ރާއްޖޭގެ ޓޫރިޒަމްގެ ތާރީހުގައި އެއް ދުވަހެއްގެ ތެރޭގައި އެންމެ ގިނަ ޓޫރިސްޓުން އައި ރެކޯޑު އިއްޔެ އާކޮށްފިއެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން އިއްޔެ އެކަނިވެސް ރާއްޖެއަށް 11،136 ޓޫރިސްޓުން ވަނީ އައިސްފައެވެ. މިއީ މި މަހުގެ ކުރީކޮޅު ގާއިމުކުރި 10،462 ޓޫރިސްޓުންގެ ރެކޯޑު މުގުރާލި ފަހަރެވެ.
މި އަހަރުގެ މިހާތަނަށް ރާއްޖެއަށް 349،990 އަށްވުރެ ގިނަ ޓޫރިސްޓުން އައިސްފައިވާއިރު، މިއީ މިދިޔަ އަހަރުގެ މި މުއްދަތާ އަޅާކިޔާއިރު 7.5 ޕަސަންޓު އިތުރުވުމެކެވެ. ރާއްޖެއަށް އެންމެ ގިނަ ޓޫރިސްޓުން އެތެރެވަނީ ވެލާނާ އިންޓަނޭޝަނަލް އެއާޕޯޓުންނެވެ. އޭގެ އިތުރުން މާފަރު އިންޓަނޭޝަނަލް އެއާޕޯޓާއި ގަން އިންޓަނޭޝަނަލް އެއާޕޯޓުންވެސް ގިނަ އަދަދެއްގެ ޓޫރިސްޓުން އަންނަނީ އެތެރެވަމުންނެވެ.
ވެލާނާ އެއާޕޯޓުގެ އާ އިންޓަނޭޝަނަލް ޓާމިނަލްގެ ހިދުމަތްތަކާއެކު ޓޫރިސްޓުން އަންނަ އަދަދު އިތުރުވާނެ ކަމަށް ވަނީ ލަފާކޮށްފައެވެ. އެމްއެމްއޭގެ ރިޕޯޓުތަކުން ދައްކާގޮތުގައި މި އަހަރު ނިމޭއިރު ޖުމްލަ 2.4 މިލިއަން ޓޫރިސްޓުން ރާއްޖެއަށް އަންނާނެ ކަމަށް އަންދާޒާ ކުރެވެއެވެ. މިހާރު ރާއްޖޭގައި 179 ރިސޯޓާއި 900 އަށްވުރެ ގިނަ ގެސްޓް ހައުސް އަންނަނީ ހިންގަމުންނެވެ.