އުރީދޫ މޯލްޑިވްސްއިން ކުރިއަށްގެންދާ "ހިނގާ" ޕްރޮމޯޝަންގެ ދެވަނަ ގުރުއަތުލުމަށް އެއް މަސް ދުވަހަށް ވެއްޖެއެވެ. މިއީ އުރީދޫގެ ޚިދުމަތްތައް ބޭނުންކުރާ ކަސްޓަމަރުންގެ ތެރެއިން ގުރުއަތުން ހޮވޭ ފަރާތްތަކަށް އޭޓީވީ (އޯލް-ޓެރެއިން ވެހިކަލް) ދިނުމަށް އެ ކުންފުނިން ފަށާފައިވާ ޚާއްސަ ޕްރޮމޯޝަންއެކެވެ. މި އަހަރުގެ ނިޔަލަށް ކުރިއަށްގެންދާ މި ޕްރޮމޯޝަނުގައި ޖުމްލަ ހަ އޭޓީވީ ދިނުމަށް ވަނީ ހަމަޖެހިފައެވެ. ކޮންމެ ދެ މަހަކުން އެއްފަހަރު ގުރުއަތުލުން ބާއްވާއިރު، ފުރަތަމަ އޭޓީވީ ލިބުނު ނަސީބުވެރިޔާ، ނ. ހޮޅުދޫ، ހަސަން ނިޝާން ދާދި ފަހުން ވަނީ އިއުލާންކޮށްފައެވެ. ފުރަތަމަ ނަސީބުވެރިޔާ ހޮވުމާއެކު، ކުރިއަށް އޮތް ދެވަނަ ގުރުއަތުލުމަށް ކަސްޓަމަރުންގެ މެދުގައި އޮތް ތަރުހީބު ވަނީ އިތުރުވެފައި ކަމަށް އުރީދޫން ބުންޏެވެ. އުރީދޫން ބުނާ ގޮތުގައި އޭޓީވީއަކީ ރާއްޖޭގެ ރަށްފުށުގެ ދިރިއުޅުމާއި ތިމާވެއްޓާ ގުޅޭ، ބޭނުންތެރި އުޅަނދަކަށް ވާތީ، މިއީ ކަސްޓަމަރުންނަށް ލިބޭނެ ވަރަށް އަގުހުރި އިނާމެކެވެ. މި ޕްރޮމޯޝަނުގައި ބައިވެރިވުމުގެ ފުރުސަތު އުރީދޫގެ ހުރިހާ ކަސްޓަމަރުންނަށް ވެސް ވަނީ ހުޅުވާލާފައެވެ. ގުރުއަތުލުމުގައި ބައިވެރިވެވޭނީ، ގުރުއަތުލުން ބޭއްވުމުގެ ކުރިން ހިނގާ 60 ދުވަހުގެ ތެރޭގައި އުރީދޫގެ ޚިދުމަތްތަކަށް މަހަކު މަދުވެގެން 400 ރުފިޔާ ހޭދަކުރާ ކަސްޓަމަރުންނަށެވެ. މީގެ ތެރޭގައި ޕްރީޕެއިޑް ރީޗާޖުކުރުމާއި، ޕޯސްޓްޕެއިޑް ބިލު ދެއްކުމުގެ އިތުރުން ސުޕަނެޓް، ފަސޭހަ އަދި 5ޖީ އެއާފައިބާ ފަދަ ޚިދުމަތްތަކަށް ކުރާ ހޭދަ ހިމެނެއެވެ. އަދި އެޑް-އޮން އާއި ޑޭޓާ ޕެކްތައް އެކްޓިވޭޓްކުރާ ފަރާތްތަކަށް ވެސް މި ޝަރުތު ފުރިހަމަވާނަމަ ގުރުއަތުގައި ބައިވެރިވެވޭނެއެވެ. އުރީދޫން މައުލޫމާތު ދޭ ގޮތުގައި، ގުރުއަތުލާ ދުވަހާ ހަމައަށް ކަސްޓަމަރުންގެ ޚިދުމަތްތައް މެދުނުކެނޑި އެކްޓިވްކޮށް ހުންނަން ޖެހޭނެއެވެ. އަލަށް ގުޅޭ ކަސްޓަމަރުންނާއި މިހާރުވެސް ޚިދުމަތް ހޯދަމުންދާ ކަސްޓަމަރުންނަށް ވެސް ބައިވެރިވެވޭ މި ޕްރޮމޯޝަންއަކީ، ކަސްޓަމަރުން ދުވަހުން ދުވަހަށް ބޭނުންކުރާ ޚިދުމަތްތަކުގެ އަގުވަޒަންކޮށް، އެ ފަރާތްތަކަށް އިތުރު ފައިދާތަކެއް ހޯދައިދިނުމުގެ މަގުސަދުގައި ކުރިއަށްގެންދާ ހަރަކާތެއް ކަމަށް އެ ކުންފުނިން ބުނެއެވެ. މީގެ އިތުރުން، ފުރަތަމަ ފަސް ގުރުއަތުލުމުން އިނާމު ލިބޭ ފަރާތްތަކަށް ވެސް، އަހަރު ނިމޭއިރު ބާއްވާ ގްރޭންޑް ޕްރައިޒް ގުރުއަތުލުމުގައި ބައިވެރިވުމުގެ ފުރުސަތު އޮންނާނެ ކަމަށް އުރީދޫން ވަނީ ހާމަކޮށްފައެވެ.