުރަން މަގާމުގެ ނުފޫޒު ބޭނުންކުރެއްވި ކަމަށެވެ.
މި ތުހުމަތުތައް ކޮށްފައިވަނީ، މަޖިލީހުގެ ސަލާމަތީ ހިދުމަތްތަކުގެ ކޮމިޓީއަށް ފޮނުވާފައިވާ ސިޓީއެއްގަ އެވެ. އެ ސިޓީގައި ތުހުމަތުކޮށްފައިވާ ގޮތުން:
ފުރަތަމަ މައްސަލައަކީ، ފަރުހާދުގެ ފިރިހެން ދަރިއަކު މަސްތުގެ ހާލަތުގައި ހުރެ ބާރު ސްޕީޑްގައި ނުރައްކާތެރިކޮށް ސައިކަލު ދުއްވައި ހުޅުމާލޭގެ އެކި ސަރަހައްދުތަކުން މަޑުކުރަން އެންގުމުން ވެސް މަޑުނުކޮށް ދިއުމާއި ފުލުހަކަށް ހަމަލާ ދީފައިވާ މައްސަލައެއް
ދެވަނަ މައްސަލައަކީ، ފަރުހާދުގެ ފިރިހެން ދަރިފުޅުގެ މައްޗަށް ތުހުމަތުކުރި ރޭޕް އާއި ޖިންސީ ގޯނާގެ ސީރިއަސް މައްސަލައެއް
ހުޅުމާލެ ޕޮލިސްގެ ޓްރެފިކް ޕޮލިސްގެ ހެޑް ޗީފް އިންސްޕެކްޓަރުގެ ވަޓްސްއެޕް ނަންބަރަށް މެސެޖުކޮށް އޭނާގެ ދަރިފުޅުގެ ސައިކަލު ނެރެވޭނެ ގޮތެއް ހަދައިދިނުމަށް އެދިފައިވޭ
އޭގެ ފަހުން ޗީފް އިންސްޕެކްޓަރުގެ ނަންބަރަށް ގުޅައި ތިމަންނައާ މެދު ކަންތައް ކުރަނީ އާންމު މީހަކާ މެދު ކަންތައް ކުރާ ގޮތަށްތޯ ސުވާލުކޮށް، ފަރުހާދު ބޭނުން ކަމެއް މިއަދު ފުލުހުންގެ މުއައްސަސާގައި ކުރެވޭނެ ކަމަށް ބުނެފައިވޭ
ފުލުހުންގެ ޓެކްނޮލޮޖީ ޑިޕާޓްމަންޓްގެ ސޮފްޓްވެއާ މެނޭޖަރުން ލައްވައި ޓޯޔާޑުން ސައިކަލު ދޫކޮށްލާނެތޯ ވެސް ފަރުހާދު، ޗީފް އިންސްޕެކްޓަރު ކައިރީ އަހާފައިވޭ
އޭގެ ފަހުން ސޮފްޓްވެއާ ޑިޕާޓްމަންޓްގެ ދެ އޮފިސަރަކު ގުޅައި ސައިކަލުގެ މައުލޫމާތު ހޯދައި ސައިކަލު ހިފަހައްޓާފައި ހުންނަން ޖެހޭ 15 ދުވަހުގެ މުއްދަތުގެ ކުރިން ސައިކަލު ޓޯޔާޑުން ނެރެފައިވޭ
ރޭޕްކޮށް އެ އަމަލު ހިންގި ތަނުގެ ފޮޓޯ ވީޑިއޯ ނެގި ކަމަށް ބުނާ މައްސަލާގައި ފުލުހުން ތަހުގީގު ނިންމައި ދައުވާކުރަން ޕްރޮސެކިއުޓާ ޖެނެރަލް (ޕީޖީ) އޮފީހަށް ފޮނުވާފައިވޭ
ނަމަވެސް ދައުވާކުރަން ބޭނުންވާ ހެކި ނައްތާލާފައިވާކަން ފާހަގަކޮށް ޕީޖީ އޮފީހުން ފުލުހަށް ސިޓީއެއް ފޮނުވާފައިވޭ
ފުލުހަށް ޕީޖީ އޮފީހުން ފޮނުވި ސިޓީގައި ހެކި ނައްތާލަން ފަރުހާދު ބައިވެރިވުން އޮތް މިންވަރު ބަޔާންކޮށްފައިވޭ