އީރާނުގެ ނިއުކްލިއާ މަރުކަޒުތަކަށް އިޒްރޭލުން ހަމަލާ ދީފި ނަމަ އެކަމުގެ ޒިންމާ އުފުލަން ޖެހޭނީ އެމެރިކާ ކަމަށް އީރާނުގެ ހާރިޖީ ވަޒީރު ވިދާޅުވެއްޖެ އެވެ. މިހެން އޭނާ ވިދާޅުވީ އިޒްރޭލުން އީރާނާ ދެކޮޅަށް އަސްކަރީ ފިޔަވަޅެއް އެޅުމަށް ތައްޔާރުވަމުންދާކަމުގެ އިޝާރާތެއް ދޭ ރިޕޯޓަކާ ގުޅިގެން ނެވެ.
ޚާރިޖީ ވަޒީރު އައްބާސް އަރަގްޗީ މިހިޔާލުތައް ފާޅުކުރެއްވީ އީރާނުގެ ނިއުކްލިއާ އިންފްރާސްޓްރަކްޗާއަށް ހަމަލާދިނުމަށް އިސްރާއީލުން ތައްޔާރުވަމުންދާ ކަމަށް ބުނާ އެމެރިކާގެ އިންޓެލިޖެންސް ރިޕޯޓުތަކަށް ރައްދު ދެއްވަމުން އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސްއަށް ފޮނުއްވި ސިޓީއެއްގައެވެ.
އަރަގްޗީ ވިދާޅުވީ އިޒްރޭލުގެ ޒަޔަނިސްޓް ސަރުކާރުން އަޅާ އެއްވެސް ފަރުވާކުޑަ އަމަލަކަށް އީރާނުން ވަރަށް ބޮޑަށް އިންޒާރު ދޭ ކަމަށާއި އިޒްރޭލުގެ ފަރާތުން އެއްވެސް ނުރައްކަލެއް ނުވަތަ ގާނޫނާ ހިލާފު އަމަލަކަށް އީރާނުން ވަރަށް ބޮޑަށް ރައްދު ދޭނެ ކަމަށެވެ.
އީރާނުގެ ނިއުކްލިއާ ޕްރޮގްރާމަކީ ހަތިޔާރު އުފެއްދުމުގެ ބޭނުމުގައި ހިންގާ ޕްރޮގްރާމެއް ނޫންކަން ތެހެރާނުން އަބަދުވެސް ބުނަމުން އަންނަ އިރު، އެއީ ހަމައެކަނި މަދަނީ ބޭނުންތަކަށް ހިންގާ ޕްރޮގްރާމެއް ކަން ފާހަގަކުރެވެ އެވެ. އެހެން ނަމަވެސް ނިއުކްލިއާ ބޮމެއް އުފެއްދުމުގެ ގާބިލުކަމާ އީރާނުން ގާތްވެފައިވާ ކަމަށް އެމެރިކާ އާއި އެ ގައުމުގެ ބައިވެރިން އަންނަނީ ޒަމާނުއްސުރެ ތުހުމަތު ކުރަމުންނެވެ.
އަރަގްޗީ ވިދާޅުވީ އީރާނުގެ ނިއުކްލިއާ މަރުކަޒުތަކާ ދެކޮޅަށް އަސްކަރީ ގޮތުން އަޅާ ކޮންމެ ފިޔަވަޅެއްގައި އިޒްރޭލުގެ އެންމެ ބޮޑު ބައިވެރިޔާ ކަމަށްވާ އެމެރިކާ އަކީ "ބައިވެރިއެއް" ގެ ގޮތުގައި އީރާނުން ދެކޭ ކަމަށެވެ. އިޒްރޭލުގެ ނުރައްކާތަކުން އަރައިގަތުމަށް ދުނިޔޭގެ މުޖުތަމައުން "ހަރުދަނާ ރައްކާތެރިކަމުގެ ފިޔަވަޅުތައް" އެޅުމަށް ގޮވާލައްވަމުން އޭނާ ވިދާޅުވީ އެކަމަށް އިހުމާލުވުމަކީ އީރާނުގެ ނިއުކްލިއާ ވަސީލަތްތައް ހިމާޔަތް ކުރުމަށް ފިޔަވަޅު އަޅަން ތެހެރާނަށް މަޖުބޫރުވެދާނެ ކަމެއް ކަމަށެވެ.
