ރާއްޖޭގެ ކަނޑުއަޑީގެ ހޮހޮޅައެއްގެ ތެރޭގައި މަރުވި އިޓަލީ ފަސް މީހުންގެ ޕޯސްޓްމޯޓަމް ހަދައިފިއެވެ.
އިޓަލީގެ މީޑިއާތަކުން ރިޕޯޓް ކޮށްފައިވާ ގޮތުގައި މަރުވި މީހުން ކަމަށްވާ ޖިއަންލޫކާ ބެނެޑެޓީ އާއި ފެޑެރިކޯ ގުއަލްޓިއޭރީގެ ޕޯސްޓްމޯޓަމް ހެދީ އިއްޔެއެވެ. މިއަދު ވަނީ ގަލަރާޓޭ (ވަރޭސޭ) ގެ ހޮސްޕިޓަލުގައި މޮނިކާ މޮންޓެފަލްކޯން އާއި އޭނާގެ ދަރިފުޅު ޖިއޯޖިއާ ސޮމަކަލް އަދި މުރިއަލް އޮޑެނީނޯގެ ހަށިގަނޑުގެ ޕޯސްޓްމޯޓަމް ތަހުލީލުތައް ވެސް ކުރިއަށް ގެންގޮސްފައެވެ.
ޑޭން ޔޫރަޕްގެ ފިންލޭންޑްގެ ރެސްކިއު ޓީމުން ދެކުނު ކަނޑުގެ ހޮހަޅައިން ނެގި ހަށިގަނޑުތަކުގެ ޕޯސްޓްމޯޓަމް ހެދުމަށްޓަކައި ތަޖުރިބާކާރުންގެ ޕެނަލެއް ވަނީ އައްޔަންކޮށްފައެވެ. އޭގެ ތެރޭގައި ޔުނިވަރސިޓީ އޮފް ޕަވިއާގެ އިންސްޓިޓިއުޓް އޮފް ފޮރެންސިކް މެޑިސިންގެ ފޮރެންސިކް ޑޮކްޓަރު ލޫކާ ތަޖާނާ، ޓޮކްސިކޮލޮޖިސްޓް ކްރިސްޓިއާނާ ސްޓްރަމޭސީ، އަދި އެނެސްތެޓިސްޓް، ރެސަސިޓޭޓަރ އަދި ސްޕޯޓްސް މެޑިސިން އާއި ފީނުމުގެ ދާއިރާގެ މާހިރު ލޫސިއާނޯ ޑިޓްރީ ހިމެނެއެވެ. ގުއަލްޓިއޭރީ އާއިލާގެ ވަކީލު އެންޓޮނެލޯ ރިޗިއޯ، އޭނާގެ ފަރާތުން ޑރ.ކެރޯލާ ވަނޯލީ ވަނީ އެ ޓީމަށް އައްޔަންކޮށްފައެވެ.
އިޓަލީގެ މީޑިއާތަކުން ބުނާ ގޮތުގައި ފަސް މީހުން މަރުވި މައްސަލައިގައި ތަހްގީގު ކުރިއަށް ދާއިރާގެ ޖެނޯއާގެ މޮބައިލް ސްކޮޑުން، ރޯމް ޕަބްލިކް ޕްރޮސެކިއުޓަރ އޮފީހުގެ އިރުޝާދުގެ ދަށުން، ލިޔެކިޔުންތަކާއި ހެކިބަސް ހޯދުމުގެ މަސައްކަތް ކުރިއަށް އެބަގެންދެއެވެ.
މިމައްސަލައިގެ ތަހްގީގުގެ ތެރެއިން ބަލާނެ އެންމެ މުހިއްމު އެއްކަމަކީ ޖެނޯއާ ޔުނިވަރސިޓީން ޕްރޮފެސަރ މޮންޓެފަލްކޯންއާ ހަވާލުކުރި މިޝަންގައި ހިމެނެނީ ކޮން ކަންތައްތަކެއްތޯ ކަށަވަރުކުރުމެވެ. ފުރަތަމަ ދުވަހުން ފެށިގެންވެސް، "ޑައިވް ކުރުމުގެ ހަރަކާތަކީ އެއްވެސް ހާލެއްގައި ސައިންޓިފިކް މިޝަންގައި ހިމެނޭ ކަމެއް ނޫން ކަމަށާއި، އެއީ އަމިއްލަ ހައިސިއްޔަތުން ކުރި ކަމެއް" ކަމަށް އެ ޔުނިވަރސިޓީން ބުނަމުންދާ ބުނުންތަކުގެ ހަގީގަތް ތަހްގީގުގައި ބަލާނެ ކަމަށް ރިޕޯޓްތައް ބުނެއެވެ.
ޕޯސްޓްމޯޓަމްގެ ނަތީޖާއިން ފަސް ޑައިވަރުން މަރުވި ސަބަބު ސާފުވެގެންދާނެއެވެ. އަދި ފިންލޭންޑްގެ ރެސްކިއު ޓީމުން ހޯދި ގޯ-ޕްރޯ އާއި އެކްޝަން ކެމެރާތަކުގެ އެނަލިސިސްގެ އެހީގައި، މޮންޓެފަލްކޯން އާއި އޭނާގެ ދަރިފުޅު ޖިއޯޖިއާ، އޮޑެނީނީ އަދި ގުއަލްޓިއޭރީއާއެކު، 60 މީޓަރުގެ ފުންމިނުގައި އެމީހުން ބަންދުވި އެ ނުރައްކާތެރި ހަނި ހޮހޮޅައިގެ މަގަށް ވަދެވުނު ސަބަބު ދެނެގަނެވޭނެ ކަމަށް ބެލެވޭ ކަމަށް ވެސް އިޓަލީގެ މީޑިއާތަކުން ބުނެއެވެ.
