މއ. މާންދޫގޭދެކުނުގެ އޭނާ އާއެކު ހިއްސާކުރާ އާއިލާގެ އަނެއް ތިން މެމްބަރުންނާ މަޝްވަރާކުރުމަށްފަހު، ޝުޖާއުއަށް ގުޅުއްވީ، ފުލުހުންގެ ތަހުގީގަށް ފަސޭހަކުރުމަށްޓަކައި ކޯޓު އަމުރެއް ފުލުހުން ހޯދަން ނުޖެހޭނެ ކަން ދަންނަވަން.
މާލޭގެ އިމާރާތަކުން އުމުރުން 21 އަހަރުގެ ހައްވާ ޔުމްނު ރަޝީދު ވެއްޓުނު ހާދިސާއާ ގުޅިގެން، ފުލުހުން ބޭއްވި ނޫސްވެރިންގެ ބައްދަލުވުމުގައި، ކުރީގެ ޕޮލިސް ކޮމިޝަނަރު އަލީ ޝުޖާއު އަށް ގުޅުއްވީ، ދިރިއުޅުއްވާ މއ. މާންދޫގޭދެކުނުގެ ބަލައި ފާސްކުރަން ކޯޓު އަމުރެއް ހޯދަން ނުޖެހޭނެ ވާހަކަ ދަންނަވަން ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ. 
ޔުމްނު ވެއްޓުނު ހާދިސާ އާ ގުޅިގެން ފުލުހުން ބޭއްވި ނޫސްވެރިންގެ ބައްދަލުވުމުގެ ތެރެއިން، ޝުޖާއުއަށް އަމީން ގުޅުއްވީ، ތަހުގީގަށް ނުފޫޒު ފޯރުވަން ކަމަށް ބައެއް ފަރާތްތަކުން ދަނީ ތުހުމަތުކުރަމުންނެވެ. 
އެކަމާ ގުޅިގެން އަމީން މަގާމުން ވަކިކުރަން އިތުބާރު ނެތް ކަމުގެ މައްސަލައެއް އިދިކޮޅު އެމްޑީޕީން ހުށަހަޅާފައިވާއިރު، އެ މައްސަލައަށް ރައްޔިތުންގެ މަޖިލީހުގައި މިއަދު ޖަވާބުދާރީވެ ވަޑައިގަންނަވަމުން، އަމީން ވަނީ އެ ދުވަހު ޝުޖާއުއަށް ގުޅުއްވި ސަބަބު ސާފުކޮށް ދެއްވައިފަ އެވެ. 
އަމީން ވިދާޅުވީ، މއ. މާންދޫގޭދެކުނުގެ އޭނާ އާއެކު ހިއްސާކުރާ އާއިލާގެ އަނެއް ތިން މެމްބަރުންނާ މަޝްވަރާކުރުމަށްފަހު، ޝުޖާއުއަށް ގުޅުއްވީ، ފުލުހުންގެ ތަހުގީގަށް ފަސޭހަކުރުމަށްޓަކައި ކޯޓު އަމުރެއް ފުލުހުން ހޯދަން ނުޖެހޭނެ ކަން ދަންނަވަން ކަމަށެވެ.
ނަމަވެސް، އެ ދުވަހު ޝުޖާއު ފޯނަށް ޖަވާބު ދެއްވާފައިނުވާ ކަމަށް އަމީން ވިދާޅުވި އެވެ. 
