ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު ހަސަން އާދިލްއާއި ދެކޮޅަށް ދައުލަތުން އުފުލާފައިވާ ކުޑަކުއްޖަކާއި އެކު ޖިންސީ އަމަލެއް ހިންގި ކަމުގެ ކުށުގެ ދައުވާގެ މިއަދުގެ އަޑުއެހުމުގައި ދެހެކިވެރިން ހެކިބަސްދީފައިވާ ކަމަށް ކުރިމިނަލް ކޯޓުން ބުނެފިއެވެ.
ޗެނަލް ނިއުސް މޯލްޑިވްސްއަށް މައުލޫމާތު ދިން ކުރިމިނަލް ކޯޓުގެ މީޑިއާ އޮފިޝަލަކު ވިދާޅުވީ މިއަދުގެ އަޑުއެހުމަށް މެމްބަރު އާދިލް ހާޒިރުވެވަޑައިގެންނެވި ކަމަށާއި، މިއަދުގެ އަޑުއެހުމުގައި ހެކިބަސް ހުށަހަޅާފައިވަނީ އާދިލްގެ ފަރާތުން ހުށަހެޅުއްވި ދެހެކިވެރިއެއް ކަމަށެވެ.
މިމައްސަލައަކީ ކުޑަކުއްޖަކާއި ދެކޮޅަށް ޖިންސީ ގޯނާ ކުރުމުގެ ދައުވާއެއް ކަމުން، ނޫސްވެރިންނަށް މިދައުވާގެ އަޑުއެހުންތަކަށް ކޯޓަކަށް ނުވަދެއެވެ. އެހެންކަމުން ދެހެކިވެރިން ދިން ހެކިބަހުގެ ތަފްސީލެއް ލިބޭ ގޮތް ވަނީ ނުވެފައެވެ.
އާދިލްގެ މައްޗަށް ދައުލަތުން ދައުވާކޮށްފައިވަނީ ކުޑަކުދިންނަށް ޖިންސީ ގޯނާކުރާ މީހުންނާއި މެދު ހާއްސަ އުސޫލުތަކަކުން އަމަލުކުރުމުގެ ގާނޫނުގެ (ހ) އާއި ހަވާލާދީ އެމާއްދާގެ (ނ) ގެ ދަށުންނެވެ. އެގާނުނުގެ (ހ) ގައި ބުނެފައިވަނީ ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން އަތްލުމަކީ ކުށެއް ކަމަށެވެ. މިމާއްދާގެ (ނ) ގައި ބުނެފައިވަނީ މިފަދަ ކުށެއް މީހެއްގެ މައްޗަށް ސާބިތުވެއްޖެނަމަ، އޭނާގެ އަދަބަކީ 10 އަހަރާއި 14 އަހަރުގެ ޖަލު ހުކުމެއް ކަމަށެވެ.