މައްސަލައިގެ ތަހްގީގު ކުރިއަށްދާއިރު ޖެނޯއާ ޔުނިވަރސިޓީން ޕްރޮފައިލްތައް އުނިކުރުމާއި ގުޅިގެން ވަނީ ހިޔާލުތަފާތުވުންތައް އުފެދިފައެވެ. ޕްރޮފެސަރ މޮންޓެފަލްކޯންގެ ޔުނިވަރސިޓީ ޕޭޖް ޖެނޯއާ ޔުނިވަރސިޓީން އުނިކުރުމުން އާއިލާ ތިބީ ވަރަށް ބޮޑަށް ހައިރާންވެފައި ކަމަށް މޮނިކާ މޮންޓެފަލްކޯން އާއި އޭނާގެ ދަރިފުޅު ޖިއޯޖިއާ ސޮމަކަލްގެ އާއިލާގެ ފަރާތުން ގާނޫނީ މައްސަލައިގައި ވަކާލާތުކުރައްވާ އެލެސަންދްރޯ އަލްބާޓް އާއެކު މަސައްކަތްކުރައްވާ ޖިއުސެއްޕޭ ޕުގްލިއޭސް ބުންޏެވެ.
ވަކީލުން ބުސްޓޯ އަރްސީޒިއޯ ވަނީ "މިފަދަ މިޝަންތަކަކީ ކޮންމެ އަހަރަކު ނުވަތަ ކޮންމެ ހަ މަހަކުން އެއްފަހަރު ކުރިއަށްދާ ކަންކަން، އަދި ކުރެވެމުންދާ ކަންތައްތަކުގެ ފުރިހަމަ މައުލޫމާތު ޔުނިވަރސިޓީއަށް އެނގޭނެ،" ކަމަށް މީޑިއާގައި ބުނެފައެވެ.
ވެބްސައިޓުން މައުލޫމާތު އުނިކުރިކަމަށް މީޑިއާގައި ފެތުރެމުންދާ ޚަބަރުތަކާ ގުޅިގެން ޖެނޯއާ ޔުނިވަރސިޓީން ނެރުނު ބަޔާނެއްގައި ބުނީ ޕްރޮފެސަރ މޮންޓެފަލްކޯން އާއި ޑރ.އޮޑެނީނީގެ ކަރިކިއުލަމް ނުވަތަ ޕްރޮފައިލާ ގުޅޭ މައުލޫމާތު ޖެނޯއާ ޔުނިވަރސިޓީން އުނިކޮށްފައިވާ ކަމަށް ބުނުމަކީ ކުށްހީއެއް ކަމަށެވެ. ޔުނިވަރސިޓީން ބުނާ ގޮތުގައި، "ޔުނިވަރސިޓީގެ ޕޯޓަލްއިން ޕްރޮފެސަރުގެ ޕްރޮފައިލާއި ރިސާޗް ފެލޯގެ ޕްރޮފައިލް ނުފެންނަނީ، މީހަކު މަރުވުމާ ގުޅޭ މައުލޫމާތު ސިސްޓަމަށް އެންޓަރ ކުރުމުން، އަމިއްލަ ޒާތީ ޕްރޮފައިލް ޝާއިއުނުކުރާ ގޮތަށް ކޮމްޕިއުޓަރ ސިސްޓަމްގައި ހުންނަ އުސޫލެއްގެ ސަބަބުންނެވެ."
އެހެންކަމުން، އެ ދެ ބޭފުޅުންގެ ފަންނީ، އެކަޑަމިކް ނުވަތަ ސައިންޓިފިކް ކެރިއަރާ ގުޅޭ އެއްވެސް މައުލޫމާތެއް ބަދަލުކުރުމަށް، އުނިކުރުމަށް ނުވަތަ ފޮހެލުމަށް އެއްވެސް މަސައްކަތެއް ކޮށްފައެއް ނުވެއެވެ. "އަދި ކޮމްޕިއުޓަރ އާކައިވްތަކާއި، ރިސާޗް ޑޭޓާބޭސްތަކާއި، ސައިންޓިފިކް މަސައްކަތްތަކަށް ޚާއްސަ ކުރެވިފައިވާ އެހެނިހެން މައުލޫމާތު ސިސްޓަމްތަކުގައި، މިހާރުވެސް އަމަލުކުރަމުންދާ ގަވާއިދުތަކާ އެއްގޮތަށް ޕްރޮފެސަރުގެ މައުލޫމާތާއި ސައިންޓިފިކް ހޯދުންތައް ބަލައިލެވޭނެ ގޮތަށް ހުންނާނެ ކަމަށް" ޔުނިވަރސިޓީން ނިންމާލަމުން ބުނެފައިވެއެވެ.