ބޭންކް އޮފް މޯލްޑިވްސް (ބީއެމްއެލް) އިން މިދިޔަ އަހަރު ވިޔަފާރިތަކާއި އާންމުންނަށް 10 ބިލިއަން ރުފިޔާގެ އާ ލޯނު ދޫކޮށްފައިވާ ކަމަށް އެ ބޭންކުން މިއަދު ބުނެފި އެވެ.
ވީ ކިހިނެއް؟ - ބީއެމްއެލް އިން މިއަދު ވަނީ މިދިޔަ އަހަރުގެ ފަހު ކުއާޓަރުގެ ހިސާބުތައް އާންމުކޮށްފަ އެވެ.
ތަފްސީލް - ބީއެމްއެލް އިން ބުނި ގޮތުގައި، އެ ބޭންކުގެ ކެޕިޓަލް އަދި ލިކުއިޑިޓީ ރޭޝިއޯ ގާނޫނު ލާޒިމުކުރާ މިންގަނޑަށް ވުރެ މަތީގައި ދަމަހައްޓާފައިވެ އެވެ.
ބީއެމްއެލް އިން މިދިޔަ އަހަރު ތައާރަފްކުރި އާ ލޯނުތަކާއި ފައިނޭންސިންގެ ތެރޭގައި ހިމެނެނީ:
'ގްރީން ރިސޯޓް ފައިނޭންސިން' ތައާރަފުކުރި
ހައުސިން މިނިސްޓްރީއާ ގުޅިގެން %5ގެ ކުޑަ ރޭޓެއްގައި 'ހިޔާވެހި ފައިނޭންސިން' ދޫކުރަން ފެށި 
ގެދޮރު ގަތުމަށް ދޫކުރާ ލޯނުތަކުގެ އިކުއިޓީ %5އަށް ދަށްކުރި
ބީއެމްއެލް އެފޯޑަބަލް ހޯމް ލީސިން ޕްރައިވެޓް ލިމިޓެޑް އުފައްދައި އަގުހެޔޮ ފްލެޓުތައް އެޅުމުގެ މަޝްރޫއުތައް އިފްތިތާހުކުރި
ބީއެމްއެލްއަށް މިދިޔަ އަހަރު ލިބުނު ފައިދާ، އޭގެ ކުރީ އަހަރާ އަޅާބަލާއިރު %10 އިތުރުވެ، ރެކޯޑް މިންވަރެއް ކަމަށްވާ 3.2 ބިލިއަން ރުފިޔާއަށް ވަނީ އަރާފަ އެވެ. މިދިޔަ ކުއާޓަރުގައި އެކަނި ވެސް ސާފު ފައިދާގެ ގޮތުގައި 837.5 މިލިއަން ރުފިޔާ ލިބުނުއިރު، މިއީ ތިންވަނަ ކުއާޓަރާ އަޅާބަލާއިރު %76.2 ކުރިއެރުމެކެވެ.
ބުނީ ކީކޭ؟ - "2025 ވަނަ އަހަރު ކާމިޔާބުކަމާ އެކު ނިންމާލެވުނުކަމީ އަޅުގަނޑަށް ލިބޭ ވަރަށް ބޮޑު އުފަލެއް. މި ކުއާޓަރުގެ ނަތީޖާއިން ދައްކުވައިދެނީ އަޅުގަނޑުމެންގެ އިސްތިރާޖީ އަމާޒަށް ވާސިލްވެފައިވާކަން އަދި އަޅުގަނޑުމެން މުވައްޒަފުންނަށް ދޭ އަހުމިއްޔަތުކަން،" ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފް ވިދާޅުވި އެވެ.
"ބޭންކުގެ މައިގަނޑު ވިޔަފާރީގެ ދާއިރާތަކުން ހޯދި ކުރިއެރުމާއި ހަރުދަނާ ރިސްކް މެނޭޖްމަންޓެއްގެ ސަބަބުން، ބޭންކުގެ މާލީ ދުޅަހެޔޮކަން ދަމަހައްޓައި ވަރުގަދަ މާލީ ނަތީޖާއެއް ހާސިލްކޮށް ވަރުގަދަ ބެލެންސް ޝީޓެއް ދެމެހެއްޓިފައިވޭ. ވަކިވަކި ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުމުގައި އަޅުގަނޑުމެން ދެމިތިބޭނަން."
20 އަތޮޅުގައި 42 ބްރާންޗު 
267 އޭޓީއެމް 
މީހުން ދިރިއުޅޭ ހުރިހާ ރަށެއްގައި ގާއިމުކޮށްފައިވާ ސެލްފް ސާވިސް ބޭންކިން ސެންޓަރުތައް 
އެންމެ ޒަމާނީ އޮންލައިން ބޭންކިންގެ ހިދުމަތް