ރާއްޖޭގައި ގަވާއިދާ ޚިލާފަށް އުޅެމުންދިޔަ އިތުރު ބިދޭސީންތަކެއް އިމިގްރޭޝަނުން އަތުލައިގެންފިއެވެ.
އެ މުއައްސަސާއިން ކުރި ޕޯސްޓެއްގައި ބުނީ އިމިގްރޭޝަން ވޮޗަށް ލިބިފައިވާ މައުލޫމާތަކާއި ގުޅިގެން، ހުޅުމާލެ ފޭސް 1 ގެ އެކި ސަރަހައްދުތައް ބަލައި ފާސްކޮށްފައިވާ ކަމަށެވެ.
އެގޮތުން، އެ ސަރަހައްދުތަކުގައި ޤަވާއިދާ ހިލާފަށް ވިޔަފާރި ކުރަމުންދާ ބިދޭސީންނަށް އަމާޒުކޮށް ޓާސްކުފޯހުން އިއްޔެ ވަނީ ރެއިޑް އޮޕަރޭޝަނެއް ކުރިއަށް ގެންގޮސްފައެވެ.
މި އޮޕަރޭޝަނުގައި 14 ތަނެއް ބަލައިފާސްކޮށްފައިވާއިރު، ސައްހަ ވިސާނެތި ގަވާއިދާ ޚިލާފަށް އުޅެމުންދިޔަ ހަ ބިދޭސީއަކު އިމިގްރޭޝަންގެ ބަންދަށް ގެންގޮސްފައިވާ ކަމަށް އެ މުއައްސަސާއިން މައުލޫމާތު ދެއެވެ.
ޑިސެމްބަރު މަހުގެ ނިޔަލަށް ރާއްޖޭގައި ނުގަވާއިދުން އުޅޭ ބިދޭސީންގެ ޝަކުވާ ހުށަހެޅުމަށް އިމިގްރޭޝަނުން ގާއިމްކޮށްފައިވާ "އިމިގްރޭޝަން ވޮޗް" ޕޯޓަލްއަށް ހުށަހެޅި ޖުމްލަ 1،061 މައްސަލަ އިމިގްރޭޝަނުން ބަލާފައިވާ ކަމަށް ދާދި ފަހުން އެ މުއައްސަސާއިން އާންމު ކުރި ތަފާސްހިސާބުތަކުން ދައްކައެވެ.