މިދިޔަ ބުރާސްފަތި ދުވަހު ރައްޔިތުންގެ މަޖިލީހުން ފާސްކުރި ސިޔާސީ ޕާޓީތަކުގެ ބިލްގައި އަމިއްލަ އެއްވެސް ހިޔާލެއް ހިމެނިފައިނުވާނެ ކަމަށް އެ ބިލް ދިރާސާކުރި މިނިވަން މުއައްސަސާ ކޮމިޓީގެ މުގައްރިރު އަދި ކުޅުދުއްފުށީ ދެކުނު ދާއިރާގެ މެމްބަރު މުހަންމަދު ނަޝީދު މިއަދު ވިދާޅުވެއްޖެ އެވެ. ޕާޓީއެއްގައި 10،000 މެމްބަރުން ނެތް ނަމަ އެ ޕާޓީއެއް އުވޭ ގޮތަށް ސިޔާސީ ޕާޓީގެ ބިލް ފާސްކޮށްފައި ވާއިރު އެ ގޮތަށް ނިންމުމުގައި ނަޝީދުގެ ހިޔާލު ހިމެނޭ ކަމަށް ދެކެވޭ ވާހަކަތަކާ ގުޅިގެން ނަޝީދުގެ ބްލޮގްގައި އާންމު ކުރެއްވި ވީޑިއޯ ބަޔާނެއްގައި ވިދާޅުވީ އޭނާ އަކީ ހަމައެކަނި މުގައްރިރު ކަމަށެވެ. "އަޅުގަނޑުގެ އަމިއްލަ ހިޔާލު މި ބިލްގައި ހުރި މައިގަނޑު އުސޫލުތަކާ ތަފާތު. ހަމައެކަނި 10،000 މެމްބަރުންގެ އަދަދަކު ނޫން. އެހެން ނަމަވެސް ފައިސާ ދިނުމުގައި އަމަލުކުރާނެ ގޮތް ކަމަށް ވިޔަސް، ބިން ދޫކުރުމުގައި އަމަލުކުރާނެ ގޮތް ކަމަށް ވިޔަސް ޕާޓީތައް އުވާލުމުގައި އަމަލުކުރާ ގޮތް ކަމަށް ވިޔަސް ދަފްތަރަށް ބެލުމުގެ އުސޫލަށް ކަމަށް ވިޔަސް މި ކަހަލަ ބައިވަރު ކަންތައްތަކުގައި އަޅުގަނޑުގެ އަމިއްލަ ހިޔާލު ތަފާތު،" ހަތް މިނިޓްގެ ވީޑިއޯގައި ނަޝީދު ވިދާޅުވި އެވެ. އެހެން ނަމަވެސް ނަޝީދު ވިދާޅުވީ ބިލް ފާސްކޮށްފައި ވަނީ އޭނާ މުގައްރިރުކަން ކުރައްވާ ކޮމިޓީގައި ވޯޓު ދެއްވޭ ގޮތަށް ތިއްބެވި 10 މެމްބަރުންގެ ތެރެއިން އަށް މެމްބަރުންގެ ތާއީދާއެކު ކަމަށްވާއިރު އެ ޑްރާފްޓް ދިފާއު ކުރެއްވުމަކީ މުގައްރިރު ކުރައްވަން ޖެހިވަޑައިގަންނަވާ ކަމެއް ކަމަށެވެ. ސިޔާސީ ޕާޓީގެ ބިލަކީ ކުރީގެ ރައީސް މުހަންމަދު ނަޝީދުގެ ސަރުކާރުން 2010 ގައި ރައްޔިތުންގެ މަޖިލީހަށް ހުށަހެޅި ބިލެކެވެ. ނަޝީދު ވިދާޅުވީ ޕާޓީއެއްގައި 10،000 މެމްބަރުން ތިބެންވާނެ ކަމުގެ ވާހަކަތައް ދެކެވެން ފެށީ ކޮމިޓީގެ ވަރަށް ފަހުގެ މަރުހަލާއެއްގައި