އެމްޑީޕީން ހުށަހެޅި އިތުބާރުނެތް ކަމުގެ މައްސަލާގައިވާ ގޮތުން، އެ ހާދިސާގައި އަމީންގެ އާއިލާ ބަޔަކު ހިމެނޭ ކަމަށާއި އެ ހާދިސާގެ ކުރިން ޒުވާނުންތަކެއް މަސްތުވާތަކެތި ބޭނުންކޮށް ޕާޓީކޮށްފައިވަނީ އަމީން ދިރިއުޅުއްވާ މއ. މާންދޫގޭދެކުނުގައި ކަން ވަނީ ފާހަގަކޮށްފަ އެވެ. ނަމަވެސް، ފުލުހުން އެ މައްސަލާގައި މައުލޫމާތު އާންމު ކުރުމުގައި އެންމެ ފުރަތަމަ މަސައްކަތް ކޮށްފައިވަނީ އެ މި ކަންކަން ސިއްރު ކުރުމަށް ކަމަށާއި އެ ގެ ބަލައި ފާސްކުރުމަށް ހިންގި އޮޕަރޭޝަންގެ މައުލޫމާތު ވެސް ސިއްރުކޮށްފައިވާ ކަމަށް އެމްޑީޕީން ވަނީ ތުހުމަތުކޮށްފަ އެވެ.އެ މައްސަލާގައި ހިމެނޭ އަމީންގެ އާއިލާ ބޭފުޅުން ހިމާޔަތްކޮށް، ޖިނާއީ ހުކުމަކުން ބަރީއަކުރުމަށް މިނިސްޓަރު އަމީން ފުލުހުންގެ އިދާރާއަށް ނުފޫޒު ފޯރުވާފައިވާ ކަން އެ ކަންކަމުން ހާމަވާ ކަމަށާއި، އެއީ މިނިސްޓަރުގެ ހައިސިއްޔަތުން ލިބިގެންވާ ބާރުގެ ނަހަމަ ބޭނުންކޮށް، އަމިއްލަ މަންފާ އާއި މަސްލަހަތު ކުރިއެރުވުމަށް ހިންގޭ ކަންކަން ކަމަށް ވެފައި މިނިސްޓަރު އަމީން ގާނޫނާ ހިލާފުވެފައިވާ ކަމަށް ވެސް އެ މައްސަލާގައިވެ އެވެ.
އެ ތުހުމަތުތަކަށް ވަކިވަކިން ޖަވާބު ދެއްވަމުން، އަމީން މިއަދު ވިދާޅުވި ގޮތުގައި، އެ ގޭގައި މަސްތުވާތަކެތި ބޭނުންކުރި ކަމަށް ތުހުމަތުކުރެވުނަސް އެ ފަދަ އެއްވެސް ނިންމުމެއް ތަހުގީގީ އިދާރާއަކުން ނިންމާފައިނުވެ އެވެ.
އެ ގެއަކީ އޭނާގެ އިތުރުން އެއްބަނޑު އެއްބަފާ އިތުރު ތިން ބޭފުޅުންގެ ގެއެއް ކަމުން، އެ ގޭގައި ކުށެއް ކުރިޔަސް އެ ކަމުގެ ޒިންމާ ވަކި މަގާމެއްގައި ހުންނެވުމުގެ ސަބަބުން އޭނާ ނަގަން ނުޖެހޭނެކަމަށް އަމީން ވިދާޅުވި އެވެ.
"މޯލްޑިވްސް ޕޮލިސް ސާވިސްއަކީ އަޅުގަނޑުގެ ބެލުމުގެ ދަށުގައި ހިންގާ އިދާރާއެއް ނޫން. މިނިސްޓަރެއްގެ ހައިސިއްޔަތުން އަޅުގަނޑު ޖަވާބުދާރީވާ ތަނެއް ވެސް ނޫން،" މިކަމުގައި ނުފޫޒެއް ފޯރުވަންޖެހޭ އެއްވެސް ސަބަބެއް ނެތް ކަން ފާހަގަކުރައްވައި އޭނާ ވިދާޅުވި އެވެ. 
އަދި މިކަމުގައި އެއްވެސް އަސާސެއް ނެތް ނަމަވެސް، އެމްޑީޕީ މެމްބަރުން ކުރާ ތުހުމަތުތަކަށް ބާރު ލިބޭ އެއްވެސް ހެއްކެއް ހުރި ނަމަ، ކަމާބެހޭ އިދާރާތަކަށް ހުށަހެޅުމަށް އަމީން މިއަދު ވަނީ އެދިވަޑަގަންނަވާފަ އެވެ. 
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