މަޝްހޫރު "ފޯޓްނައިޓް" ގޭމް އުފައްދާ އެޕިކް ގޭމްސް އާއި ޓެކްނޮލޮޖީގެ އެންމެ ބޮޑު އެއް ކުންފުނި ގޫގުލްއާ ދެމެދު އެމެރިކާގެ ކޯޓުގައި ދިގު މުއްދަތަކަށް ދެމިގެންދިޔަ ޤާނޫނީ ދެބަސްވުމަށް ފުޅާދާއިރާއެއްގައި ހައްލެއް ހޯދައިފިއެވެ. މި ހައްލުގެ ނަތީޖާއެއްގެ ގޮތުން، ގޫގުލްއިން ވަނީ އެންޑްރޮއިޑް އޮޕަރޭޓިން ސިސްޓަމާއި ގޫގުލް ޕްލޭ ސްޓޯރުގެ ސިޔާސަތުތަކަށް ބޮޑެތި އަދި މުހިންމު ބަދަލުތަކެއް ގެނައުމަށް އެއްބަސްވެފައެވެ. މި ބަދަލުތަކުގެ މައިގަނޑު މަޤްޞަދަކީ އެޕް ޑިވެލޮޕަރުންނަށާއި އާންމު ޔޫޒަރުންނަށް އިތުރު ފުރުޞަތުތަކާއި އިޚްތިޔާރުތައް ފަހިކޮށްދީ، މާކެޓުގައި ވާދަވެރިކަން އިތުރުކުރުމެވެ. https://sun.mv/194027 މި މައްސަލައިގެ އަސްލަކީ 2020 ވަނަ އަހަރު އެޕިކް ގޭމްސްއިން ގޫގުލްއާ ދެކޮޅަށް ހުށަހެޅި އެންޓިޓްރަސްޓް ދަޢުވާއެކެވެ. އެ ކުންފުނިން ތުހުމަތުކުރި ގޮތުގައި، އެންޑްރޮއިޑް ޑިވައިސްތަކަށް އެޕް ލިބޭނެ ގޮތްތަކާއި، އެޕްތަކުގެ ތެރެއިން ކުރާ މާލީ މުޢާމަލާތްތަކުގެ މައްޗަށް ގޫގުލްއިން ޤާނޫނާ ޚިލާފަށް މޮނޮޕޮލީއެއް ޤާއިމުކޮށް، ވާދަވެރިކަން ނައްތާލާފައިވެއެވެ. މި މައްސަލައިގެ ޖޫރީ ޓްރައިލް 2023 ވަނަ އަހަރު އެޕިކް ގޭމްސްއިން ވަނީ ކާމިޔާބުކޮށްފައެވެ. ސެން ފްރެންސިސްކޯގެ ފެޑެރަލް ކޯޓަށް ހުށަހަޅާފައިވާ މި ހައްލުގެ ދަށުން ގެނެވޭ ބަދަލުތަކުގެ ތެރޭގައި، ޔޫޒަރުންނަށް ފަސޭހަކަމާއެކު ގޫގުލް ނޫން އެހެން ކުންފުނިތަކުގެ އެޕް ސްޓޯރުތައް ޑައުންލޯޑްކޮށް ބޭނުންކުރުމުގެ ފުރުޞަތު ހުޅުވާލުން ހިމެނެއެވެ. މީގެ އިތުރުން، އެޕް ޑިވެލޮޕަރުންނަށް އެމީހުންގެ އެޕްތަކުގެ ތެރެއިންނާއި ބޭރުން ވެބް ލިންކްތައް މެދުވެރިކޮށް އެހެން ޕޭމަންޓް މެތަޑްތަކަށް ޔޫޒަރުންނަށް މަގުދެއްކުމުގެ މިނިވަންކަން ލިބިގެންދާނެއެވެ. އަދި މިފަދަ ޓްރާންސެކްޝަންތަކުން ގޫގުލްއަށް ދައްކަންޖެހޭ ސަރވިސް ފީގެ މިންވަރު ނުވަ އިންސައްތަ އިން 20 އިންސައްތަ އާ ދެމެދުގެ އަދަދަކަށް ކެޕްކުރެވިގެންދާނެއެވެ. އެޕިކް ގޭމްސްގެ ސީއީއޯ ޓިމް ސްވީނީ ވަނީ މި އެއްބަސްވުމަށް ހޫނު މަރުޙަބާއެއް ދަންނަވާފައެވެ. އޭނާ ވިދާޅުވި ގޮތުގައި، ގޫގުލްގެ މި ހުށަހެޅުމަކީ އެންޑްރޮއިޑްގެ އަސްލު މަޤްޞަދު ކަމަށްވާ "އޯޕަން ޕްލެޓްފޯމެއް" ގެ ގޮތުގައި އެ ޕްލެޓްފޯމް ދެމެހެއްޓުމަށް ލިބިގެންދިޔަ ވަރަށް ބޮޑު ކުރިއެރުމެކެވެ. ގޫގުލްގެ ފަރާތުން ވާހަކަ ދައްކަވަމުން، އެ ކުންފުނީގެ އެންޑްރޮއިޑް އިކޯސިސްޓަމްގެ ރައީސް ސަމީރު ސަމަތު ވިދާޅުވީ، މި ބަދަލުތަކުގެ ސަބަބުން ޔޫޒަރުންގެ ސެކިއުރިޓީއާއި ސަލާމަތްތެރިކަން ކަށަވަރުކުރަމުން، ޑިވެލޮޕަރުންނަށާއި ކަސްޓަމަރުންނަށް އިތުރު ފަސޭހަތަކާއި އިޚްތިޔާރުތައް ލިބިގެންދާނެ ކަމަށެވެ. މި އެއްބަސްވުން ތަންފީޒުކޮށް، ޢަމަލީ ސިފައެއް ގެނައުމަށްޓަކައި، މި މައްސަލަ ބެއްލެވި އެމެރިކާގެ ޑިސްޓްރިކްޓް ޖަޖް ޖޭމްސް ޑޮނާޓޯގެ ރަސްމީ ހުއްދަ ލިބެން ޖެހޭނެއެވެ.