ކަމަށެވެ. އޭނާ ވިދާޅުވީ ސިޔާސީ ޕާޓީއެއް ރަޖިސްޓްރީ ކުރަން ވަކި އަދަދެއް އަދި ފައިސާ ދޫކުރަން ވަކި އަދަދަކަށް މެމްބަރުން ތިބެންވާނެ ކަމަށް ކޮމިޓީ އަށް އެއްބަސްވެވުނު ކަމަށެވެ. އެ އުސޫލުން 5،000 މީހުން ތިބޭ ނަމަ ޕާޓީއެއް ރަޖިސްޓްރީ ކުރެވިދާނެ ކަމަށާއި އެ އަދަދަށް މީހުން ތިބޭ ނަމަ އެ ޕާޓީއެއް އުވާނުލައި ދެމެހެއްޓޭނެ ކަމަށް ކޮމިޓީން އެއްބަސްވި ކަމަށް ނަޝީދު ވިދާޅުވި އެވެ. އެކަމަކު އޭރު އެއްބަސްވީ ފައިސާ ދޫކުރަން ވާނީ ޕާޓީގެ ދަފްތަރުގައި 10،000 މީހުން ހަމަވުމުން ކަމަށް އޭނާ ވިދާޅުވި އެވެ. އެ ގޮތަށް އެކަން ކޮމިޓީން ނިންމައި އާންމުކޮށް އިއުލާން ކުރި ކަމަށް ވެސް ނަޝީދު ވިދާޅުވި އެވެ. އޭނާ ވިދާޅުވީ ވަކި އަދަދަކަށް މެމްބަރުން ތިބޭ ޕާޓީތަކަށް ފައިސާ ދޫކުރަން ނިންމުމުން ހަމަހަމަކަމުގެ އުސޫލާ ހިލާފުވާ ކަމެއް ފަހުގެ މަރުހަލާއެއްގައި މެމްބަރުންނަށް ފާހަގަ ކުރެވިގެން ޕާޓީއެއް ރަޖިސްޓްރީ ކުރުމަށް ވެސް އަދި އެ ޕާޓީއެއް އުވާނުލައި ދެމެހެއްޓުމަށް ވެސް 10،000 މެމްބަރުން ތިބެން ވާނެ ކަމަށް މެމްބަރުންނަށް އެއްބަސްވެވުނީ ކަމަށް ނަޝީދު ވިދާޅުވި އެވެ. އަދި އެ ގޮތަށް ކޮމިޓީން ނިންމީ ވަކިވަކި މެމްބަރުން ބިލަށް ހުށަހެޅުއްވި އިސްލާހުތަކާ އެކުގަ އެވެ. "އެ ގޮތަށް ހުށަހެޅުނު ތަފާތު ފަސް ހުށަހެޅުމެއް. މިސާލަކަށް އަހުމަދު ހަމްޒާ ހުށަހަޅުއްވައި އަލީ ވަހީދު ތާއީދު ކުރެއްވި ހުށަހެޅުމެއް 10،000 މެމްބަރުންނަށް ޕާޓީ ރަޖިސްޓްރީ ކުރެވޭ ގޮތަށް. އަދި ޕާޓީ ދެމެހެއްޓޭނީ ވެސް 10،000 މެމްބަރުން ތިބެގެން ކަމަށް. އެހީ ދޭނީ ވެސް 10،000 މެމްބަރުން ތިބޭ ޕާޓީއަށް ކަމަށް. އަބްދުﷲ ޔާމީން ހުށަހަޅުއްވައި އަހުމަދު އަބްދުﷲ ތާއީދު ކުރެއްވި ޕާޓީގެ ދަފްތަރަށް ބަލައިގެންނޭ ފައިސާ ދޫކުރުމުގައި ފޯމިއުލާ ކަނޑައަޅާނީ. ހަމަ އެ ގޮތަށް އަލީ ވަހީދު ހުށަހަޅުއްވައި މުހަންމަދު މުޖުތާޒް ތާއީދު ކުރެއްވި 