ރޯގާޖެހި ބޮޑުވަރުވާނަމަ ޑޮކްޓަރަށް ދައްކައިގެން ފަރުވާ ހޯދަން ސަމާލުކަން އިތުރުކުރުން މުހިންމުކަން ފާހަގަކުރެވެއެވެ. ނޭވާލާ ނިޒާމުގެ ބަލިތައް ހުންނަ މީހުން އެކަމަށް ޚާއްޞަ ސަމާލުކަމެއް ދިނުން މުހިންމެވެ. 
މިއަހަރު ޢުމުރާއަށް ދިއަ މީހުންގެ ތެރެއިން ރޯގާޖެހުނު ބައެއް މީހުންގެ ޓެސްޓްތަކުން އެމީހުންނަށް ކޮރޯނާޖެހި ރަނގަޅުވެފައިވާކަން ވަނީއެނގިފައެވެ. ކޮރޯނާއަކީ މިހާރު އުޅޭ ޢާންމު ބައްޔަކަށްވަނީވެފައެވެ. އެހެންކަމުން އޮތީ ބިރުގަތުމެއް ނޫނެވެ. ރޯގާޖެހި ބޮޑުވަރުވާނަމަ ނުވަތަ ދިގުލައިދާނަމަ އަމިއްލައަށް ބޭސްކުރަން ނުތިބެ ޑޮކްޓަރަށް ދައްކައިގެން ފަރުވާހޯދުމެވެ. ނޭވާލާ ނިޒާމުގެ ބަލިތައް ހުންނަ މީހުން އެކަމަށް ޚާއްޞަ ސަމާލުކަމެއް ދޭންވާނެއެވެ. 
ދުނިޔޭގެ ހުރިހާ ޤައުމުތަކުން ޢުމްރާއަށްދާ މީހުންގެ ޢަދަދުގިނަވެ ތަފާތު ރޯގާތައް ފެތުރެއެވެ. ރާއްޖެއިންވެސް ގިން ބައަކު ޢުމުރާއަށްދެއެވެ. ވީމާ އޮތީ ފަރުވާތެރިވުމެވެ. ޢުމުރާގައި ހުއްޓާ ރޯގާޖެހުނަސް އަދި އެނބުރި އަންނަ ފަހުން ރޯގާޖެހުނަސް ފަރުވާކުރުމުގައި ސަމާލުކަން ދިނުމެވެ. 
ޢުމުރާއަށް ނުދިއަނަމަވެސް ގިނަ ބައަކަށް އަންނަނީ ތަފާތު ރޯގާތައް ޖެހެމުންނެވެ. ރޯގާއަކީ އެކަކަށް ޖެހިއްޖެނަމަ ގޭގެ ގިނަބައަކަށް ފެތުރޭ ބައްޔެކެވެ. ވީމާ ރޯގާޖެހުމުން ސަމާލުކަންދޭންވީ ހަމައެކަނި ޢުމުރާއަށްދާ މީހުންނެއް ނޫނެވެ. އެންމެންވެސް ސަމާލުކަންދޭންވާނެއެވެ. 
އައިޖީއެމްއެޗަށް ބާރުބޮޑުވުމުން ސަރުކާރުން ގެންދަނީ އިތުރު ޖީޕީ ކްލިނިކްތައް ހުޅުވައި ޚިދުމަތްދެމުންނެވެ. ކޮންމެ ކްލިނިކަކުންވެސް ރޯގާއަށް ފަރުވާކުރެވޭނެއެވެ. ވީމާ ކުރަން އޮތްކަމަކީ ރޯގާ ރަނގަޅުނުވެ ލަސްވާނަމަ ނުވަތަ ބޮޑުވަރުވާނަމަ އަވަހަށް ޑޮކްޓަރަކަށް ދައްކައިގެން ފަރުވާ ހޯދުމެވެ.