އުމްރާނީ ތަރައްގީ އާއި އިގްތިސާދީ މަޝްރޫއުތަކަށް އިންވެސްޓްކުރުމަށް ސަރުކާރުން އުފައްދާފައިވާ ހާއްސަ ބޭންކް، ޑިވެލޮޕްމަންޓް ބޭންކް އޮފް މޯލްޑިވްސް (ޑީބީއެމް)އަށް ފުރަތަމަ އަހަރު ވެސް 2.3 މިލިއަން ރުފިޔާގެ ގެއްލުމެއް ވެފައިވާ ކަމަށް އޮޑިޓާ ޖެނެރަލްގެ އޮފީހުން އާންމުކޮށްފައިވާ އެ ބޭންކުގެ 2024ވަނަ އަަހަރުގެ އޮޑިޓް ރިޕޯޓުން ދައްކައިފި އެވެ. 
ވީ ކިހިނެއް؟ - 21 ޖުލައި 2024އިން 31 ޑިސެމްބަރު 2024ގެ ނިޔަލަށް އެ ބޭންކް އޮޑިޓް ކުރުމަށް ފަހު އޮޑިޓް އޮފީހުން އާންމުކޮށްފައިވާ ރިޕޯޓްގައިވާ ގޮތުން:  
އެ މުއްދަތުގައި ބޭންކުގެ މައިގަނޑު ވިޔަފާރީގެ އެއްވެސް ހަރަކާތެއް ފަށާފައެއް ނުވޭ. 
 އޭރު ބޭންކަށް އެއްވެސް އާމްދަނީއެއް ލިބިފައިނުވާއިރު، ގެއްލުން ވެފައިވަނީ ބޭންކު އުފެއްދުމާއި އިދާރީ ގޮތުން ހިންގުމަށް ކޮށްފައިވާ ހަރަދުތަކުގެ ސަބަބުން
ތަފްސީލް - އޮޑިޓް ރިޕޯޓުން ދައްކާގޮތުގައި ޓެކުހަށް ކެނޑުމުގެ ކުރިން ބޭންކަށް ވަނީ 3 މިލިއަން ރުފިޔާގެ ގެއްލުމެއް ވެފަ އެވެ. ޓެކްސް ކްރެޑިޓްގެ 754،601ރ. ހިމެނޭ ގޮތުން ސާފު ގެއްލުމުގެ ގޮތުގައި:
ހިސާބުތަކުން ދައްކަނީ 2.3 މިލިއަން ރުފިޔާ
ބޭންކުން ކޮށްފައިވާ މައިގަނޑު ހަރަދުތަކުގެ ތެރޭގައި ހިމެނެނީ:
މުވައްޒަފުންގެ ހަރަދު: މުވައްޒަފުންގެ މުސާރަ އާއި އިނާޔަތްތަކަށް 909،763ރ. ހަރަދުވެފައިވޭ. 
އޮފީސް ކުލި: ޑީބީއެމްގެ އެންމެ ބޮޑު ހަރަދަކީ އޮފީސް ކުއްޔެވެ. އެގޮތުން ކުލީގެ ގޮތުގައި 1.1 މިލިއަން ރުފިޔާ ހަރަދުވެފައިވޭ. 
ޑިރެކްޓަރުންގެ އުޖޫރަ: ބޯޑު ޑިރެކްޓަރުންގެ މުސާރަ ނުވަތަ އުޖޫރައިގެ ގޮތުގައި 311،300ރ. ވަނީ ހަރަދުކޮށްފައި. 
އެހެނިހެން ހަރަދުތައް: ކަރަންޓު ބިލަށް 340،261ރ. ހަރަދުކޮށްފައިވާއިރު، ދަތުރުފަތުރުގެ ހަރަދަށް 214،483ރ. ހަރަދުވެފައިވޭ. 
ބޭންކުގެ ހިއްސާގެ ރައުސްމާލުގެ ގޮތުގައި 3 މިލިއަން ރުފިޔާ ހުރިއިރު އެ ގެއްލުމާއެކު ބޭންކުގެ ޖުމްލަ އިކުއިޓީ ވަނީ 736،196ރ. އަށް ދަށްވެފަ އެވެ. 
ގުޅުންހުރި - ޑީބީއެމްއަށް ބޭންކިން ވިޔަފާރި ފަށަން ބޭނުންވާ ހުއްދަ، މަރުކަޒީ ބޭންކް އެމްއެމްއޭން ދީފައި ވަނީ މިދިޔަ ޖެނުއަރީ މަހު އެވެ. އެކަމަކު އޭގެ ފަހުން ވެސް އެ ބޭންކުގެ ވިޔަފާރި ފަށާފައެއް ނުވެ އެވެ.