އިދިކޮޅުން އުޅެނީ ގައުމު ހަލާކުކޮށްލަން: ގާސިމް

ސަރުކާރާއި އިދިކޮޅަށް އެކުގައި މަސައްކަތް ކުރަމުންދާ އެމްޑީޕީއާއި ޑިމޮކްރެޓްސް ޕާޓީން މަސައްކަތް ކުރަމުންދަނީ ގައުމު ހަލާކުކޮށްލުމަށް ކަމަށް ޖުމްހޫރީ ޕާޓީ (ޖޭޕީ)ގެ ލީޑަރު ގާސިމް އިބްރާހީމް ވިދާޅުވެއްޖެ އެވެ.
2018 ގައި ވެރިކަމަށް އައި އެމްޑީޕީއާ އެކު ކޯލިޝަން ހެއްދެވި ގާސިމް މިގޮތަށް ވިދާޅުވީ މިދިޔަ ނޮވެމްބަރު މަހު 17 ގައި ވަޒީރު ކަމުގެ ހުވާކުރި އާ ސަރުކާރުގެ ކެބިނެޓަށް ރުހުން ދިނުމާ ގުޅިގެން މިއަދު ދައުރުން ބޭރުން ބޭއްވި މަޖިލީހުގެ ޖަލްސާގައި ވާހަކަދައްކަވަމުން ނެވެ. މަޖިލީހުގައި މާމިގިލީ ދާއިރާ ތަމްސީލުކުރައްވާ ގާސިމް އިދިކޮޅަށް ފާޑުވިދާޅުވެ ވާހަކަދެއްކެވީ، ކެބިނެޓުގެ ބައެއް ބޭފުޅުންނަށް ރުހުން ނުދިނުމަށް އެ ޕާޓީތަކުން މަސައްކަތް ކުރަމުންދާކަމަށް ތުހުމަތު ކުރައްވަމުން ނެވެ.
"އަޅުގަނޑުމެން އަހަން ބޭރު ތެރެއިން މިވެނި ބޭފުޅުންނަށް އޭގެ ތެރެއިން މުހައްމަދު ސައީދާއި ފޮރިން މިނިސްޓަރާއި އަދި އޭގެ އިތުރަށް ހައުސިން މިނިސްޓަރާއި އެޓާނީ ޖެނެރަލް އާއި މި ބޭބޭފުޅުންނަށް ރުހުން ނުދޭނެ ކަމަށް. އެހެން ނަމަވެސް މި ބޭފުޅުންނަކީ ތައުލީމީ ގޮތުން ގާބިލު ބަޔަކަށް ނުވަނީތޯ؟ ނުވަތަ ގާނޫނުއަސާސީގައިވާ ޝަރުތެއް ފުރިހަމަނުވާ ބޭފުޅުންތޯ؟" މިދިޔަ ރިޔާސީ އިންތިހާބުގައި އެމްޑީޕީއާޢި ނުގުޅި، ޖޭޕީގެ ފަރާތުން އިންތިހާބަށް ނުކުންނެވި ގާސިމް ވިދާޅުވި އެވެ.
އަދި މި ނޫންވެސް އެހެން ބޭފުޅުން ތިބި ކަމަށް ވެދާނެ. އެކަމު އަޅުގަނޑު ދަންނަވާލަން ބޭނުންވަނީ ރައްޔިތުންގެ މަޖިލީހުގެ މެޖޯރިޓީ އޮތީމާ ހިތައް އެރިހާ ގޮތަކަށް ރައްޔިތުން ވަކި ބޭފުޅަކު ހޮވާފައިވަނިކޮށް ތިބޭފުޅުންގެ ސަރުކާރަށް އިތުބާރު ނެތީމައޭ ވަކި ބޭފުޅަކު ހޮވާފައިމިވަނީ.
ގާސިމް އިދިކޮޅުގެ އަމަލުތައް ސިފަކުރައްވަނީ "ގައުމު އިނދަ ޖައްސާލައި" "ގައުމު ހަލާކުކޮށްލުމަށް" ކުރަމުންދާ މަސައްކަތެއްގެ ގޮތުގަ އެވެ. އޭނާ ވިދާޅުވީ ވަޒީރުންނަށް ރުހުން ނުދިނުމަށް އެ ޕާޓީތަކުން މަސައްކަތް ކުރަމުންދަނީ އަމިއްލަ އެދުން ކުރިއަށް ނެރެ، މިދިޔަ ސަރުކާރުގައި މަޖިލީހުގައި ލިބުނު "ސުޕަ މެޖޯރިޓީ" ގެ ނަހަމަ ބޭނުންކޮށްގެން ނެވެ.
އޭނާ ވިދާޅުވީ ސަރުކާރަށް "ޖެއްސުން" ކުރަން ކުރާ އެފަދަ ކަންކަމުގެ ސަބަބުން "ރައްޔިތުންނަށް އެއްވެސް ކުރިއެރުމެއް" ނެތް ކަމަށެވެ.
"ގައުމު ވަރަށް ނިކަމެތި ހާލުގައޭ އޮތީ، ގައުމަށް ވަރަށް ބޮޑެތި ނުކަމެތި ކަމާއި ވޭނުގައި މިއޮތީ. ދަރަނިތައް އިންތިހާ ދަރަޖައަށް ބޮޑުވެފައިވާ ދުވަސްވަރެއްގައި މިގޮތަށް އަޅުގަނޑުމެން ޖެއްސުން ކޮށްގެން ކުރާ ކަންތައްތަކުގެ ސަބަބުން ރައްޔިތުންނަށް އެއްވެސް ކުރިއެރުމެއް ނެތް، އިނގޭތޯ." ގާސިމް ވިދާޅުވި އެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