އަންނަ މާލީ އަހަރު އިންޑިއާގެ އިގްތިސާދު %6.8 އާއި %7.2އާ ދެމެދުގެ މިންވަރަކަށް ކުރިއަރާނެ ކަމަށް ލަފާކުރެވޭ ކަމަށާއި، ނަމަވެސް ދުނިޔޭގެ ސިޔާސީ މަސްރަހަށް އަންނަ ބަދަލުތަކާއި އެކްސްޕޯޓް ދަށްވުމުގެ ސަބަބުން ގޮންޖެހުންތަކެއް ކުރިމަތިވެދާނެ ކަމަށް އެ ގައުމުގެ ސަރުކާރުން މިއަދު ބުނެފި އެވެ.
އަންނަ އޭޕްރީލް މަހުން ފެށިގެން އަމަލުކުރަން ފަށާ އާ މާލީ އަހަރުގެ އިގްތިސާދީ ދިރާސާ ރިޕޯޓު، އިންޑިއާގެ ފައިނޭންސް މިނިސްޓަރު ނިރްމަލާ ސީތާރާމަން ވަނީ މިއަދު ގާނޫނު ހަދާ މަޖިލީހަށް ހުށަހަޅުއްވާފަ އެވެ.
މި ރިޕޯޓުގައިވާ ގޮތުން، ދުނިޔޭގެ އިގްތިސާދީ ނުތަނަވަސްކަން ހުރި ނަމަވެސް، އިންޑިއާގެ އެތެރޭގެ ބާޒާރުގައި މުދަލާއި ހިދުމަތަށް އޮތް ޑިމާންޑް ވަރުގަދަވުމަކީ އިގްތިސާދީ ދުވެލި ދެމެހެއްޓުމަށް ލިބޭ ބާރެކެވެ.
މިހާރު ހިނގަމުންދާ މާލީ އަހަރު އިންޑިއާގެ އިގްތިސާދު ކުރިއަރާނެ ކަމަށް ބެލެވެނީ %7.4ގަ އެވެ. އެހެންކަމުން، އަންނަ އަހަރުގެ ލަފާކުރުމަކީ މި އަހަރަށް ވުރެ ކުޑަތަންކޮޅެއް މަޑުޖެހުމެކެވެ.
ރިޕޯޓުގައި ފާހަގަކޮށްފައިވާ ގޮތުގައި، ދުނިޔޭގެ މަސްރަހު އޮތް ގޮތުން ސަމާލުވާން ޖެހުނަސް، މާޔޫސްވާންޖެހޭ ފަދަ ހާލަތެއް ނެތެވެ.
އިންޑިއާއާ އެކު ވިޔަފާރިކުރާ ބޮޑެތި ގައުމުތަކުގެ އިގްތިސާދީ ދުވެލި މަޑުޖެހުމާއި އިމްޕޯޓް ޑިއުޓީއަށް އަންނަ ބަދަލުތަކުގެ ސަބަބުން އިންޑިއާގެ އެކްސްޕޯޓަށާއި އިންވެސްޓަރުންގެ އިތުބާރަށް ބައެއް ކަހަލަ ހުރަސްތައް ކުރިމަތިވެދާނެ ކަމަށް ރިޕޯޓުގައި ބުނެފައިވެ އެވެ.
އަންނަ އާދީއްތަ ދުވަހު ބަޖެޓު ހުށަހެޅުމަށް ހަމަޖެހިފައިވާއިރު، ބަޖެޓުގައި މައިގަނޑު ގޮތެއްގައި އިސްކަންދޭނީ އިގްތިސާދީ ދުވެލި ދެމެހެއްޓުމަށާއި ބައިނަލްއަގުވާމީ ސިޔާސީ އަދި ވިޔަފާރީގެ ނުތަނަވަސްކަމުން ގައުމުގެ އިގްތިސާދު ރައްކާތެރިކުރުމަށެވެ. ހާއްސަކޮށް، އެމެރިކާގެ ރައީސް ޑޮނަލްޑް ޓްރަމްޕް އިންޑިއާގެ މުދަލުން ނަގާ ޓެކްސް ބޮޑުކުރުމާ ގުޅިގެން އުފެދިފައިވާ ގޮންޖެހުންތަކަށް މި ބަޖެޓުގައި ހައްލުތަކެއް ހޯދާނެ ކަމަށް ބެލެވެ އެވެ.
މިދިޔަ އޮގަސްޓް މަހު އެމެރިކާއިން އިންޑިއާގެ ބައެއް މުދަލުން %50ގެ ޓެރިފް ނަގަން ފެށުމުން، އިންޑިއާއިން ވަނީ ޔޫރަޕްގެ އިއްތިހާދާއި ނިއުޒީލަންޑް އަދި އޮމާން ފަދަ ގައުމުތަކާ އެކު ވިޔަފާރީގެ އާ އެއްބަސްވުންތައް ގާއިމުކުރަން ފަށާފަ އެވެ.
އެމެރިކާގެ ޓެކްސްތަކާ އެކު ރުޕީސްގެ އަގު ވަނީ ގާތްގަނޑަކަށް %5 ދަށަށް ގޮސްފަ އެވެ. ނަމަވެސް، ސަރުކާރުގެ ރިޕޯޓުގައި ބުނެފައިވަނީ ރުޕީސްގެ އަގު މިހާރު ހުރީ އިންޑިއާގެ އިގްތިސާދީ ވަރުގަދަކަމާ އަޅާބަލާއިރު މާ ދަށުގައި ކަމަށެވެ.
ބޭރުގެ އިންވެސްޓަރުން ވަނީ 2025 ވަނަ އަހަރު އިންޑިއާގެ ހިއްސާގެ ބާޒާރުން 19 ބިލިއަން ޑޮލަރު އަނބުރާ ގެންގޮސްފަ އެވެ.
ނަމަވެސް، އިންޑިއާ ސަރުކާރުން ގެންނަމުންދާ އިސްލާހުތަކުގެ ސަބަބުން، ކުރިއަށް އޮތް ތަނުގައި އިންވެސްޓްމަންޓްތައް އިތުރުވާނެ ކަމަށް ބެލެވެ އެވެ. މީގެ ތެރޭގައި ޓެކްސް ކުޑަކުރުމާއި މަސައްކަތްތެރިންގެ ގާނޫނަށް ގެނައި ބަދަލުތަކާއި ނިއުކްލިއާ ހަކަތައިގެ ދާއިރާ އަމިއްލަ ފަރާތްތަކަށް ހުޅުވާލުން ހިމެނެ އެވެ.
ބައިނަލްއަގުވާމީ މާލީ އިދާރާތަކުން ވެސް އިންޑިއާގެ އިގްތިސާދާ މެދު އުންމީދު ބޮޑެވެ.
އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ވަނީ އިންޑިއާގެ ކުރިއެރުން %7.3އަށް ލަފާކޮށްފަ އެވެ. އަދި ވޯލްޑް ބޭންކުން ވަނީ އެ ގައުމުގެ އިގްތިސާދު %7.2އަށް ކުރިއަރާނެ ކަމަށް ލަފާކޮށްފަ އެވެ.