ދައުލަތުގެ މުއައްސަސާތަކުން ކަރަންޓް ބިލުގެ ގޮތުގައި ދައްކަން ޖެހޭ ފައިސާ ހޯދުމުގެ މަސައްކަތް ސްޓެލްކޯއިން ފިނޭންސް މިނިސްޓްރީއާއި ގުޅިގެން ފަށައިފި އެވެ.
ވީނިއުސްއަށް ކަށަވަރުވެފައިވާ ގޮތުގައި، ދައުލަތުގެ މުއައްސަސާތަކުން ކަރަންޓް ބިލުގެ ގޮތުގައި މިހާރު ދައްކަން ޖެހޭ 281 މިލިއަން ރުފިޔާ ހޯދުމުގެ މަސައްކަތް ފަށާފަވާއިރު، ދައުލަތުގެ މުއައްސަސާތަކާއި މިނިވަން މުއައްސަސާތަކުން ކަރަންޓް ބިލުގެ ގޮތުގައި ސްޓެލްކޯއަށް 281 މިލިއަން ރުފިޔާ ދައްކަން އޮތްކަން ހާމަކޮށް އެ ކުންފުނިން ވަނީ ރައްޔިތުންގެ މަޖިލީހުގެ މާލިއްޔަތު ކޮމެޓީއަށް ސިޓީ އެއްވެސް ފޮނުވާފަ އެވެ.
ކަރަންޓު ބިލުގެ ގޮތުގައި ފައިސާ ދައްކަން އޮތްކަމަށްވާނަމަ އެކަން ފިނޭންސް މިނިސްޓްރީއާ ގުޅިގެން ކުރާ ކަމަށް މީގެ ކުރިން ވެސް ސްޓެލްކޯއިން ވަނީ ބުނެފަ އެވެ.
އަދި ކަރަންޓު ބިލުގެ ގޮތުގައި ގިނަ އަދަދެއްގެ ފައިސާ ދައްކަން އޮވެގެން މޯލްޑިވްސް ބްރޯޑްކާސްޓިން ކޯޕަރޭޝަނާއި މާލޭ ސިޓީ ކައުންސިލުން ކަރަންޓް ކަނޑައިލާނެކަމުގެ އިންޒާރު ވެސް ސްޓެލްކޯއިން ވަނީ ދީފައެވެ. އެ ދެ ތަނުން ވެސް ކަރަންޓް ކަނޑާލާފައިނުވާއިރު، އެ މައްސަލަ ވެސް ހައްލުވެފައިވަނީ ފިނޭންސް މިނިސްޓްރީ މެދުވެރިކޮށް ގިނަ މަސައްކަތްތަކެއް ކޮށްގެންނެވެ. ކަރަންޓް ކަނޑާލަން ޖެހޭ ތަންތަނުން ކަރަންޓު ކަނޑާނުލަނީ، ސަރުކާރުގެ މުއައްސަސާތަކަކީ ރައްޔިތުންނަށް ބޭނުންވާ ގިނަ ޚިދުމަތްތަކެއް ފޯރުކޮށްދެމުންދާ ތަންތަން ކަމުގައިވާތީ ކަމަށް ބުނެ އެވެ.
ސްޓެލްކޯއިން ރައްޔިތުންގެ މަޖިލީހުގ މާލިއްޔަތު ކޮމެޓީއަށް ފޮނުވި ސިޓީގައި ބުނެފައިވަނީ، ދައުލަތުން ކަރަންޓު ބިލުގެ ގޮތުގައި ދައްކަން ޖެހޭ 281 މިލިއަން ރުފިޔާގެ ތެރޭގައި މިނިވަން މުއައްސަސާތަކުން ދައްކަން ޖެހޭ ފައިސާ ވެސް ހިމެނޭ ކަމަށެވެ. ވީ ނިއުސްއަށް އެނގިފައިވާ ގޮތުގައި އެ އަދަދަކީ މިދިޔަ މެއި މަހުގެ 31 ގެ ނިޔަލަށް ކަރަންޓް ބިލުގެ ގޮތުގައި ދައުލަތުން ދައްކަން ޖެހޭ އަދަދެވެ.
