ސަރުކާރު ހަމަމަގަށް އަޅުވައި ޒިންމާދާރުކުރުވުގެ މަސައްކަތް އިތުރުކޮށް ފުޅާކުރުމުގެ ގޮތުން، މަސައްކަތް ކުރުމަށް އެއްބަސްވާ ހުރިހާ ސިޔާސީ ޕާޓީތަކާއި ޖަމިއްޔާ ޖަމާއަތްތަކާ އެކު އެއްބަސްވެވޭ ހަމަތަކެއްގެ މަތިން މަސައްކަތްކުރުމަށް ދަ ޑިމޮކްރެޓްސް އިން ނިންމައިފި އެވެ.
އެ އެ ޕާޓީން އެގޮތަށް ނިންމީ މިދިޔ ބުރާސްފަތި ދުވަހު ބޭއްވި ޕާޓީގެ ނެޝަނަލް އެސެމްބްލީގެ 11 ވަނަ ބައްދަލުވުމުން ފާސްކުރެވުނު ގަރާރަކުންނެވެ.
އެ ގަރާރުގައި ބުނެފައި ވަނީ ޑިމޮކްރެކްޓްސް އަކީ އިދިިކޮޅުގައި އޮތް ޕާޓީއަކަށްވުމާ އެކު، މިހާރުގެ ސަރުކާރުން ގަސްތުގަ އާއި އިހުމާލުން ރައްޔިތުންނަށާއި ގައުމަށް ބޭއިންސާފުވެ ގެއްލުން ބޮޑު އެތައް ކަމެއް ތަކުރާރުކޮށް ކުރަމުން ގެންދާ ކަމަށެވެ.
މީގެއިތުރުން، ގަރާރުގައި ފާހަގަކޮށްފައިވާ ގޮތުގައި ސަރުކާރުން ދަނީ ގާނޫނު އަސާސީއިން ތަރުތީބުކޮށްފައިވާ ޑިމޮކްރެޓިކް ނިޒާމު ބަލިކަށިކޮށް، ދައުލަތުގެ މުވައްސަސާތައް ރައީސުލްޖުމްހޫރިއްޔާއަށް ކޮންޓްރޯލް ލިބޭ ގޮތަށް ބަދަލުކޮށް، ރައްޔިތުންގެ ބާރުވެރިކަން ގެއްލޭ ގޮތަށް ގާނޫނު އަސާސީއަށް ކުއްލި ބޮޑެތި ބަދަލުތައް ގެނެސް، ސަރުކާރު ޖަވާބުދާރީ ކުރުމުގެ ދޮރުތައް ބަންދުކުރަމުންނެވެ.
ސަރުކާރު ޒިމްދާރު ކުރުވުމަށް އެހެން ޕާޓީތަކާ ގުޅުމަށް ޑިމޮކްރެޓްސްއިން ނިންމި ނަމަވެސް, މުއިއްޒު ކުރަމުންދާހާ ވައްކަންތަކަށް އެ ޕާޓީގެ ބާނީ އަދި ކުރީގެ ރައީސް މުހައްމަދު ނަޝީދު އަދިވެސް ހުންނެވީ ދެލޯ މަރާލައިގެންނެވެ. އެގޮތުން މުއިއްޒުއާއި ގުޅިގެން, އެޗްޑީސީގެ އެމްޑީ ފަޒުލް ރަޝީދު ވަގަށް އެތައް ބަޔަކަށް ހުޅުމާލެއިން ގޯތި ކަނޑާ ދިންއިރުވެސް މި ބޮޑު ކޮރަޕްޝަނާއި ގުޅިގެން ނަޝީދު އަދި މިހާތަނަށް ޓުވީޓެއްހާ މިންވަރުވެސް ކޮށްފައެއް ނުވެއެވެ.
ކޮރަޕްޝަނާއި ފަސާދައާއި ދެކޮޅު, އަދި އަބަދުވެސް ތާހިރު ސަރުކާރެއް ހިންގުމަށް ވަކާލާތު ކުރައްވާކަމަށް ވިދާޅުވާ ނަޝީދަށް, މުއިއްޒުގެ ސަރުކާރުން ކުރަމުންދާހާ ވައްކަމާއި ކޮރަޕްޝަންގެ އަމަލުތައް އެއީ ނުތާހިރު އަމަލުތަކެއްގެ ގޮތުގައި ސިފަ ވަމުން ނުދާތީ ގިނަ ބަޔަކު ދަނީ އެކަމާ ސުވާލު އުފައްދަމުންނެވެ.
ބެލެވޭ ގޮތުގައި ނަޝީދު އަދިވެސް މަސައްކަތް ކުރައްވަމުން ގެންދަވަނީ ދެފަޅިންވެސް ފަރިއްކުޅުއްވޭތޯއެވެ. އެގޮތުން ނަޝީދު ބޭރު ދުނިޔޭގެ ބައެއް އެވޯޑުތަކަށް ކުރިމަތިލާން ބޭނުންވާތީ މިސަރުކާރުގެ ރުހުން ހޯދަން ބޭނުންވާއިރު, ދެން އަންނަ ރިޔާސީ އިންތިޚާބުގައި އެމްޑީޕީގެ ޓިކެޓްގައި ނުވަތަ އެޕާޓީގެ ތާއީދާއެކު ވެރިކަމަށް ވަޑައިގެންނެވޭތޯ މަގެއް ހޯއްދަވަން ބޭނުންވާކަމަށްވެސް ނަޝީދުގެ އަރިސް ބައެއް ފަރާތްތަކުން ވިދާޅުވެއެވެ.
ނަޝީދު ފާހަގަ ވެފައިވަނީ, ސިޔާސީ މަންފާ ހާސިލްކުރުމަށް އަމިއްލަ އެދުން އިސްކުރައްވާ ބޭފުޅެއްގެ ގޮތުގައެވެ.