އެކުވެރި ދެ އަންހެނަކު ބާޒާރަށް ގޮސް އުޅުނުރެއެކެވެ. ކޮންމެހެން ގަންނަން ޖެހިފައިހުރި ބައެއް ތަކެތި ގަތުމަށެވެ. 
10 ޖަހަން 15 މިނިޓަށްވީތަނާ އެކަކު ބުނީ މިހިސާބުން ބާޒާރުކޮށް މިރެއަށް ނިމުނީ ކަމަށެވެ. ނުގަނެވިހުރި ތަކެތި ގަންނަން އެހެންރެއަކު އަންނާނީ ކަމަށެވެ. ކުޑައިރުކޮޅަކަށް މަޑުކޮށްނުލައި އަވަހަށް ދާން އުޅޭ ސަބަބާއި ބެހޭގޮތުން ސުވާލުކުރުމުން ބުންޏެވެ. 
"ފިރިމީހާއަށް 10 ޖަހާއިރު ބޭސްކާންދޭން ޖެހޭނެއެވެ." އެކުވެރިޔާ ދިއައީ ސިއްސައިގެންނެވެ. ބުންޏެވެ. "ފިރިމީހާއަށް ފޯނުކޮށްލާފައި ބޭސްކާން ހަނޑދާންކޮށްދޭންވީ ނޫންހެއްޔެވެ؟ އެއީ ގެއަށްދާންޖެހޭވަރުގެ ބޮޑު ކަމެއްޔެވެ؟" 
އަނެކާގެ ޖަވާބު އެނގޭހެއްޔެވެ؟ "އެއަށްވުރެ އަހުރެންނަށް ބޮޑުވާނީ ކޮންކަމެއް ހެއްޔެވެ؟ ކައިވެންޏަށް 15 އަހަރުވީއިރުވެސް އަހުރެންގެ އަތުން ބޭސްގުޅައެއް ކާންޖެހުނު ފަހަރެއް ހަނދާނެއް ނެތެވެ. އޮފީހުގައި ހުރެފައިވެސް ގަޑިއަށް ބޭސްކާންދޭން އަންނާތީ އެގޮތަށް އެކަން ނުކުރަން ބުނުމުން ބުނަނީ ތިބާގެ ފުރާނައަށްވުރެ މުހިންމު ކަމެއް ނެތްކަމަށެވެ. އަމިއްލައަށް ބޭސްކާންޖެހުމުން ތިބާ ފަރުވާކުޑަކޮށްފިނަމަ ލިބިދާނެ ގެއްލުމަކަށް މާދެރަވަމެވެ!"
އެކުވެރިޔާއަށް ބުނާނެ އެއްޗެއްވެސް ނުވިސްނުނެވެ. އެއީ އޭނާގެ ކައިވެންޏަށްވެސް 15 އަހަރުވެފައިވާއިރު އެންމެ ފަހަރަކުވެސް ފިރިމީހާ އޭނާއަށް އެންމެ ބޭސްގުޅައެއްވެސް އެގޮތަށް ކާންނުދޭތީއެވެ. ޑޮކްޓަރަށް ދައްކާ ހިސާބުން ފަރުވާކުރެވުނީކަމަށް ނިންމައިލާތީއެވެ.
 
- މިއަދުނޫސް