އީރާނާ ގުޅުންހުރި ހަނގުރާމައިގެ ސަބަބުން ތެޔޮ ސަޕްލައި ކުރުމަށް ދިމާވެފައިވާ ހުރަސްތަކަށް ހައްލެއް ހޯދުމަށް، އިންޓަނޭޝަނަލް އެނާޖީ އެޖެންސީ (އައިއީއޭ) އިން އެ އިދާރާގެ ތާރީހުގައި ވެސް އެންމެ ގިނަ އަދަދަކަށް ކުއްލި ހާލަތްތަކުގައި ބޭނުންކުރާ ތެލުގެ ރިޒާވް ދޫކޮށްލަން ވިސްނަމުންދާ ކަމުގެ ރިޕޯޓްތަކާ އެކު، ތެލުގެ އަގަށް މިއަދު ބޮޑެތި ބަދަލުތަކެއް އަތުވެއްޖެ އެވެ.
ބްރެންޓް ކްރޫޑްގެ އަގު ކުޑަކޮށް މައްޗަށް ގޮސް ފީފާއެއް 87.91 ޑޮލަރަށް އަރާފައިވާއިރު، އެމެރިކާގެ ވެސްޓް ޓެކްސަސް އިންޓަމީޑިއޭޓްގެ އަގު ހުރީ 83.52 ޑޮލަރުގަ އެވެ.
މި ބަދަލު އައީ، 2022 ވަނަ އަހަރު ޔޫކްރެއިން ހަނގުރާމައިގެ ތެރޭގައި އައިއީއޭގެ މެންބަރު ގައުމުތަކުން ދޫކުރި 182 މިލިއަން ފީފާއަށް ވުރެ ގިނަ އަދަދަކަށް ތެޔޮ މިފަހަރު ބާޒާރަށް ނެރޭނެ ކަމަށް ބެލެވުމާ ގުޅިގެންނެވެ.
މެދުއިރުމަތީގައި ކުރިއަށްދާ ހަނގުރާމައިގެ ސަބަބުން ތެޔޮ އުފެއްދުމާއި އޭގެ ދަތުރުފަތުރަށް ބުރޫއަރަމުން ދާތީ، ހަކަތައިގެ ބާޒާރު އަދިވެސް އޮތީ ވަރަށް ނުތަނަވަސްކޮށެވެ. އެމެރިކާ އާއި އިޒްރޭލުން ވަނީ އިއްޔެ ވެސް އީރާނުގެ އަމާޒުތަކަށް ވަރުގަދަ ވައިގެ ހަމަލާތަކެއް ދީފަ އެވެ.
މީގެ އިތުރުން، އީރާނުން ކަނޑުގެ މުހިންމު މަގެއް ކަމަށްވާ ހޯމުޒް ކަނޑުއޮޅީގައި މައިން ވަޅުލަފާނެ ކަމަށް ބަލައި އެމެރިކާއިން ދިން އިންޒާރާ އެކު، އެމެރިކާގެ އަސްކަރިއްޔާއިން ވަނީ އެ ސަރަހައްދުން އީރާނުގެ 16 އުޅަނދެއް ނައްތާލާފައިވާ ކަމަށް ބުނެފަ އެވެ.
ތަޖުރިބާކާރުން ލަފާކުރާ ގޮތުގައި، ކުރިއަށް އޮތް ހަފުތާތަކުގައި ވެސް ތެލުގެ އަގު ހަމައަކަށް ނޭޅޭނެ އެވެ. އައިޖީގެ މާކެޓް އެނަލިސްޓް ޓޯނީ ސައިކަމޯ ވިދާޅުވި ގޮތުގައި، ކުރިއަށް އޮތް ތަނުގައި ތެލުގެ އަގު 75 ޑޮލަރާއި 105 ޑޮލަރާ ދެމެދުގައި ހުންނާނެ ކަމަށް ބެލެވެ އެވެ.
މި ހަފުތާގެ ކުރީކޮޅު ތެލުގެ އަގު ފީފާއެއް 119 ޑޮލަރަށް ވުރެ މައްޗަށް އެރި ނަމަވެސް، އިއްޔެ ވަނީ ތެލުގެ އަގު %11 ދަށަށް ގޮސްފަ އެވެ. މިއީ 2022 ވަނަ އަހަރަށް ފަހު އެއް ދުވަސް ތެރޭގައި ތެލުގެ އަގު މިހާ ބޮޑަށް ދަށަށް ދިޔަ ފުރަތަމަ ފަހަރެވެ.
ހަމަ އެއާ އެކު، ޖީ7ގެ ގައުމުތަކުގެ ވެރިން ދަނީ ހަކަތައިގެ ބާޒާރު ހަމައަކަށް އެޅުވުމަށް އަޅާނެ ފިޔަވަޅުތަކާ މެދު މަޝްވަރާ ކުރަމުންނެވެ. އަދި ސައުދީ އަރަބިއްޔާއިން ދަނީ ހޯމުޒް ކަނޑުއޮޅިން ފޮނުވާ ތެޔޮ މަދުވުމުގެ ސަބަބުން، ރަތްކަނޑު މެދުވެރިކޮށް ތެޔޮ އެކްސްޕޯޓް ކުރުމަށް މަސައްކަތް ކުރަމުންނެވެ.
ހަކަތައާ ބެހޭ ކޮންސަލްޓެންސީއެއް ކަމަށްވާ ވުޑް މެކެންޒީން ލަފާކުރާ ގޮތުގައި، މި ހަނގުރާމައިގެ ސަބަބުން ދުވާލަކު ގާތްގަނޑަކަށް 15 މިލިއަން ފީފާގެ ތެލުގެ ސަޕްލައި ވަނީ މަދުވެފަ އެވެ. އަދި މި ހަމަނުޖެހުންތައް މިގޮތަށް ކުރިއަށްދާ ނަމަ، ތެލުގެ އަގު ފީފާއެއް 150 ޑޮލަރަށް އުފުލިދާނެ ކަމަށް ވެސް އެ ފަރާތުން ވަނީ އިންޒާރު ދީފަ އެވެ.