"އަޅުގަނޑުމެންގެ އަމަލުތަކުގެ ބާވަތާއި ކޮންޓެންޓާއި މިންވަރާއި، އެ ޖަމިއްޔާތަކުގެ ގާނޫނީ މަސްއޫލިއްޔަތާއި ވާޖިބުތަކާ އެއްގޮތްވާ ގޮތުގެ މަތިން މި ބައިނަލްއަގްވާމީ ޖަމިއްޔާތަކުން އަޅާ ރައްކާތެރިކަމުގެ ފިޔަވަޅުތަކާ އެއްގޮތްވާނެ،" އޭނާ ވިދާޅުވި އެވެ.
މި އިންޒާރު ދީފައި މިވަނީ އީރާނާއި އެމެރިކާއާ ދެމެދު ހުކުރު ދުވަހު ރޯމްގައި ބޭއްވުމަށް ހަމަޖެހިފައިވާ ނުސީދާ މަޝްވަރާތަކުގެ ފަސް ވަނަ ބުރުގެ ކުރިންނެވެ. މި މަޝްވަރާތަކުގެ މަގުސަދަކީ ދަތިކުރުމުގެ ފިޔަވަޅުތަކަށް ލުޔެއް ދިނުމުގެ ބަދަލުގައި ތެހެރާނުން ޔޫރޭނިއަމް ފައްކާކުރުމުގެ ޕްރޮގްރާމް ހުއްޓުވާނެ އެއްބަސްވުމެއް އަލުން އިއާދަކުރުމެވެ. ނަމަވެސް އިޒްރޭލުން ދަނީ އެފަދަ އެއްވެސް އެއްބަސްވުމަކަށް ދިއުމާ ވަރަށް ބޮޑަށް ދެކޮޅު ހަދަމުންނެވެ. އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އާއި އެހެނިހެން އޮފިޝަލުން ތަކުރާރުކޮށް ވިދާޅުވަމުން ގެންދަވަނީ އީރާނަށް ނިއުކްލިއާ ހަތިޔާރު ހޯދުމުގެ ފުރުސަތު އިޒްރޭލުން ނުދޭނެ ކަމަށާއި ބޭނުންވެއްޖެ ނަމަ އަސްކަރީ ފިޔަވަޅު އަޅާނެ ކަމަށެވެ.
އިސްލާމިކް ރިވޮލިއުޝަނަރީ ގާޑް ކޯ (އައިއާރްޖީސީ) އިން ވެސް ވަނީ އިޒްރޭލަށް ވަކިން އިންޒާރު ދީ، ކޮންމެ ހަމަލާއަކަށް ނުރައްކާތެރި އަދި ހަރުދަނާ ޖަވާބެއް ދޭނެ ކަމުގެ ޔަގީންކަން ދީފަ އެވެ. އައިއާރްޖީސީގެ ތަރުޖަމާނު އަލީ މުހައްމަދު ނައިނީ އީރާނުގެ ދައުލަތުގެ މީޑިއާއަށް ވިދާޅުވީ އެމީހުން މަސައްކަތް ކުރަނީ ހަނގުރާމައިން އަހަރެމެން ބިރުގަންނުވަން ކަމަށާއި ނަމަވެސް ހަނގުރާމައިގެ ހާލަތުގައި އިސްލާމިކް ރިޕަބްލިކަށް ލިބޭނެ ބާރުގަދަ މަގުބޫލު އަދި އަސްކަރީ އެއްބާރުލުން ނޭނގޭތީ އެމީހުން އޮޅުވާލަނީ ކަމަށެވެ.