އައްޑޫ ސިޓީ ފޭދޫ ބަނދަރު ތަރައްޤީ ކުރުމުގެ މަޝްރޫޢުގެ މަސައްކަތް މިއަހަރުގެ ފަހުކޮޅު ނިންމުމަށް އަމާޒު ހިފާފައިވާ ކަމަށް އެ މަސައްކަތުގެ ކޮންޓްރެކްޓަރ، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކޮށްފިއެވެ. މި މަޝްރޫޢަކީ ފޭދޫގެ ރައްޔިތުންނަށް ދިމާވެފައިވާ ބަނދަރުގެ ޖާގައިގެ ދަތިކަން ހައްލުކުރުމަށްޓަކައި ސަރުކާރުން ކުރިއަށްގެންދާ މުހިންމު މަޝްރޫޢެކެވެ.
މި މަޝްރޫޢުގެ އަމަލީ މަސައްކަތް ރަސްމީކޮށް ފަށާފައިވަނީ މިދިޔަ ނޮވެންބަރު މަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އައްޑޫ ސިޓީއަށް ކުރެއްވި ދަތުރުފުޅުގެ ތެރެއިން ފޭދޫއަށް ވަޑައިގެންނެވެ. އައްޑޫގެ ގުޅިފައިވާ ރަށްތަކުގެ ތެރެއިން އާބާދީގެ ގޮތުން ބޮޑު ފޭދޫއަކީ ގިނަ އަދަދެއްގެ މުދާ އުފުލާ ދޯނިފަހަރު ބޭނުންކުރާ ބަނދަރެއް އޮންނަ ރަށެކެވެ.
ފޭދޫގައި މިހާރު އޮތް 771 މީޓަރު ދިގު އަދި 157 މީޓަރު ފުޅާ ބަނދަރުގެ ޖާގަ އިތުރުކުރުމުގެ މަސައްކަތުގެ ދަށުން، މިހާރު އޮތް ފަޅަށް 177 މީޓަރު އިތުރުކޮށް، 50 މީޓަރަށް ފުޅާކުރުމަށް ވަނީ ހަމަޖެހިފައެވެ. މީގެ އިތުރުން 177 މީޓަރުގެ ސަރަޙައްދެއްގައި ކީވޯލް ޖެހުމާއި، 516 މީޓަރުގެ ސަރަޙައްދެއްގައި ހިލައިގެ ރިވެންޓްމަންޓް ޖެހުމުގެ މަސައްކަތް ހިމެނެއެވެ.
އެމްޓީސީސީން އިތުރަށް މަޢުލޫމާތު ދެއްވި ގޮތުގައި، މި މަޝްރޫޢުގެ ދަށުން 2460 އަކަމީޓަރުގެ ސަރަޙައްދެއްގައި ޕޭމަންޓް ހަދައި، މަގުބައްތި ހަރުކުރުމުގެ މަސައްކަތްވެސް ކުރިއަށްދާނެއެވެ. އަދި ބަނދަރުގެ ފުންމިނަށް ބަދަލު ގެނައުމުގެ ގޮތުން 83,000 އަކަމީޓަރުގެ ސަރަޙައްދެއް ފުންކުރުންވެސް މަޝްރޫޢުގެ ތެރޭގައި ހިމެނެއެވެ.
ފޭދޫ ބަނދަރުގެ ޖާގަ ކުޑަވުމަކީ އެ ރަށުގެ ރައްޔިތުންނާއި އުޅަނދުފަހަރު ދުއްވާ ފަރާތްތަކުން އަބަދުވެސް ކުރަމުން އައި ޝަކުވާއެކެވެ. އެމްޓީސީސީގެ އަމާޒަކީ މިއަހަރުގެ ފަހުކޮޅަށް މަސައްކަތް އެއްކޮށް ނިންމާލައި، އާންމުންނަށް ބަނދަރު ބޭނުންކުރަން ފެށޭވަރު ކުރުމެވެ.