އެމެރިކާގެ ސަރުކާރުގެ ނެޓްވޯކްތައް ރައްކާތެރިކުރުމާ ބެހޭ އެޖެންސީގެ އެކްޓިން ޗީފްގެ މަގާމުގައި ހުންނެވި، އިންޑިއާ ދަރިކޮޅުގެ މަދޫ ގޮއްޓުމުއްކަލާ، ސަރުކާރުގެ ސިއްރު ލިޔެކިޔުންތަކެއް ޗެޓްޖީޕީޓީއަށް އަޕްލޯޑް ކުރި މައްސަލައެއް ފެންމަތިވެ ބޮޑެތި ފާޑުކިޔުންތަކެއް އަމާޒުވެއްޖެއެވެ. ރިޕޯޓްތައް ބުނާގޮތުން، މަދޫ މިދިޔަ ހޫނުމޫސުމުގައި މަގާމާ ހަވާލުވިތާ މާގިނަ ދުވަސްތަކެއް ނުވަނީސް، ސަރުކާރުގެ ކޮންޓްރެކްޓްތަކާ ގުޅޭ ސިއްރު ލިޔެކިޔުންތަކެއް ވަނީ ޗެޓްޖީޕީޓީގެ އާންމު ވާޝަނަށް އަޕްލޯޑް ކޮށްފައެވެ. މަދޫ އަކީ އެމެރިކާގެ ސައިބާ ސެކިއުރިޓީ އެންޑް އިންފްރާސްޓްރަކްޗާ ސެކިއުރިޓީ އެޖެންސީ (ސީއައިއެސްއޭ) އިސްކޮށް ހިންގަވަމުން ގެންދަވާ ބޭފުޅާއެވެ. މިއީ އެމެރިކާގެ މުޅި ސަރުކާރުގެ ނެޓްވޯކްތަކުގެ ސަލާމަތީ ކަންކަން ބަލަހައްޓާ މައި އިދާރާއެވެ. މަދޫގެ މައްސަލަ މިހާރުދަނީ ތަހުގީގު ކުރަމުން --- ފޮޓޯ: އޭޕީ މި މައްސަލަ ފެންމަތިވުމާ ގުޅިގެން އޭނާގެ މައްޗަށް މިހާރު ވަނީ ތަހުގީގެއް ހިންގަން ފަށާފައެވެ. ސައިބާ ސެކިއުރިޓީގެ އެންމެ އިސް މަގާމެއްގައި ހުރި ބޭފުޅަކު، އާންމު އާޓިފިޝަލް އިންޓެލިޖެންސް ޕްލެޓްފޯމަކަށް ސަރުކާރުގެ ސިއްރު މައުލޫމާތުތައް އެޅުމަކީ ގައުމީ ސަލާމަތަށް އޮތް ނުރައްކަލެއްގެ ގޮތުގައި މާހިރުން ދަނީ ސިފަކުރަމުންނެވެ. ޓްރަމްޕްގެ ސަރުކާރުން އައްޔަނުކުރި މި އޮފިޝަލުގެ މި އަމަލުގެ ސަބަބުން، ސަރުކާރުގެ އިދާރާތަކުގައި އޭއައި ބޭނުންކުރުމާ ބެހޭ ގޮތުން ހުރި ގަވާއިދުތަކާ މެދުވެސް މިހާރު ވަނީ ސުވާލު އުފެދިފައެވެ. މި މައްސަލަ ފެންމަތިވެފައިވަނީ ސަރުކާރުގެ އިދާރާތަކުގައި އާޓިފިޝަލް އިންޓެލިޖެންސް (އޭއައި) ބޭނުންކުރުމުގެ ރައްކާތެރިކަމާ މެދު ދުނިޔޭގެ ފެންވަރުގައި ބޮޑެތި ބަހުސްތަކެއް ކުރެވެމުންދާ ދަނޑިވަޅެއްގައެވެ. އާންމުކޮށް ހިލޭ ބޭނުންކުރާ ޗެޓްޖީޕީޓީ ފަދަ ޕްލެޓްފޯމްތަކަށް އަޅާ މައުލޫމާތުތަކަކީ އެ ސިސްޓަމްތައް ތަމްރީނުކުރުމަށް ބޭނުންކުރެވިދާނެ އަދި އެހެން ފަރާތްތަކަށް ފެނުމުގެ ފުރުސަތު އޮތް މައުލޫމާތުތަކަކަށް ވާތީ، ސަރުކާރުގެ ސިއްރު ލިޔެކިޔުންތައް އެފަދަ ވަސީލަތްތަކަށް ހިއްސާކުރުމަކީ ސަލާމަތީ ގޮތުން ބޮޑު ނުރައްކަލެއް ކަމުގައި މާހިރުން ފާހަގަކުރެއެވެ.