ސްޓެލްކޯއިން ފޮނުވި ސިޓީއާއި ގުޅޭ ގޮތުން މާލިއްޔަތު ކޮމެޓީގައި ވާހަކަ ދައްކަވަމުން ސްޓެލްކޯގެ ޗެއާމަން އަހުމަދު ޝަރީފު ވިދާޅުވެފައިވަނީ، ސަރުކާރުގެ މުއައްސަސާއަކުން ނަމަވެސް ކަރަންޓް ކަނޑާލަން ޖެހިއްޖެނަމަ އެކަން ކުރުމަށް ފިނޭންސް މިނިސްޓްރީން އަންގާފައިވާ ކަމަށާއި، އެކަން ކުރަމުންދަނީ އެ މިނިސްޓްރީއާއި މަޝްވަރާ ކުރުމަށް ފަހު ކަމަށެވެ. އަދި ކަރަންޓް ބިލުތަކަށް ދައްކަން ޖެހޭ ފައިސާ އެ މިނިސްޓްރީން ދޭތެރެ ދޭތެރެއިން ދައްކަމުންދާކަމަށް ވެސް އޭނާ ވިދާޅުވި އެވެ.
ކުރީ އަހަރު ތަކާއި ހިލާފަށް ބަޑިބޭހުގެ ކުޅިވަރުތައް ހިމަނައިގެން ނައިޓް މާކެޓް މިރޭ ފަށާނެ ކަމަށް އެ ބާޒާރު އިންތިޒާމް ކުރާ ކުންފުނިން ބުނެފިއެވެ.
ނައިޓް މާކެޓް އިންތިޒާމްކުރާ ގޯ މީޑީއާ މޯލްޑިވްސްގެ މެނޭޖާ އިބްރާހިމް އާމިރު ވިދާޅުވީ ނައިޓް މާކެޓް މިރޭ 8:30 ގައި ފަށާނީ އެމްއެންޑީއެފްގެ ހަވާއިއެރުވުމާއެކު ކަމަށާއި މިރެއިން ފެށިގެން 10 ދުވަސް ވަންދެން ކޮންމެ ދުވަހަކު ހަވީރު 4:00 އިން ރޭގަނޑު 12:00 އަށް ނައިޓް މާކެޓް އޮންނާނެ ކަމަށެވެ.
މިއަހަރުގެ ނައިޓް މާކެޓު ބާއްވަނީ ހެންވޭރު ރާޅުގަނޑު ސަރަހައްދުގަ އެވެ. ބާޒާރު އޮންނާނީ ޓަސްކަލޫސާއިން ފެށިގެން ސުނާމީ ބިނާ އާއި ހަމައަށް އަދި އުސްފަސްގަނޑު ސަރަހައްދުން ފެށިގެން ޓުރެކް ސަރަހައްދަށެވެ.
ކުރީ އަހަރު ތަކެކޭ އެއްގޮތަށް މި އަހަރުގެ ނައިޓް މާކެޓްގައި ވެސް ކާބޯ ތަކެތި ވިއްކުމަށް ފުޑް ކޯޓްތަކެއް ވެސް ހުންނާނެ ކަމަށާއި މިފަހަރުގެ މާކެޓްގައި 765 މޭޒު ބެހެއްޓިފައި ހުންނާނެ ކަމުގައި އާމިރު ވިދާޅުވި އެވެ. ނައިޓް މާކެޓަކީ މީގެ ކުރިން ވިޔަފާރި ވެރިންގެ ޖަމިއްޔާއިން ބާއްވަމުން ގެންދާ ބާޒާރަކަށްވީ ނަމަވެސް މިފަހަރުގެ އެ ބާޒާރު ބާއްވަނީ ގޯ މީޑިއާއިންނެވެ.