މުދަލު ޒަކާތުގެ ގޮތުގައި 2024 ވަނަ އަހަރު ލިބިފައިވާ 100 މިލިޔަނަށް ވުރެ ގިނަ ރުފިޔާ އަކީ ރާއްޖޭގެ ތަރީޚުގައިވެސް މުދަލު ޒަކާތުގެ ގޮތުގައި އެއްއަހަރެއްގެ ތެރޭގައި ލިބިފައިވާ އެންމެ ބޮޑު ޢަދަދު ކަމަށް ޒަކާތު ހައުސް އިން ބުނެފިއެވެ.
ޒަކާތު ހައުސް އިން މިހެން ބުނެފައިވަނީ 2024 ވަނަ އަހަރުގެ ތެރޭގައި މުދަލު ޒަކާތުގެ ގޮތުގައި ޖުމުލަ 101,939,070.15 (ސަތޭކަ އެއްމިލިޔަން ނުވަލައްކަ ތިރީސް ނުވަހާސް ހަތްދިހަ ރުފިޔާ ފަނަރަ ލާރި) ލިބުމާގުޅިގެން އެކަން ފާހަގަކޮށް ނެރެފައިވާ ބަޔާނެއްގައެވެ.
ޒަކާތު ހައުސް އިން ބުނެފައިވަނީ ދިވެހި ރައްޔިތުންގެ ތެރޭގައި ތިއްބެވި ތަނަވަސްކަމުގެ އަހުލުވެރިން ޒަކާތުގެ ކަންކަމަށް ދެއްވާ އަހައްމިއްޔަތު ފާހަގަކޮށް އެފަރާތްތަކަށް މި ފުރުޞަތުގައި ޝުކުރު ދަންނަވަމެވެ. އަދި ޒަކާތުގެ ގޮތުގައި ލިބޭ ފައިސާ އަބަދުވެސް ޚަރަދު ކުރެވެމުންދަނީ ޝަރުޢީ އުސޫލުތަކާއި މިންގަނޑުތަކުގައި ކަނޑައަޅާފައިވާ ގޮތުގެ މަތީން އޭގެ ޙައްޤުވެރިންގެ މައްޗަށްކަން ލޮބުވެތި އެންމެހާ ރައްޔިތުންނަށް ޔަޤީންކޮށް އަރުވަމެވެ.
2023 ވަނަ އަހަރުގެ ޑިސެމްބަރ މަހުގެ 18 ވަނަ ދުވަހު ރައީސުލް ޖުމްހޫރިއްޔާ ޑރ. މުޙައްމަދު މުޢިއްޒު އުފައްދަވާފައިވާ ދިވެހިރާއްޖޭގެ ޒަކާތު ހައުސް 2024 ވަނަ އަހަރުގެ ޖަނަވަރީ މަހުގެ 2 ވަނަ ދުވަހު އިފްތިތާޙު ކުރެވިގެން ދިއުމަކީ ދިވެހިރާއްޖޭގެ ޒަކާތުގެ ނިޒާމު ހަރުދަނާކޮށް ތަރައްޤީކުރުމަށް އެޅިގެން ދިޔަ ހަރުދަނާ ފިޔަވަޅެކެވެ.
ނިމި ދިޔަ 2024 ވަނަ އަހަރުގެ ތެރޭގައި ދިވެހިރާއްޖޭގެ ޒަކާތު ހައުސްގެ ފަރާތުން ދިވެހި ރައްޔިތުން ޒަކާތާ ގުޅުންހުރި ކަންކަމަށް އަހުލުވެރިކޮށް ހޭލުންތެރި ކުރުމަށްޓަކައި ތަފާތު ހަރަކާތްތަކެއް ވަނީ ކުރިއަށް ގެންގޮސްފައެވެ. 
ނަތީޖާއެއްގެ ގޮތުން ދިވެހި ރައްޔިތުން ޒަކާތުގެ ކަންކަމަށް ފަރުވާތެރިވާ މިންވަރު އިތުރުވެފައިވާކަން މޯލްޑިވްސް އިންލޭންޑް ރެވެނިއު އިން އެކުލަވައިލާފައިވާ ހިސާބުތަކުން ދައްކައެވެ.