ކުރިއަށް އޮތް ރޯދަމަހާ ދިމާކޮށް ކަރަންޓް ބޭނުންކުރާ މިންވަރު އިތުރުވާނެކަމަށާއި ނަމަވެސް ކެޕޭސިޓީ ނެތިގެން ކަރަންޓް ކަނޑާލަން ނުޖެހޭނެކަމުގެ ޔަގީންކަން ދެއްވާ ކަމަށް ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ވިދާޅުވެއްޖެއެވެ.
ފަހުމީ ވިދާޅުވީ ރޯދަމަހު ގޭބީސީތަކުން ކަރަންޓް ބޭނުންކުރާ މިންވަރު އިތުރުވަމުން އަންނަކަމަށާއި އެގޮތުން މިދިޔަ އަހަރުގެ ރޯދަމަހުގެ ޕީކްގައި 114 މެގަވޮޓަށް ކަރަންޓް ބޭނުންކޮށްފައިވާކަމަށެވެ. އެއާއެކު ފަހުމީ ވިދާޅުވީ މިއަހަރު ޕީކްގައި އެ އަދަދު 132 މެގަވޮޓަށް އިތުރުވެގެންދާނެ ކަމަށް ލަފާކުރެވޭ ކަމަށެވެ.
ފަހުމީ ވިދާޅުވީ ހޫނު މޫސުންވެސް އަންނަނީ ރޯދަމަހާ ދިމާކޮށް ކަމަށާއި އެހެންކަމުން ހޫނު މޫސުމަށް އިތުރު 17 މެގަވޮޓް އިންސްޓޯލްކުރުމުގެ މަސައްކަތް މިހާރު ކުރަމުން ދާކަމަށެވެ. މި މަސައްކަތަށް ބޭނުންވާ ޓްރާންސްފޯމަރާއި، އިންޖީނާއި ކޭބަލް މިހާރު ލިބިފައިވާކަން ފާހަގަކުރައްވާ ފަހުމީ ވިދާޅުވީ މި ރޯދަމަހު ކެޕޭސިޓީ ނެތިގެން ކަރަންޓް ކަނޑާލަން ނުޖެހޭނެކަމުގެ ޔަގީންކަން ރައްޔިތުންނަށް ދެއްވާ ކަމަށެވެ.
ފަހުމީ އިތުރަށް ވިދާޅުވީ ކުރިއަށްއޮތް 8 ވަރަކަށް ދުވަހުގެ ތެރޭގައި އިންޖީނުތައް އިންސްޓޯލްކޮށް ނިމިގެންދާނެ ކަމަށާއި އެއާއެކު ހިދުމަތް ދޭން ފެށޭނެ ކަމަށްވެސް ވަނީ ވިދާޅުވެފައެވެ. މި މަސައްކަތަށް ބަހައްޓަނީ 13 މެގަވޮޓްގެ 2 ޖަނަރޭޓަރު ކަމަށްވެސް ފަހުމީ ވަނީ ވިދާޅުވެފައެވެ.
ފާހަގަކޮށްލެވޭ ގޮތުގައި ކޮންމެ އަހަރެއްގެ ވެސް ހޫނު ގަދަވާ މޫސުމުގައި ކަރަންޓު ބިލުތައް ބޮޑުވާ ކަމުގެ ޝަކުވާތައް ގިނަވެއެވެ. އަދި ރޯދަ މަހާ ދިމާކޮށް ކަރަންޓު ބޭނުންކުރާ މިންވަރު އިތުރުވާއިރު މިދިޔަ އަހަރުގެ ރޯދަ މަހު ވެސް ކަރަންޓު ބިލުތައް ބޮޑުވި ކަމުގެ ޝަކުވާތައް ގިނަކަން ފާހަގަކުރެވެއެވެ.