ސަދަން ޔޫޓިލޓީސް ކުންފުނީގެ ފަރާތުން އައްޑު އަތޮޅާއި ފުވައްމުލަކުގައި ކުރިއަށް ގެންދަން ނިންމާފައިވާ އިއާދަކުރަނިވި ހަކަތައިގެ މަޝްރޫއުގެ އަމަލީ މަސައްކަތް އިއްޔެ އައްޑޫގައި ފަށައިފި އެވެ.
މިނިވަންދުވަހާ ދިމާކޮށް އިއްޔެ މި މަޝްރޫއުގެ އަމަލީ މަސައްކަތް ފައްޓަވައި ދެއްވީ ޑިފެންސް މިނިސްޓަރުކަމަށް އައްޔަންކުރައްވާފައިވާ އަމީން ފައިސަލް އެވެ.
އައްޑު އަތޮޅުގެ މަރުކަޒީ އިންޖީނު ގޭގެ ކުރިމަތި އަދި ދެކުނުގެ ސަރަހައްދީ ބަނދަރާ އިންވެގެން ހިއްކާފައިވާ ބިމުގައި މި މަޝްރޫއު ފައްޓަވައި ދެއްވަމުން އަމީން ފައިސަލް ވަނީ ވައިން ކަރަންޓް އުފެއްދުމުގެ ޓެސްޓްތަކަށް ބުރަފަތި ހަރުކުރާ ތަން ކޮނެ ދެއްވައިފަ އެވެ.
މި ރަސްމިއްޔާތުގައި ވާހަކަ ދައްކަވަމުން ސަދަން ޔޫޓިލިޓީސް ކުންފުނީގެ ޑިރެކްޓަރުންގެ ބޯޑުގެ މެންބަރު އަހުމަދު އަސީފު ވިދާޅުވީ އިންޑިޔާގެ ސުޒުލޯން ކުންފުންޏާ ގުޅިގެން ކުރިއަށް ގެންދާ މި މަޝްރޫއު ފެށިގެން މި އަންނަނީ ވަރަށް ބޮޑެތި
މަސައްކަތްތަކަކަށް ފަހު ކަމަށާއި މިފަދަ ބޮޑު ޕްރޮޖެކްޓެއް ކުރިއަށް ގެންދިއުމަކީ ވެސް ވަރަށް ބޮޑު ޒިންމާއެއް ކަމަށެވެ. އަި މިކަމާ އެ ކުންފުނި ކުރިމަތިލަނީ ހަގީގަތަށް ހެދޭނެ ކަމުގެ ވަރަށް ބޮޑު ޔަގީންކަމެއް އޮވެގެން ކަމަށް ވެސް އޭނާ ވިދާޅުވި އެވެ.
އޭނާ ވިދާޅުވި ގޮތުގައި ވިންޑް އެސިސްޓެންސް މާސްޓް ބަހައްޓައި، ސާވޭތައް ފެށުމާ އެކު މި ސަރަހައްދަށް ވައިން ހަކަތަ އުފެއްދުމަށް ބޭނުންވާނެ ވިންޑް ޓާބައިންގެ އަދަދާއި ވިންޑް ޓާބައިންގެ ސައިޒުތައް ދެނެގަނެވޭނެ އެވެ.
ވިންޑް ޓާބައިންތައް ބެހެއްޓުމުގެ ކުރިން އެއްކުރަން ޖެހޭ މޫސުމީ މައުލޫމާތު އެއްކުރުމަށް ހިއްކި ސަރަހައްދުގައި ބަހައްޓަނީ 80 މީޓަރުގެ އުސް މާސްޓެއް ކަމަށް ވެސް ސަދަން ޔޫޓިލިޓީސް އިން ބުނެ އެވެ.
އެންމެ ދެކުނުގެ ދެ އަތޮޅުގައި ވައިން ކަރަންޓް އުފެއްދުމަށް 40 މިލިއަން ޑޮލަރު ހަރަދުކޮށްގެން 20 އަހަރުގެ މުއްދަތަށް ކުރިއަށް ގެންދާ މި މަޝްރޫއުގެ މަސައްކަތް 2012 ވަނަ އަހަރު ނިމި، މި ދެ އަތޮޅުގެ ރަށްރަށަށް ކަރަންޓް ދެވޭނެ ކަމަށް ސަދަން ޔުޓިލިޓީސް ކުންފުނިން އުއްމީދުކުރެ އެވެ. މަޝްރޫއު ނިމުމުން 25 މެގަވޮޓުގެ ކަރަންޓް ވައިން އުފެއްދޭނެ ކަމަށްވެ އެވެ.
ސުޒްލޯން ކުންފުންޏާ ގުޅިގެން ދެކުނު ޕްރޮވިންސުގައި ވައިން ހަކަތަ އުފެއްދުމުގެ މަޝްރޫއުގެ އެމްއޯޔޫގައި ސަދަން ޔުޓިލިޓީސް އިން ސޮއިކޮށްފައި ވަނީ ނޮވެމްބަރު ،6 2009 ގަ އެވެ.