ރައްޔިތުންގެ މަޖިލީހުގެ ދިއްދޫ ދާއިރާގެ މެމްބަރު އަހުމަދު ސަމީރު ދިރިއުޅުއްވާ ގޭގެ ދޮރެއް ހަލާކުކޮށްލައިގެން އެގެއަށް ވަދެ ވައްކަން ކޮށްފިއެވެ. ސީއެންއެމަށް މައުލޫމާތު ލިބިފައިވާ ގޮތުގައި ސަމީރު ދިރިއުޅުއްވާ ގޭގެ ދޮރު ހަލާކުކޮށްލައިގެން އެގެއަށް ވަދެފައިވަނީ މިއަދު ހެނދުނު 8:30 އާއި އެކެއް ޖެހުމާއި ދޭތެރޭގެ ވަގުތެއްގައެވެ.
ގެއަށް ވަދެފައިވަނީ އެގޭގެ ފަހަތުގައި ލަކުޑި ދޮރެއް ފަޅާލައިގެންނެވެ.
ސީއެންއެމަށް މައުލޫމާތު ލިބިފައިވާ ގޮތުގައި 500 ޖީބީގެ ހާޑް ޑްރައިވެއްގެ އިތުރުން އައިފޯނުތަކަކާއި ކެބިން ދަބަހެއްގެ އިތުރުން ބައެއް އެހެނިހެން ތަކެތި ވެސްވަނީ ގެންގޮސްފައެވެ.
ސަމީރު ދިރިއުޅުއްވާ ގެއިން ގެންދިޔަ ބައެއް ތަކެތި އެގޭގެ ޖެހިގެން ހުރި ބައިގައި ދެބުރިއަށް ހަދަމުން ދިޔަ އިމާރާތެއްގެ ތެރެއިންވަނީ ފެނިފައެވެ.
ދިއްދޫ ދާއިރާގެ މެމްބަރު ސަމީރުގެ ގެއަށް މީގެ ކުރިން ވެސްވަނީ ވަގަށް ވަދެ ގެއްލުންތަކެއްދީފައެވެ. އެފަހަރު ވެސް ހާޑް ޑްރައިވެއްވަނީ ގެންގޮސްފައެވެ.
އެމައްސަލަ ފުލުހުން މިހާރުދަނީ ބަލަމުންނެވެ.
ދިއްދޫ ދާއިރާގެ މެމްބަރު ސަމީރު ދިރިއުޅުއްވާ ގެއަށް ވަދެ އެތަނުން ވައްކަން ކޮށްފައިވާ އިރު މިމަހުގެ އެއްވަނަ ދުވަހުގެ ރޭވަނީ އުނގޫފާރު ދާއިރާގެ މެމްބަރު ޑރ.އަފްރާޝީމު އަލީއަށް ރަހުމު ކުޑަ ހަމަލާތަކެއްދީ އަވަހާރަކޮށްލާފައެވެ.