ރާއްޖޭގެ ފަތުރުވެރިކަމުގެ ތާރީހުގައި އެއް ދުވަހެއްގެ ތެރޭގައި އެންމެ ގިނަ ފަތުރުވެރިން ރާއްޖެއަށް އައި ދުވަހުގެ ރެކޯޑު އިއްޔެ އަނެއްކާވެސް އާކޮށް، މި މަހުގެ ތެރޭގައި މި ރެކޯޑު އާކުރި ތިންވަނަ ފަހަރަށް ވެއްޖެ އެވެ.
ވީ ކިހިނެއް؟ - ޓޫރިޒަމް މިނިސްޓްރީން މިއަދު އާންމުކޮށްފައިވާ ތަފާސްހިސާބުތަކަށް ބަލާއިރު:
އިއްޔެ 11،136 ފަތުރުވެރިން ރާއްޖެ އައި
މީގެ ކުރިން މި މަހުގެ ތެރޭގައި ރެކޯޑު އާކޮށްފައިވަނީ 1 އަދި 8 ފެބްރުއަރީގައި؛ 1 ފެބްރުއަރީގައި 10،253 ފަތުރުވެރިން އަދި 8 ފެބްރުއަރީގައި 10،462 ފަތުރުވެރިން އައި
ތަފްސީލް - މިނިސްޓްރީގެ ތަފާސްހިސާބުތައް ދައްކާ ގޮތުން، މި އަހަރުގެ މިހާތަނަށް ޖުމްލަ 349،990 ފަތުރުވެރިން ރާއްޖެއަށް ޒިޔާރަތްކޮށްފައިވެ އެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު %7.6ގެ ކުރިއެރުމެކެވެ. އަދި މިހާރު ދުވާލެއްގެ މައްޗަށް އެވްރެޖްކޮށް 7,777އަށް ވުރެ ގިނަ ފަތުރުވެރިން ރާއްޖެ އާދެ އެވެ.
ރާއްޖެއަށް މިހާރު އެންމެ ގިނައިން ފަތުރުވެރިން އަންނަ 10 ގައުމު:
ޗައިނާ - 49,704 ފަތުރުވެރިން
ރަޝިއާ - 40,141 ފަތުރުވެރިން 
އިޓަލީ - 34,320 ފަތުރުވެރިން 
އިނގިރޭސިވިލާތް - 32،563 ފަތުރުވެރިން 
ޖަރުމަނު - 21،558 ފަތުރުވެރިން 
އިންޑިއާ - 19،920 ފަތުރުވެރިން 
ފްރާންސް - 11،998 ފަތުރުވެރިން 
އެމެރިކާ - 9،524 ފަތުރުވެރިން 
ޕޮލެންޑް - 8،960 ފަތުރުވެރިން 
އޮސްޓްރިއާ - 7،348 ފަތުރުވެރިން 
ފަތުރުވެރިން ރާއްޖޭގައި މަޑުކުރާ ތަންތަނަށް ބަލާއިރު، %68.1 ފަތުރުވެރިން ރިސޯޓުތަކުގައި މަޑުކޮށްފައިވެ އެވެ. ގެސްޓްހައުސްތަކުގައި 26.9 ފަތުރުވެރިން މަޑުކުރިއިރު، ހޮޓާތަކުގައި %2.8 އަދި ސަފާރީ އުޅަނދުފަހަރުގައި %2.1 ފަތުރުވެރިން ވަނީ ވަގުތު ހޭދަކޮށްފަ އެވެ.
އެނގުން މުހިންމު - ސަރުކާރުގެ އަމާޒަކީ މި އަހަރު ނިމޭއިރު ރާއްޖެއަށް ޖުމްލަ 2.5 މިލިއަން ފަތުރުވެރިން ގެނައުމެވެ.