ދިރާގު ދިވެހި ޕްރިމިއާ ލީގުގައި މާޒިޔާ ސްޕޯޓްސް އެންޑް ރެކްރިއޭޝަން މޮޅުވާން ދަނިކޮށް މެޗުގެ އެންމެ ފަހު ވަގުތު ނިއު ރޭޑިއަންޓް ސްޕޯޓްސް ކުލަބުގެ ކެޕްޓަން އަލީ އަޝްފާގު (ދަގަނޑޭ) ކާމިޔާބުކުރި ލަނޑާއެކު މެޗު އެއްވަރުވެއްޖެ އެވެ. މެޗާއި ކުރިމަތިލިއިރު ވެސް މާޒިޔާ ވަނީ ލީގު ކަށަވަރުކޮށްފައެވެ. މެޗު ނިމުނީ 2-2 ގެ ނަތީޖާއަކުން އެއްވަރުވެގެންނެވެ. މިއީ މާޒިޔާއިން ޖެހިޖެހިގެން ލީގު ޗެމްޕިއަަންކަން ކަށަވަރުކުރި ފަސްވަނަ ސީޒަނެވެ މި މެޗުގެ ފުރަތަމަ ހާފު ނިމުނީ ދެޓީމުން ކުރެ ޓީމަކަށް ލަނޑެއް ނުޖެހިއެވެ. ނަމަވެސް ރަނގަޅު ފުރުސަތުތަކެއް ދެ ޓީމަށްވެސް ލިބުނެވެ. ދެވަނަ ހާފުގެ ކުރީކޮޅު މާޒިޔާގެ ހަސަން ނަޒީމް ގާސިމް (ޗޯޓު) ވަނީ ލީޑު ނަގާފައެވެ. އޭނާ މި ލަނޑު ޖެހީ ދެވަނަ ހާފު ފަށައިގެން ތިން މިނެޓުގެ ތެރޭގައެވެ. އޭނާ މި ލަނޑު ޖެހީ ގޯލުގެ ތިރީ ކަނަށް ބޯޅަ އަމާޒުކޮށްގެންނެވެ. އޭގެ އަށް މިނެޓުފަހުން މާޒިޔާގެ ކެޕްޓަން ސަމޫހު އަލީ ވަނީ މާޒިޔާގެ ލީޑު ފުޅާކޮށްފައެވެ. މާޒިޔާއިން ދެ ލަނޑު ޖެހިތާ މާގިނައިރުތަކެއް ނުވެ ނިއު ރޭޑިއަންޓުން ވަނީ ފުރަތަމަ ލަނޑު ޖަހާފައެވެ. މިއީ ލިބުނު ކޯނަރަކުން އެ ޓީމަށް ގެނައި ނައިޖީރިއާގެ ފޯވާޑް އަލްހާޖީ ގޭރޯ ކާމިޔާބުކުރި ލަނޑެކެވެ. ނިއު ބަލިނުވެ ސަލާމަތްވި ލަނޑު ދަގަނޑޭ ކާމިޔާބުކުރީ މެޗުގެ ފަހުކޮޅުގައެވެ. މިއީ އޭރިއާތެރެއިން ނިއުގެ ގޭރޯއަށް މާޒިޔާގެ ކީޕަރު ހުސެއިން ޝަރީފް (ހުސެން) ކުރި ފައުލަކާ ގުޅިގެން ލިބުނު ޕެނަލްޓީއެކެވެ. ދަގަނޑޭ ކާމިޔާބުކުރި މި ޕެނަލްޓީއާއެކު މިއީ މި ސީޒަނުގައި އޭނާގެ ތިންވަނަ ލަނޑެކެވެ.