ސްޕޭސްއެކްސް ކުންފުނިން ރެކޯޑު މިންވަރަކަށް ހިއްސާ އާންމުންނަށް ވިއްކަން ނުވަތަ އިނީޝަލް ޕަބްލިކް އޮފަރިން (އައިޕީއޯ) މިއަދު ފަށައި 75 ބިލިއަން ޑޮލަރު ހޯދުމާ ގުޅިގެން އެ ކުންފުނީގެ އަގު 1.77 ޓްރިލިއަން ޑޮލަރަށް އަރައި ދުނިޔޭގެ ފުރަތަމަ ޓްރިލިއަނަރަކަށް އީލޮން މަސްކް ވެއްޖެ އެވެ.
ރޮއިޓާސްގެ ހިސާބުތަކުން ދައްކާ ގޮތުގައި، ސްޕޭސްއެކްސްގެ ހިއްސާ ބާޒާރުގައި މުއާމަލާތް ކުރަން ފެށުމުން މަސްކްގެ މިލްކިއްޔާތު 1.1 ޓްރިލިއަން ޑޮލަރަށް ވުރެ މައްޗަށް އަރާނެ އެވެ. މަސްކްގެ މުއްސަނދިކަމުގެ ބޮޑު ބައެއް ބިނާވެފައިވަނީ މި ކުންފުނީގައި އޭނާ ހިއްސާވާ މިންވަރުގެ މައްޗަށެވެ. މި އައިޕީއޯގެ ކުރިން ފޯބްސް އިން އަންދާޒާކޮށްފައިވާ ގޮތުގައި އޭނާގެ މިލްކިއްޔާތަކީ ގާތްގަނޑަކަށް 780 ބިލިއަން ޑޮލަރެވެ.
މި ތާރީހީ ކުރިއެރުމުން ހާމަވަނީ، ކުންފުނި ހިންގުމުގެ ނިޒާމާއި މަސްކްގެ ސިޔާސީ ހަރަކާތްތަކުގެ އިތުރުން ކުންފުނީގެ އަގު އިންތިހާއަށް މަތިވުމާ މެދު ބައެއް ފަރާތްތަކުން ކަންބޮޑުވުން ފާޅުކުރި ނަމަވެސް، އޭނާގެ ވިޔަފާރިތަކަށް އިންވެސްޓަރުން ކުރާ އިތުބާރު ދެމިއޮތް ކަމެވެ. އެނަލިސްޓުން ފާހަގަކުރާ ގޮތުގައި ސްޕޭސްއެކްސްގެ އަގު މިހާ ބޮޑަށް އުފުލިފައިވަނީ މާލީ ހިސާބުތަކަށް ވުރެ ބޮޑަށް، މަސްކްގެ ދުރުވިސްނުމާއި ތަސައްވުރަށް އޮތް އިތުބާރެއްގެ ސަބަބުންނެވެ.
މެޓް ޑުރޮޓް ވިދާޅުވި ގޮތުގައި، ދުނިޔޭގެ ދެވަނައަށް އެންމެ މުއްސަނދި މީހާގެ މިލްކިއްޔާތު ހުރީ ގާތްގަނޑަކަށް 300 ބިލިއަން ޑޮލަރުގަ އެވެ. އެއީ މާދަމާ މަސްކްގެ މިލްކިއްޔާތު ހުންނާނެ ކަމަށް ބެލެވޭ މިންވަރުގެ ތިންބައިކުޅަ އެއްބަޔަށް ވުރެ ވެސް މަދު އަދަދެކެވެ.
ޓެސްލާ އާއި ސްޕޭސްއެކްސްގެ ކާމިޔާބީއާ އެކު ދުނިޔޭގެ ސަމާލުކަން ހޯދި މަސްކް ވަނީ 2022 ވަނަ އަހަރު 'އެކްސް' (ކުރީގެ ޓްވިޓާ) ބައްލަވައިގަނެ، އޭނާގެ ނުފޫޒު އިތުރަށް ފުޅާކުރައްވާފަ އެވެ.
އޭނާއަށް ތާއީދުކުރާ ފަރާތްތަކުން ގަބޫލުކުރާ ގޮތުގައި އޭނާ ވަނީ އިލެކްޓްރިކް އުޅަނދުތަކާއި ޖައްވާ ބެހޭ ޓެކްނޮލޮޖީގެ ސިނާއަތަށް އިންގިލާބީ ބަދަލުތަކެއް ގެންނަވާފަ އެވެ.
ނަމަވެސް ފާޑުކިޔާ ފަރާތްތަކުން ބުނަނީ އޭނާގެ ނުފޫޒު ގަދަވުމުގެ ސަބަބުން ވިޔަފާރި އާއި ސިޔާސީ ކަންކަމުގެ މެދުގައި އޮންނަ ހުދޫދުތައް އޮޅެމުންދާ ކަމަށެވެ.
ބާޒާރުގެ ތަޖުރިބާކާރުން މިހާރު ބޭނުންކުރާ "އީލޮން ޕްރީމިއަމް"އަކީ މަސްކްގެ ނަމާ ގުޅިފައިވާ ކުންފުނިތަކުގެ އަގު އާދަޔާ ހިލާފަށް މަތިވާ މަތިވުމަށް ނިސްބަތްކޮށް ކިޔާ ނަމެކެވެ. މެޓް ކެނެޑީ ވިދާޅުވި ގޮތުގައި، ޓެސްލާއެކޭ އެއްފަދައިން ސްޕޭސްއެކްސްއަކީ ވެސް ސީދާ އީލޮން މަސްކަށް ކުރާ އިތުބާރެއްގެ މައްޗަށް ބިނާވެފައިވާ ކުންފުންޏެކެވެ.
ކުންފުނިތަކުގެ އަގު މިހާ ބޮޑުވުމަކީ ހަމަޖެހޭ ކަމެއްތޯ ބައެއް ފަރާތްތަކުން ސުވާލު އުފެއްދި ނަމަވެސް، އިންވެސްޓަރުން ދަނީ ޖައްވުގެ ދަތުރުފަތުރާއި އާޓިފިޝަލް އިންޓެލިޖެންސް އަދި އާދަޔާ ހިލާފު ޓެކްނޮލޮޖީތަކަށް މަސްކް ކުރައްވާ އުންމީދުތަކަށް އެއްބާރުލުން ދެމުންނެވެ. މިއާ އެކު، އޭނާ ވެފައިވަނީ ޒަމާނީ ތާރީހުގައި ދުނިޔެ ދުށް އެންމެ މުއްސަނދި ޝަޚުސިއްޔަތަށެވެ.