ގާނޫނީ ގޮތުން ޑީއާރުޕީގެ މެމްބަރު ކަމުން ވަކިވެފައިވާ ކަމަށް ގަބޫލުކުރައްވާ ކަމަށް ޝަރީއަތުގައި އިއްޔެ ވިދާޅުވެފައި ނުވާނެ ކަމަށް އުމަރު ނަސީރު މިއަދު ވިދާޅުވެއްޖެ އެވެ.
ޑީއާރުޕީގެ އަސާސީ ގަވާއިދުގެ ދަށުން ފުރިހަމަ ކުރަން ޖެހޭ އިންޓާނަލް ރެމެޑީސް ފުރިހަމަ ނުކޮށް ވެސް ކޯޓަށް ހުށަހެޅިދާނެ ކަމަށް ސިވިލް ކޯޓުން ނިންމި ނިންމުން އިސްތިއުނާފުކުރުމަށް ޑީއާރުޕީން ހުށަހެޅި މައްސަލައިގައި ހައި ކޯޓުގައި އިއްޔެ ދެއްކެވި ވާހަކަ އަށް އިޝާރާތްކުރައްވައި އުމަރު ވިދާޅުވީ އެ ޕާޓީން ވަކިކުރީ ގާނޫނީ ހަމަތަކުގެ މަތިން ކަމަށް ގަބޫލުކުރައްވާ ކަމަށް ދޭހަވާ ގޮތަށް ވެސް އެއްވެސް އެއްޗެއް ވިދާޅުވެފައި ނުވާނެ ކަމަށެވެ.
"އަޅުގަނޑު ވަކާލާތުކޮށްފައި ވާނީ ތަސްމީންގެ ޑީއާރުޕީގެ ފަރާތުން އަޅުގަނޑުގެ ނަން އިލެކްޝަންސް ކޮމިޝަން އަށް ފޮނުވާ އެ ކޮމިޝަންގެ ދަފްތަރުން އަޅުގަނޑުގެ ނަން އުނިކޮށްފައި ވާތީ ގާނޫނީ ގޮތުން ބަލާ އިރު ވަކިވެފައިވާ މީހެއް ކަމަށް ޑީއާރުޕީ ދެކޭ މީހެއްގެ މައްސަލަ ދެން އިސްތިއުނާފްކުރެވޭނެ ޑީއާރުޕީގެ ގުނަވަނެއް ނޯންނާނެ ކަން ބުނެދިނުމަށެވެ. އެއްވެސް ހާލެއްގައި ވަކިކުރި ކުރުން އަޅުގަނޑު ގަބޫލުކޮށްފި ކަމަށް ބުނެފައެއް ނުވާނެ އެވެ،" ޑީއާރުޕީގެ ލޯގޯ ޖަހާފައި ޒެޑް-ޑީއާރުޕީގެ އެޑްރެހުގައި ޑެޕިއުޓީ ލީޑަރުގެ ނަމުގައި އުމަރު ސޮއިކުރައްވައި ނެރުއްވި ނޫސް ބަޔާނެއްގައިވެ އެވެ.
އޭނާ އިތުރަށް ވިދާޅުވީ ޑިއާރުޕީގެ "ޑެޕިއުޓީ ލީޑަރުގެ މަގާމް ގާނޫނީ ހަމަތަކުގެ ތެރެއިން އަނބުރާ ހޯދުމަށް" ކުރައްވަމުން ގެންދަވާ މަސައްކަތް "ﷲގެ ވާގިފުޅާ އެކު ކާމިޔާބުކުރާނެ ކަމުގެ ޔަގީންކަން" ޑީއާރުޕީގެ މެމްބަރުންނަށް ދެއްވާ ކަމަށެވެ.