ކުރިޔަށް އޮތް ފަސް އަހަރު ދުވަހުގެ ތެރޭގައި އިތުރު 15،000 ޒުވާނުންނަށް ވަޒީފާގެ ފުރުސަތު ހޯދައިދޭނެ ކަމަށް ޑީއާރުޕީގެ ރިޔާސީ ކެންޑިޑޭޓް އަލްއުސްތާޒު މައުމޫނު އަބްދުލް ގައްޔޫމް ވިދާޅުވެއްޖެ އެވެ.
ޑީއާރުޕީގެ ޒައީމް މިހެން ވިދާޅުވީ ފުވައްމުލަކުގައި ތިބި ޑީއާރުޕީގެ ސަޕޯޓަރުންނާ ބައްދަލުކުރައްވައި ކުރިޔަށް އޮތް ފަސް އަހަރު ދުވަހަށް އެމަނިކުފާނު ރައީސްކަމަށް ހޮއްވަވައިފި ނަމަ ކޮށްދެއްވާނެ ކަންތައްތަކާ ބެހޭ ގޮތުން ބުރާސްފަތި ދުވަހުގެ ރޭ ފުވައްމުލަކު ހާފިޒު އަހުމަދު ސްކޫލުގައި ވާހަކަފުޅު ދައްކަވަމުންނެވެ.
މައުމޫން ވިދާޅުވީ ދިވެހި ޒުވާނުންނަކީ ތައުލީމަށާއި ކުރިއެރުމަށް ލޯބިކުރާ ބައެއް ކަމަށާއި ވަޒީފާ އަކީ ވަރަށް މުހިއްމު އެއްޗެއް ކަމަށެވެ. އަދި ކޮންމެ މީހެއްގެ ވެސް އާމްދަނީ ބިނާވަނީ އެ މީހަކު އަދާކުރާ ވަޒީފާއެއްގެ މައްޗަށް ކަމަށް ވެސް މައުމޫން ވިދާޅުވި އެވެ. އަދި ވިދާޅުވީ ސަރުކާރުން މިހާރު ވެސް ޒުވާނުންނަށް ވަޒީފާގެ ފުރުސަތު ހޯދައިދިނުމަށް ދޭ އަހައްމިއްޔަތު ހަރުދަނާ ކުރައްވާނެ ކަމަށެވެ.
އެމަނިކުފާނުގެ މެނިފެސްޓޯގައި ހިމަނުއްވާފައިވާ އެހެން ބައެއް ކަންތައްތަކާ ބެހޭ ގޮތުން ވެސް އެ ޖަލްސާގައި ވާހަކަ ދެއްކެވި އެވެ. މި ޖަލްސާގައި މައުމޫންގެ އިތުރުން އޭނާގެ ރަނިންމޭޓް އަހުމަދު ތަސްމީން އަލީ ވެސް ވާހަކަ ދެއްކެވި އެވެ.
މިޖަލްސާގައި ޑީއާރުޕީގެ ވަރަށް ގިނަ އަދަދެއްގެ މެންބަރުންނާއި ޑީއާރުޕީ އަށް ސަޕޯޓުކުރާ ވަރަށް ގިނަ ރައްޔިތުން ބައިވެރިވި އެވެ.