އިންޑިއާއިން ނުރައްކާރެތި 'ނިޕާ' ވައިރަސް ހުރި ދެ ކޭސް ފެނުމާ ގުޅިގެން، ޕާކިސްތާނަށް އެތެރެވާ މީހުން މި ބައްޔަށް ސްކްރީން ކުރުމުގެ މަސައްކަތް ފަށައި އެވެ.
އެއާ އެކު، ރައްކާތެރިކަމުގެ ފިޔަވަޅުތައް ވަރުގަދަކުރި އޭޝިއާގެ ގައުމުތަކުގެ ލިސްޓަށް ޕާކިސްތާން މިވަނީ އިތުރުވެފަ އެވެ. ޕާކިސްތާނުގެ އިތުރުން ތައިލެންޑް، ސިންގަޕޫރު، ހޮންކޮންގް، މެލޭޝިއާ، އިންޑޮނޭޝިއާ އަދި ވިއެޓްނާމުން ވެސް ވަނީ އެއާޕޯޓްތަކުގައި ފަސިންޖަރުން ސްކްރީން ކުރަން ފަށާފަ އެވެ.
ނިޕާ ވައިރަހަކީ ގަދަޔަށް ހުން އައުމާއި ސިކުނޑި ދުޅަވުން ފަދަ ނުރައްކާތެރި އަލާމާތްތައް ފެންނަ، މަރުވުމުގެ ފުރުސަތު ބޮޑު ބައްޔެކެވެ. މި ބައްޔަށް މިހާތަނަށް ވެކްސިނެއް އުފެއްދިފައެއް ނުވެ އެވެ.
ނަމަވެސް، މިއީ އެކަކުގެ ގައިން އަނެކެއްގެ ގަޔަށް ފަސޭހައިން ފެތުރޭ ބައްޔެއް ނޫނެވެ. އާންމު ގޮތެއްގައި މި ބަލި ފެތުރެނީ ބަލިޖެހިފައިވާ މީހަކާ ގާތްކޮށް ގިނަ ވަގުތު އުޅެން ޖެހިއްޖެ ހާލަތެއްގަ އެވެ.
ޕާކިސްތާނުގެ ބޯޑަރު ހެލްތު ސާވިސަސް އިން ނެރުނު ބަޔާނެއްގައި ބުނެފައިވަނީ، އެ ގައުމުގެ ބޯޑަރުތަކުގައި ބަލި ފެތުރުން ހުއްޓުވުމަށާއި ބަލި ދެނެގަތުމަށް އަޅާ ފިޔަވަޅުތައް ވަރުގަދަކުރަން މިހާރު މަޖުބޫރުވެފައިވާ ކަމަށެވެ. އެގޮތުން، ބަނދަރުތަކާއި އެއްގަމު ބޯޑަރުތަކާ އަދި އެއާޕޯޓްތަކުން ގައުމަށް އެތެރެވާ އެންމެންގެ ހަށިގަނޑުގެ ހޫނުމިން ބަލައި، ސިއްހީ ގޮތުން އިތުރަށް ބަލަންޖެހޭ ކަންކަން ބަލަމުންދާނެ ކަމަށް އެ އިދާރާއިން ބުނެފައިވެ އެވެ.
މީގެ އިތުރުން، ދަތުރުވެރިން ފާއިތުވި 21 ދުވަހު ދަތުރުކޮށްފައިވާ ގައުމުތަކުގެ ތަފްސީލު ހޯދާނެ ކަމަށާއި އެއީ ނިޕާ ވައިރަސް ފެނިފައިވާ ނުވަތަ ބަލީގެ ނުރައްކާ އޮތް ސަރަހައްދަކަށް އެ މީހުން ދަތުރުކޮށްފައިވޭތޯ ބެލުމަށް ކަމަށް ވެސް އެ އެޖެންސީން ބުންޏެވެ.
ޕާކިސްތާނާއި އިންޑިއާއާ ދެމެދު ސީދާ ފްލައިޓްތައް ނޯންނައިރު، ދެ ގައުމުގެ ދެމެދުގައި ކުރާ ދަތުރުތައް މިހާރު ވަނީ ވަރަށް ބޮޑަށް މަދުކޮށްފަ އެވެ.
ވިއެޓްނާމްގެ ވެރިރަށް ހަނޯއީގެ ހެލްތު ޑިޕާޓްމަންޓުން ވެސް ވަނީ އެ ގައުމުގެ ނޮއި ބައި އެއާޕޯޓަށް އަންނަ ފަސިންޖަރުން ސްކްރީން ކުރުމަށް އަމުރުކޮށްފަ އެވެ. ހާއްސަކޮށް އިންޑިއާއިންނާއި ޑިސެމްބަރު މަހުގެ ފަހުކޮޅު މި ބަލި ފެނުނު ހުޅަނގު ބެންގާލް ސްޓޭޓުން އަންނަ މީހުންނަށް ހާއްސަ ސަމާލުކަމެއް ދިނުމަށް ވަނީ އަންގާފަ އެވެ.
އިންޑިއާގެ ހެލްތު މިނިސްޓްރީން ބުނި ގޮތުގައި، ބަލިޖެހުނު ދެ މީހުންނާ ދިމާވި 196 މީހަކު މިހާރު ވަނީ ދެނެގަނެވިފަ އެވެ. ނަމަވެސް އެއިން އެއްވެސް މީހެއްގެ ކިބައިން ބަލީގެ އަލާމާތެއް ފެނިފައެއް ނުވެ އެވެ.
ނިޕާ ވައިރަހަކީ އާންމުކޮށް ބަލިޖެހިފައިވާ ޖަނަވާރުންގެ ކިބައިން، ހާއްސަކޮށް ވާލުގެ ޒަރީއާއިން އިންސާނުންގެ ގަޔަށް ފެތުރޭ ވައިރަހެކެވެ. ދުނިޔޭގެ ސިއްހަތު ޖަމިއްޔާ (ޑަބްލިއުއެޗުއޯ) އިން ހާމަކުރާ ގޮތުގައި، މި ބަލި ޖެހޭ މީހުންގެ ތެރެއިން %40 އާއި %75އާ ދެމެދުގެ އަދަދަކަށް މީހުން މަރުވުމުގެ ފުރުސަތު އޮވެ އެވެ.
މި ވައިރަސް އެންމެ ފުރަތަމަ ދެނެގަނެވުނީ މީގެ 25 އަހަރު ކުރިން މެލޭޝިއާ އާއި ސިންގަޕޫރުގެ އޫރު ގެންގުޅޭ ފާމްތަކަކުންނެވެ. ނަމަވެސް ސައިންސްވެރިން ގަބޫލުކުރާ ގޮތުގައި، މި ވައިރަސް ވާލުގެ ހަށިގަނޑުގައި ދައުރުވަމުންދާތާ އެތައް ހާސް އަހަރެއް ވެދާނެ އެވެ.