ތިން މީހަކު ޕީޕީއެމްގެ އޮފީހަށް ވަދެ، އެތަނުން ވައްކަން ކޮށްފައިވާކަމަށް މައުލޫމާތު ލިބިފައިވާތީ، އެ މައްސަލަ ފުލުހަށް ހުށަހަޅާފައިވާ ކަމަށް ރައީސް މައުމޫން ވިދާޅުވެއްޖެއެވެ.
1978 ވަނަ އަހަރުން ފެށިގެން 2008 ވަނަ އަހަރުގެ ނޮވެމްބަރު މަހުގެ 11 ވަނަ ދުވަހާ ހަމަޔަށް ރާއްޖޭގެ ރައީސުލްޖުމްހޫރިއްޔާކަން ކުރެއްވި ރައީސް މައުމޫން ވަނީ ޓްވިޓަރ މެދުވެރިކޮށް އެކަން ކަށަވަރުކޮށްދެއްވާފައެވެ.
އުމުރުފުޅުން 70ގެ ފަހުކޮޅުގައި އުޅުއްވާ ރައީސް މައުމޫން މިރޭ ޕީޕީއެމްގެ އޮފީހުގައި ބައްދަލުވުމެއް ބޭއްވުމަށް ރާވާފައި އޮތަސްވެސް، އެ ބައްދަލުވުން ބޭއްވޭ ގޮތް ނުވުމުން އެމަނިކުފާނު ވަނީ ޝީ ބިލްޑިންގ ގައި ނޫސްވެރިންގެ ބައްދަލުވުމެއް ބާއްވަވައި، އަނބިކަނބަލުން ނަސްރީނާ އިބުރާހީމްއާ ދެމަފިރިކަނބަލުން ވެގެން ޕީޕީއެމްގެ ފަސް ވަނަ އަހަރީ ދުވަހުގެ މުނާސަބަތުގައި ކޭކެއް ފަޅުއްވާފައެވެ.
ނިމިދިޔަ ހައެއްކަ މަސްދުވަހުގެ ތެރޭގައި ރައީސް މައުމޫން ޕީޕީއެމް ހުއްޓުވާފައި އޮތުމުގެ ސަބަބުން ސިވިލް ކޯޓުން މިހާރު ވަނީ އެ ޕާޓީގެ ހިންގުން އެ ޕާޓީގެ މުސްތަޝަރާ ހަވާލުކުރުމަށް ހުކުމް ކޮށްފައެވެ. އަދި، ހައިކޯޓުންނާއި ސުޕްރީމް ކޯޓުންވެސް ވަނީ އެ ހުކުމް ދަމަހައްޓާފައެވެ. ނަމަވެސް، ރައީސް މައުމޫން އަމަލުކުރައްވަމުން ގެންދަވަނީ ހުކުމަށް ތަބާވުމުގެ ބަދަލުގައި އެމަނިކުފާނަށް ފެނިލައްވާ ގޮތަކަށް ކަން ގިނަ ބަޔަކު ދަނީ ފާހަގަ ކުރަމުންނެވެ.
ނަމަވެސް، 2008 ވަނަ އަހަރުގެ އޮގަސްޓް މަހުގެ 7 ވަނަ ދުވަހު، ފެހި ޤާނޫނުއަސާސީ ތަސްދީޤުކުރެއްވީ ރައީސް މައުމޫނު ކަމަށް ވާއިރު، ޤާނޫނު ނެގެހެއްޓުމަށް އެމަނިކުފާނު ފުރަގަސް ދެއްވާނެކަމަށް މިހާތަނަށް އެއްވެސް މީހަކަށް ޝައްކުވެފައި ނުވާކަމަށްވެސް ބައެއް ފަރާތްތަކުން ހާމަކުރެއެވެ.