އެމެރިކާ، އިޒްރޭލު އަދި އީރާނާ ދެމެދު ހިނގަމުންދާ ކުރިމަތިލުންތައް ވަރުގަދަވެ، ދުނިޔޭގެ ބާޒާރަށް ހަކަތަ ފޯރުކޮށްދިނުމަށް ބުރޫއަރާފާނެ ކަމަށް ބެލެވުމާ އެކު، ތެލުގެ އަގު މިއަދު ވެސް އިތުރަށް އުފުލިއްޖެ އެވެ.
މި ބަދަލާ އެކު ބްރެންޓް ކްރޫޑް ފީފާއެއްގެ އަގު 2.65 ޑޮލަރު ނުވަތަ %3.26 އިތުރުވެ 83.99 ޑޮލަރަށް އަރާފައިވާއިރު، މިއީ ޖެހިޖެހިގެން އަގު އުފުލުނު ފަސްވަނަ ދުވަހެވެ. އަދި ވެސްޓް ޓެކްސަސް އިންޓަމީޑިއަޓްގެ އަގު 2.76 ޑޮލަރު ނުވަތަ %3.7 މައްޗަށް ގޮސް ފީފާއެއްގެ އަގު ވަނީ 77.42 ޑޮލަރަށް އުފުލިފަ އެވެ.
ދުނިޔޭގައި ބޭނުންކުރާ ތެލާއި ގޭހުގެ ގާތްގަނޑަކަށް ފަސްބައިކުޅަ އެއްބައި އުފުލާ ސްޓްރެއިޓް އޮފް ހޯމޫޒްއަށް ކުރިމަތިވެފައިވާ ނުރައްކަލާ ގުޅިގެން ބާޒާރުގައި ވަނީ ނުތަނަވަސްކަން އުފެދިފަ އެވެ. އޭއެންޒެޑްގެ މާހިރުން ފާހަގަކުރާ ގޮތުގައި، މި ހަމަނުޖެހުންތަކާއި ހޯމޫޒް ކަނޑުއޮޅިން ދަތުރުކުރުމުގައި ހުރި ނުތަނަވަސްކަމުގެ ސަބަބުން، ތެޔޮ ފޯރުކޮށްދިނުމުގައި ނުރައްކަލެއް މިހާރު ވަނީ އުފެދިފަ އެވެ.
ތެލުގެ އަގު މިހާ ބޮޑަށް އުފުލިފައި މިވަނީ، އީރާނުން އިޒްރޭލަށް ގިނަ އަދަދެއްގެ މިސައިލް ހަމަލާތަކެއް ދީފައިވާ ދަނޑިވަޅެއްގަ އެވެ.
މީގެ އިތުރުން، ސްްރީ ލަންކާ ކައިރިން އީރާނުގެ އައިއާރުއައިއެސް ދެނާ މަނަވަރު އެމެރިކާގެ ސަބްމެރީނަކުން ފައްތާލުމާއި އީރާނުން ތުރުކީއަށް ފޮނުވާލި މިސައިލެއް ނޭޓޯގެ ވައިގެ ދިފާއީ ނިޒާމުން ހުއްޓުވުމަކީ ވެސް މަސްރަހު ގޯސްވި ސަބަބުތަކެވެ. އަދި ހޯމޫޒް ސަރަހައްދުގައި އީރާނުން ތެޔޮ ޓޭންކަރުތަކަށް އަމާޒުކޮށް ހަމަލާދެމުންދާއިރު، ކުވެއިތު ކައިރިން ދަތުރުކުރި އުޅަނދެއްގެ ކައިރީގައި ގޮވުންތަކެއް ހިނގާފައިވާ ކަމުގެ ރިޕޯޓްތައް ވެސް ވަނީ ލިބިފަ އެވެ.
މި ހަމަނުޖެހުންތަކުގެ ސަބަބުން މުޅި ސަރަހައްދުގެ ހަކަތަ ފޯރުކޮށްދިނުމުގެ ނިޒާމަށް ވަނީ ބޮޑެތި ބުރޫތަކެއް އަރާފަ އެވެ.
އެގޮތުން، އިރާގުން ދުވާލަކު އުފައްދާ ތެލުގެ މިންވަރު ގާތްގަނޑަކަށް 1.5 މިލިއަން ފީފާއަށް މަދުކޮށްފައިވާއިރު، އެ ސަރަހައްދުގައި އެންމެ ގިނައިން ގޭސް އުފައްދާ ގައުމު ކަމަށްވާ ގަތަރުން ވަނީ ގޭސް އެކްސްޕޯޓް ކުރުމުގައި ދިމާވެފައިވާ މަޖުބޫރީ ހާލަތުގެ ސަބަބުން ހުރަސްތަކެއް ހުރިކަން އިއުލާނުކޮށްފަ އެވެ. އަދި ސަލާމަތީ ނުރައްކާތަކާ ހުރެ ތެލާއި ގޭސް އުފުލާ 200އެއްހާ އުޅަނދު މިހާރު ވަނީ ގަލްފުގެ ގައުމުތަކުގެ ބޭރުގައި ފުރުމެއް ނެތި މަޑުކުރަން ޖެހިފަ އެވެ.
ވިޔަފާރިވެރިން ލަފާކުރާ ގޮތުގައި، މި ހަމަނުޖެހުންތަކަށް އަވަސް ހައްލެއް ނުލިބި ދިގުލައިގެންދާ ނަމަ، ތެލުގެ އަގު ކުރިއަށް އޮތް ތަނުގައި ވެސް ދާނީ އުފުލެމުންނެވެ.