10،000 މީހުން ހަމަވާ ޕާޓީއެއް ކަމަށް ވާ ނަމަ މާލެއިން ކޮންވެސް އުސޫލަކުން ބިން އެ މީހުންނަށް ހަމަޖައްސަން ވާނެ ކަމަށް އޮފީސް ހިންގުމަށް. އަހުމަދު ހަމްޒާ ހުށަހަޅުއްވައި އަލީ ވަހީދު ތާއީދު ކުރެއްވި 10،000 މީހުން ހަމަކުރުމަށްޓަކައި މި ގާނޫނަށް އަމަލުކުރަން ފަށާއިރު މިހާރު ވެސް ހުރި ޕާޓީތަކަށް ތިން މަސް ދުވަހުގެ ފުރުސަތެއް ދޭންވާނެ ކަމަށް. ހަމަ އެ ގޮތަށް އަބްދުﷲ ޔާމީން ހުށަހަޅުއްވައި އަހުމަދު އަބްދުﷲ ތާއީދު ކުރައްވަނީ މި އަހަރު ފާސްވާ ބަޖެޓުން ޕާޓީތަކަށް ފުރަތަމަ ފައިސާ ދޫކުރާއިރު، ފައިސާ ދޫކުރަން ވާނީ 10،000 މީހުން ހަމަވާ ޕާޓީތަކަށް ކަމަށް. އެހެން ޕާޓީތަކަށް ތިން މަސް ދުވަހުގެ ފުރުސަތު ދީފައި ކަމަށް ފައިސާ ދޫކުރަން ވާނީ،" ނަޝީދު ވިދާޅުވި އެވެ. އޭނާ ވިދާޅުވީ އެ ފަސް ހުށަހެޅުމަކީ ފަސް ނުކުތާ ކަމަށް ބަލައި މައިގަނޑު އެއް ހުށަހެޅުމަކަށް ހަދައި އެއަށް ވޯޓަށް އަހަން ކޮމިޓީގައި ވާހަކަ ދެއްކެވުނު ކަމަށެވެ. އެހެންވެ ފަސް އިސްލާހުގެ މައްޗަށް މައިގަނޑު އެއް ހުށަހެޅުމެއް ހުށަހަޅައި ކޮމިޓީން އެ ގޮތަށް ނިންމަން ހުށަހެޅުއްވީ ހެންވޭރު ދެކުނު ދާއިރާގެ ހާމިދު އަބްދުލް ޣަފޫރެވެ. އެއަށް ތާއީދު ކުރެއްވީ މުޖުތާޒް ކަމަށް ނަޝީދު ވިދާޅުވި އެވެ. އަދި އެ ގޮތަށް ކޮމިޓީ އަށް ހުށަހަޅައި، ވޯޓުލެވޭ ގޮތަށް ތިއްބެވި އަށް މެމްބަރުންގެ ތާއީދާއެކު ބިލް ކޮމިޓީން ނިންމެވީ ކަމަށް ނަޝީދު ވިދާޅުވި އެވެ. "އެ ވޯޓުގައި ބައިވެރިވީ އެއް ޕާޓީއެއް، ދެ ޕާޓީއެއް ނޫން. ތަފާތު ޕާޓީތައް،" އޭނާ ވިދާޅުވި އެވެ. ޕާޓީއެއްގައި 10،000 މެމްބަރުން ނެތް ނަމަ ޕާޓީއެއް ރަޖިސްޓްރީ ނުކުރެވޭ ގޮތަށް ބިލް ފާސްކުރުމުން ބައެއް ކުދި ޕާޓީތަކުން ވަނީ ކަންބޮޑުވުން ފާޅުކުރަން ފަށައިފަ އެވެ. މިހާތަނަށް 16 ޕާޓީއެއް ރަޖިސްޓްރީކޮށްފައިވާއިރު 10،000 މީހުން ހަމަވަނީ އެންމެ ހަތަރު ޕާޓީއެއްގަ އެވެ. ނަޝީދުގެ ވާހަކަފުޅު