ޔާމީން ރަޝީދަށް، އިންސާފު ހޯދައިދިނުމަށް ގޮވާލައި ސ.ފޭދޫގައި މިއަދު ހަވީރު އިހުތިޖާޖުކޮށްފިއެވެ.
ރޭ ދަންވަރު ތޫނު އެއްޗަކުން ހަމަލާދީ ރަޙުމް ކުޑަގޮތަކަށް، މަރާލާފައި އޮއްވާ ފެނުނު ސޯޝަލް މީޑިޔާ އެކްޓިވިސްޓް އަދި ބްލޮގަރ، ޔާމީން ރަޝީދަށް، އިންސާފު ހޯދައިދިނުމަށް ގޮވާލައި، ސ.ފޭދޫގައި ކުރި އިހްތިޖާޖުގައި ގިނައިން ބައިވެރިވެފައި ވަނީ ޒުވާނުންނެވެ. އުމުރުން 29 އަހަރުގެ ޔާމީންއަކީ، ސ.ފޭދޫއަށް ނިސްބަތްވާ ޒުވާނެކެވެ.
މޯލްޑިވްސް ސްޓޮކް އެކްސްޗޭންޖުގައި ވަޒީފާ އަދާކުރަމުން ދިޔަ ޔާމިންގެ މަރާއި ގުޅިގެން، ފުލުހުން ޚާއްސަ ޓީމަކުން ތަހުގީގެއް ކުރިއަށް ގެންދާއިރު ސަރުކާރުންވަނީ އެކަން ހަރުކަށި އިބާރާތުން ކުށްވެރިކޮށްފައެވެ. އަދި ޔާމީނުގެ ޤާތިލުން ހޯދަން ހުރިހާ ވަސީލަތެއްގެވެސް ބޭނުންކުރާނެ ކަމަށް ސަރުކާރުން ވަނީ ބުނެފައެވެ.