ވަޠަނީ ޚިދުމަތް، ނުވަތަ ގައުމީ ޚިދުމަތުގައި ބައިވެރިވާ ދަރިވަރުންނަށް، ސަރުކާރުގެ ލޯނު ސްކީމްތަކާއި ވަޒީފާތައް ދިނުމުގައި އިސްކަންދޭން ޖެހޭ ކަމަށް، ކުޑަހުވަދޫ ދާއިރާގެ ޕީއެންސީ މެންބަރު ޙުސައިން ޙަމީދު މިއަދު ވިދާޅުވެއްޖެއެވެ. މިއަދުގެ ޖަލްސާގައި ބަހުސްކުރައްވަމުން ޙަމީދު ވިދާޅުވީ، ވަޠަނީ ޚިދުމަތަކީ ހަމައެކަނި އެމްއެންޑީއެފާއި ފުލުހަށް ރައްޔިތުން ވެއްދުމާއި ސަރުކާރުގެ ޕްރޮޕެގެންޑާ ފެތުރުން ކަމަށް، ބައެއް އާންމުން ހީކުރާ ކަމަށެވެ. ޙަމީދު ވިދާޅުވީ، ދަރިވަރުންގެ މަދަރުސީ ދައުރު ނިމޭއިރު ތިބެނީ މުޖުތަމައަށް ފައްކާނުވެ ކަމަށެވެ. އެހެންކަމުން ސަރުކާރުން ވަޠަނީ ޚިދުމަތުގެ ބިލު ތައާރަފްކުރީ މަދަރުސީ ދައުރު ނިމުމަށްފަހު، މަތީ ތައުލީމު ހާސިލްކުރަން، ނުވަތަ ވަޒީފާއަކަށް ދާން ދަރިވަރުން ފެށުމުގެ ކުރިން އެ މުއްދަތުގައި ދަރިވަރުންނަށް "ގެއްލޭ ބައި" ހޯދައިިދިނުމުގެ ބޭނުމުގައި ކަމަށް، އޭނާ ވިދާޅުވިއެވެ. "އަޅުގަނޑުމެންގެ ސްކޫލު ނިންމާ ދަރިވަރުންގެ ތެރޭގައި އަޅުގަނޑު ހިތަށް އަރަނީ ކިތައް ދަރިވަރުންނަށްތޯއޭ އަޅުގަނޑުމެން މި މުޖުތަމައުގައި ހުރި ކަންކަން އެނގެނީ، ބައެއް އިއްޒަތްތެރި މެންބަރުން ފާހަގަކުރެއްވި ގޮތަށް، ދިވެހިރާއްޖޭގައި އޮންނަނީ ކިތައް ފަޅުރަށްކަން އެނގެނީ ކިތައް ދަރިވަރުންނަށްތޯއޭ، ދިވެހިރާއްޖޭގެ މައިގަނޑު މަސައްކަތަކީ ކޮންއެއްޗެއްކަން ކިތައް ދަރިވަރުންނަށްތޯއޭ އެނގެނީ،" ޙަމީދު ވިދާޅުވިއެވެ. އަޅުގަނޑުމެން ދިވެހީން ކުރަމުން އައި އެތައް މަސައްކަތެއް އަޅުގަނޑުމެން މިހެން ޣާފިލުވެ މިފަދަ ޕްރޮގްރާމުތައް ނުހިންގި، ދިގު ޒަމާންތަކެއް ވެގެން ދިއުމުގެ ނަތީޖާއަކީ މިއަދު އަޅުގަނޑުމެން ދިވެހީންގެ ތެރޭގައި ރާނަން އެނގޭ މީހަކު ނެތް، އަޅުގަނޑުމެން ދިވެހީންގެ ތެރޭގައި ވަޑާންކުރަން އެނގޭ މީހަކު ނެތް، އަޅުގަނޑުމެން ދިވެހީންގެ ތެރޭގައި ވެލްޑިންކުރަން އެނގޭ މީހަކު ނެތް، އަޅުގަނޑުމެން ދިވެހީންގެ ތެރޭގައި އިންޖީނު މަސައްކަތްކުރަން އެނގޭ މީހަކު ނެތް،ޙުސައިން ޙަމީދު - ކުޑަހުވަދޫ ދާއިރާގެ މެންބަރު ޙަމީދު ވިދާޅުވީ، ވަޠަނީ ޚިދުމަތުގެ ޕްރޮގްރާމް ސްކޫލު ނިންމާ ކޮންމެ ދަރިވަރަކަށް މަޖުބޫރުކުރަންޖެހޭ ކަމަށާއި، އެއީ ދަރިވަރުންނާއި ޒުވާނުން ނުރަނގަޅު އާދަތަކުން މިންޖުކުރުވަން ކަމަށެވެ. އެ ޕްރޮގްރާމު އެއް އަހަރަށް ފުޅާކޮށް، ކޮންމެ ދަރިވަރަކަށް ދިރިއުޅުމުގެ އަސާސީ ހުނަރުތައް އެނގޭ ވަރަށް ޕްރޮގްރާމު ފުޅާކުރަންޖެހޭ ކަމަށް އޭނާ ގަބޫލުކުރައްވައެވެ. "އަދި ހަމަ މިއާއެކު، މި ޕްރޮގްރާމު ފުރިހަމަކުރާ ދަރިވަރުންނަށް ސަރުކާރުން ފަރުމާކުރާ ލޯނު ސްކީމްތަކާއި ސަރުކާރުން ދޭ ވަޒީފާތަކަށް ވެސް ޚާއްސަ އިސްކަމެއް އެބަ ދޭން ޖެހޭ،" ޙަމީދު ވިދާޅުވިއެވެ. މިދިޔަ ފެބްރުވަރީ މަހުގެ އަށްވަނަ ދުވަހު ހުށަހެޅި ވަޠަނީ ޚިދުމަތުގެ ބިލުގެ ބޭނުމަކީ ދައުލަތުގެ ޔުނިފޯމު އެޅި ޚިދުމަތްތަކުގައި، އަދި ޚާއްސަކޮށް އެނޫން އެކި ދާއިރާތަކުގައި ޚިދުމަތްކުރަން އެދޭ ޒުވާނުންނަށް އެ ފުރުސަތު ފަހިކޮށްދީ، ޒުވާނުން ބާރުވެރިކުރުވައި، ގައުމަށާއި މުޖުތަމައަށް ފައިދާ ހުރި ޖީލެއް ބިނާކުރުން ކަމަށް، ސަރުކާރުން ބުންޏެވެ. މި ބިލުގެ މަގުސަދެއް ކަމަށް އޮތީ، ވަޠަނީ ޚިދުމަތުގެ ޕްރޮގްރާމެއް ތައާރަފްކޮށް، އެ ޕްރޮގްރާމްގެ މައިގަނޑު އަސާސްތައް ކަނޑައަޅައި، ޕްރޮގްރާމްގެ ދަށުން ތަމްރީނާއި ތައުލީމާއި ތަޖުރިބާ ފޯރުކޮށްދިނުމުގެ އުސޫލު ބަޔާންކޮށްދިނުމެވެ. މި ޕްރޮގްރާމްގައި ބައިވެރިވެވޭނީ އުމުރުން 16 އަހަރާއި 28 އަހަރާ ދެމެދުގެ ދިވެހީންނަށެވެ. ސޯޅަ އަހަރު ފުރި 18 އަހަރުނުވާ ދަރިވަރުން ބައިވެރިވާން އެދޭ ނަމަ، ދަރިވަރު ބެލެނިވެރިއެއްގެ ހުއްދަ ހޯދަން ޖެހޭނެ ކަމަށް، ބިލުގައިވެއެވެ. އަދި އެ ޕްރޮގްރާމްގައި ބައިވެރިވާން އެދޭ ދަރިވަރު އެކަމަށް އެދި ހުށަހަޅަން ޖެހޭނީ އަމިއްލަ އިޚްތިޔާރުގައި ކަމަށްވެސް، ބިލުގައިވެއެވެ. މި ބިލުގައިވާ ގޮތުން، ވަޠަނީ ޚިދުމަތުގެ ޕްރޮގްރާމުގައި ބައިވެރިވާން އެދި ކުރިމަތިލާ ދަރިވަރުންނަށް ޕްރޮގްރާމްގައި ބައިވެރިވެވޭކަން ކަނޑައެޅޭނީ، މެޑިކަލް އެސެސްމަންޓުން ދަރިވަރުން ފާސްވެއްޖެ ނަމައެވެ. މި ޕްރޮގްރާމްގައި ބައިވެރިވާ ދަރިވަރުންގެ ކެއުންބުއިމާއި ބޭސްފަރުވާއާއި ހުރުމުގެ ޚަރަދުތައް ހަމަޖައްސައިދޭނީ ކަމާބެހޭ މިނިސްޓްރީންނެވެ. ދިވެހިރާއްޖޭގެ ގައުމީ ޚިދުމަތުގެ ޕްރޮގްރާމަކީ، ރައީސް ޑރ. މުޙައްމަދު މުއިއްޒުގެ ޚާއްސަ އިސްނެންގެވުމެކެވެ. މި ޕްރޮގްރާމުގެ ސަބަބުން، ތަމްރީނާއި ތަރުބިއްޔަތު ލިބިފައިވާ ހަރުދަނާ ޒުވާން ޖީލެއް ބިނާކުރުމަކީ ސަރުކާރުގެ މުހިންމު ސިޔާސަތެއް ކަމަށް ރައީސް އޮފީހުން ބުނެއެވެ.