ޕޮލިސް އިންޓެގްރިޓީ ކޮމިޝަން (ޕީއައިސީ) އިން ހުސްވެފައިވާ މެމްބަރުކަމުގެ މަގާމަށް ކުރީގެ ޑެޕިއުޓީ ކޮމިޝަނަރު އޮފް ޕޮލިސް މުހަންމަދު ރިޝްވާން އައްޔަންކުރެއްވުމަށް ރައްޔިތުންގެ މަޖިލީހަށް ރައީސުލްޖުމްހޫރިއްޔާ ޑރ. މުހަންމަދު ވަހީދު މިއަދު ފޮނުއްވައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އަމީން އާންމު އަހުމަދު މުހައްމަދު ރައީސުލްޖުމްހޫރިއްޔާގެ ސިޓީފުޅު އިއްވަމުން ވިދާޅުވީ ރިޝްވާނަކީ ޕޮލިސް އިންޓެގްރިޓީ ކޮމިޝަނުގެ މެމްބަރުކަމަށް ކުރިމަތިލުމަށް، ފުލުހުންގެ ގާނޫނުގައިވާ ގޮތުގެ މަތިން އާންމުކޮށް ހުޅުވާލުމުން އެކަމަށް އިޖާބަ ދެއްވި ބޭފުޅެއް ކަމަށެވެ.
އަދި އެނަން ދިރާސާ ކުރުމަށް މިނިވަން މުއައްސަސާތަކާއި ބެހޭ ކޮމިޓީއަށް ވެސްވަނީ ފޮނުވާފައެވެ.
ޕޮލިސް އިންޓެގްރިޓީ ކޮމިޝަންގެ މެމްބަރުކަމުގެ ގޮނޑިއެއް ހުސްވީ އެ ކޮމިޝަންގެ ރައީސްގެ މަގާމުގައި ހުންނެވި ޝަހިންދާ އިސްމާއީލް އޮކްޓޫބަރު 7 ގައި އިސްތިއުފާ ދެއްވުމުންނެވެ.
ސިފައިންގޭގައި 10 އަހަރު އަދި ފުލުހުންގެ އިދާރާ ގައި އަށް އަހަރު ހިދުމަތް ކުރެއްވުމަށް ފަހު ރިޝްވާން ހިދުމަތުން ރިޓަޔާ ކުރައްވާފައި ވަނީ ޖުލައި 2011 ގަ އެވެ. އޭނާ ވިދާޅުވެފައި ވަނީ ފުލުހުންގެ ހިދުމަތުން ވަކިވެވަޑައިގަތީ "އަމިއްލަ މަސައްކަތްތަކުގައި އުޅެލަން ވެގެން" ކަމަށެވެ.