ރާއްޖޭގައި ބާއްވަން ތައްޔާރުވާ 20 އަހަރުންދަަށުގެ ސާފް ޗެމްޕިއަންޝިޕު ފުޓުބޯޅަ މުބާރާތުގައި ވާދަކުރާ ރާއްޖޭގެ ގައުމީ ޓީމު އިތުރު ތަމްރީނުތަކަށް މިއަދު ހެނދުނު ސިންގަޕޫރަށް ފުރައިފިއެވެ. މާލޭގައި މުބާރާތް ބާއްވަނީ މިމަހުގެ 23 އިން އޭޕްރީލް ތިނެއްގެ ނިޔަލަށެވެ. މުބާރާތަށް ތައްޔާރުވުމުގެ ގޮތުން ސިންގަޕޫރުގައި މި ކޭމްޕު ކުރިއަށްދާނީ ހަފްތާއެއްހާ ދުވަހަށެވެ. މި ކޭމްޕަކީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އެދުމަށް ސިންގަޕޫރުގެ ފުޓުބޯޅަ އެފްއޭއިން އިންތިޒާމުކޮށްދިން ޓްރެއިނިން ކޭމްޕެކެވެ. ސިންގަޕޫރުގެ ޓްރެއިނިން ކޭމްޕަށް ފުރުމުގެ ކުރިން ރާއްޖޭގެ 20 އަހަރުން ދަށުގެ ގައުމީ ފުޓުބޯޅަ ޓީމު-- ފޮޓޯ: އެފްއޭއެމް ޓީީމުގެ ހެޑު ކޯޗެއްގެ ގޮތުގައި ހަރަކާތްތެރިވާނީ ސީނިއާ ގައުމީ ފުޓުބޯޅަ ޓީމުގެ ހެޑު ކޯޗު އަދި އެފްއޭއެމުގެ ޓެކްނިކަލް ޑިރެކްޓަރުގެ މަގާމު އަދާކުރަަމުން އަންނަ ހަންގޭރީގެ އިސްޓަވާން އުރުބާނީއެވެ. އެކުވެރިކަމުގެ ދެ މެޗު މި ދަތުރުގައި ގައުމީ ޓީމުން ކުޅޭނެއެވެ. އެއީ ސިންގަޕޫރުގެ 19 އަހަރުން ދަށުގެ ޓީމާ ދެކޮޅަށް ކުޅޭ ދެ މެޗެވެ. މި ދެެ މެޗު ކުޅުމަށް ތާވަލުކޮށްފައިވަނީ އަންނަ އާދީއްތަ ދުވަހާއި ބުދަ ދުވަހުއެވެ. ސީނިއާ ގައުމީ ފުޓުބޯޅަ ޓީމުގެ ހެޑު ކޯޗު އަދި އެފްއޭއެމުގެ ޓެކްނިކަލް ޑިރެކްޓަރު އިސްޓަވާން އުރުބާނީ-- ފޮޓޯ: އެފްއޭއެމް ކޭމްޕަށްފަހު ޓީމު އެނބުރި މާލެ އައުމަށް ހަމަޖެހިފައިވަނީ މިމަހުގެ 12 ވަނަ ދުވަހުގައެވެ. މިއީ ސަރަހައްދީ ފެންވަރުގެ އުމުރުފުރާ ބޮޑު ފުޓުބޯޅަ މުބާރާތެއް ރާއްޖޭގައި ބާއްވާ ފުރަތަމަ ފަހަރެވެ. ދެ ގްރޫޕަކަށް ބަހާލައިގެން ކުޅޭ މި މުބާރާތުގައި ރާއްޖެ ހިމެނެނީ ގްްރޫޕް އޭގައެވެ. މި ގްރޫޕުގައި ދެން ހިމެނޭ ޓީމުތަކަކީ ބޫޓާނާއި ނޭޕާލުގެ އިތުރުން ސްރީ ލަންކާއެވެ. ގްރޫޕް ބީގައި ހިމެނޭ ޓީމުތަކަކީ އިންޑިއާއާއި ބަންގްލަދޭޝްގެ އިތުރުން ޕާކިސްތާނެވެ