މަޝްހޫރު ޒުވާން ލަވަކިޔުންތެރިން ހުށަހަޅާ "އެކި ރާގު" މިއުޒިކް ޝޯތަކުގެ މީޑިއާ ޕާޓްނަރަކަށް ސަން ސިޔާމް މީޑިއާ ވުމަށް ޕާފެކްޓް ސެލެބްރޭޝަންސް އާއެކު، މިއަދު ފަހުމުނާމާއެއްގައި ސޮއިކޮށްފިއެވެ. މި ފަހުމުނާމާގައި ސޮއިކުރެއްވީ، އެސްއެސް މީޑިއާގެ ސީއީއޯ މުހައްމަދު އާސިފް (މޮންދު)އާއި ފާފެކްޓް ސެލެބްރޭޝަންސްގެ ސީއީއޯ އުލްޔާ އަހުމަދެވެ. މި ޝޯތަކުގެ ކޯޑިނޭޓަރު އަހުމަދު ސަލީމް 'ސަން'އަށް ވިދާޅުވީ، ޝޯތަކުގެ މީޑިއާ ޕާޓްނަރަކަށް އެސްއެސް މީޑިއާ ޚިޔާރު ކުރީ، އިތުބާރު ހިފޭ ކޮލިޓީ މަސައްކަތްތަކެއް ކުރާ ޓީމެއް ކަމަށްވާތީ ކަމަށެވެ. އެކި ރާގު މިއުޒިކް ޝޯތަކުގެ އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން --- ސަން ފޮޓޯ މި ޝޯތަކުގައި ހުށަހަޅާނީ، މަޝްހޫރު ޒުވާން ލަވަކިޔުންތެރި ކަމަށްވާއިރު، އެ ލަވަކިޔުންތެރިން ފަހުން ހާމަކުރާނެ ކަމަށް އޭނާ ވިދާޅުވިއެވެ. އެކި ރާގު މިއުޒިކް ޝޯތަކުގައި ކިޔާނީ، ޒަމާނާ އެއްގޮތަށް މޮޑިފައި ނުވަތަ ބަދަލުކޮށްފައި ހުރި ދިވެހި ލަވަތައް ކަމަށް ސަލީމް ވިދާޅުވިއެވެ. މި ޝޯތައް އޮންނާނީ، އަންނަ އޭޕްރީލް އެކަކާއި ދެއަކާއި ތިނެއްގައި އޮލިމްޕަހުގެ ހޯލުގައެވެ. ސަލީމް ވިދާޅުވި ގޮތުގައި، މިއީ ޓިކެޓު ވިއްކައިން ބާއްވާ ޝޯތަކެކެވެ. އަންނަ މާރިޗު މަހު ޝޯތަކުގެ ޓިކެޓު ވިއްކަން ފަށާއިރު، ޓިކެޓެއްގެ އަގުތައް ހުރީ 500 ރުފިޔާއިން ދަށުގައެވެ. އޭގެއިތުރަށް، މި ޝޯތަކުގެ ޕްރެކްޓިސް ފެށުމުގެ ތައްޔާރީތައް ވަމުން އަންނަކަން ސަލީމް ފާހަގަކުރެއްވިއެވެ. ޕާފެކްޓް ސެލެބްރޭޝަންސް އަކީ، ޕާޓީތަކާއި ވެޑިންތަކާއި މިއުޒިކް ފަދަ މުނިފޫހިފިލުވުމުގެ ހަރަކާތްތައް އޮގަނައިޒް ކުރާ ކުންފުންޏެކެވެ.