ތައިލެންޑަށް އެތެރެވުމުގައި އަމަލުކުރަމުން އައި ވިސާގެ އުސޫލުތަކަށް ބޮޑެތި ބަދަލުތަކެއް ގެނެސް، ވިސާއާ ނުލައި އެ ގައުމުގައި ދިވެހީންނަށް ތިބެވޭ މުއްދަތު ކުޑަކޮށްފިއެވެ. މި މަހުގެ ތެރޭގައި ތައިލެންޑުގެ ސަރުކާރުން ފާސްކުރި އާ އުސޫލުގެ ދަށުން، ގިނަ ގައުމުތަކުގެ ރައްޔިތުންނަށް ވިސާއާ ނުލައި ތިބެވޭނީ 30 ދުވަހުގެ މުއްދަތަކަށެވެ. ނަމަވެސް، “ވަން ކަންޓްރީ، ވަން ޕްރިވިލެޖް” ނުވަތަ ކޮންމެ ގައުމަކަށްވެސް ވަކި ޚާއްސަ އިނާޔަތެއް ދިނުމުގެ މޮޑެލްގެ ދަށުން، ދިވެހިރާއްޖެ ހިމަނާފައިވަނީ އެންމެ ކުރު މުއްދަތު ލިބޭ ކެޓަގަރީގައެވެ. އެހެންކަމުން، މިހާރު ދިވެހިންނަށް ދެން ވިސާއާ ނުލައި ތައިލެންޑުގައި މަޑުކުރެވޭނީ އެންމެ 15 ދުވަހަށެވެ. މިއީ ދިވެހި ފަތުރުވެރިންނަށާއި، ބޭސްފަރުވާއަށް އެ ގައުމަށް ދަތުރުކުރާ ފަރާތްތަކަށް ކުރިމަތިވާނެ ބޮޑު ގޮންޖެހުމެއް ކަމަށް ބެލެވެއެވެ. މި ބަދަލަކީ ތައިލެންޑުގެ އިމިގްރޭޝަން ނިޒާމު ހަރުދަނާކުރުމަށް އެ ގައުމުގެ ފޮރިން މިނިސްޓްރީން ފެށި މަސައްކަތުގެ ތެރެއިން ގެނައި ބަދަލެކެވެ. https://www.sun.mv/221963 މީގެ ކުރިން، 2024 ވަނަ އަހަރުގެ ޖުލައި މަހުން ފެށިގެން ތައިލެންޑުން އައީ ދިވެހިރާއްޖެ ހިމެނޭ ގޮތަށް 93 ގައުމެއްގެ ރައްޔިތުންނަށް 60 ދުވަހުގެ ވިސާ ފްރީ މުއްދަތެއް ދެމުންނެވެ. މި ސްކީމަކީ ކުރީގެ ބޮޑުވަޒީރު ސްރެތާ ތަވީސިންގެ ސަރުކާރުން ފަތުރުވެރިކަން ކުރިއެރުވުމުގެ ބޭނުމުގައި ތައާރަފުކުރި ސްކީމެކެވެ. މިކަމުގެ ސަބަބުން ދިގު މުއްދަތަކަށް ޗުއްޓީ ހޭދަކުރާ ފަރާތްތަކަށާއި، ރިމޯޓްކޮށް މަސައްކަތްކުރާ ފަރާތްތަކަށް ބޮޑެތި ފަސޭހަތަކެއް ލިބިގެންދިޔައެވެ. ނަމަވެސް، ތައިލެންޑުގެ ފޮރިން މިނިސްޓްރީން ހާމަކޮށްފައިވާ ގޮތުގައި، މި އުސޫލު ބަދަލުކުރަން ނިންމީ ގަވާއިދާ ހިލާފަށް އެ ގައުމުގައި މަޑުކުރާ މީހުންނާއި، ގަވާއިދާ ހިލާފަށް ވިޔަފާރިކުރާ މީހުންގެ މައްސަލަތައް އިތުރުވުމާ ގުޅިގެންނެވެ. ހާއްސަކޮށް އޮންލައިން ސްކޭމް ނެޓްވޯކްތައް ހިންގާ ފަރާތްތަކުން މި 60 ދުވަހުގެ ވިސާގެ ނާޖާއިޒު ފައިދާ ނަގަމުންދާކަން ކަމާބެހޭ ފަރާތްތަކަށް ވަނީ ފާހަގަކުރެވިފައެވެ. މީގެ އިތުރުން، ގައުމީ ސަލާމަތަށް ހުރި ނުރައްކާތައް ކުޑަކުރުމާއި، “ކޮލިޓީ ޓޫރިސްޓުން” ނުވަތަ ފެންވަރު ރަނގަޅު ފަތުރުވެރިންނަށް އަމާޒުކޮށްގެން ސިޔާސަތުތައް ބައްޓަންކުރުމަކީވެސް މި ބަދަލު ގެނައި މައިގަނޑު އެއް ސަބަބު ކަމަށް އެ މިނިސްޓްރީން ވިދާޅުވެފައިވެއެވެ. އާ އުސޫލާއެކު، 60 ދުވަހުގެ ސްކީމް މިހާރު ވަނީ މުޅިން އުވާލާފައެވެ. މީގެ އިތުރުން، ތައިލެންޑަށް އެތެރެވާއިރު ދައްކަންޖެހޭ ލިޔެކިޔުންތައްވެސް އިތުރަށް ހަރުކަށިކުރުމަށް ވަނީ ނިންމާފައެވެ. އެގޮތުން، ހޮޓާ ބުކިން އާއި، އެނބުރި ދާނެ ޓިކެޓު، އަދި ދަތުރަށް ބޭނުންވާ ފައިސާ ހުރިކަން ކަށަވަރުކުރުމަށް އިމިގްރޭޝަން އޮފިސަރުން އިތުރަށް ސަމާލުކަން ދޭނެއެވެ. މި ބަދަލުގެ ސަބަބުން އެންމެ ބޮޑު އަސަރެއް ކުރާނެ އެއް ބަޔަކީ ދިވެހިންނެވެ. ހާއްސަކޮށް ބޭސްފަރުވާއަށާއި، ވިޔަފާރިކުރުމަށާއި، ކުރު ޗުއްޓީތަކަށް ތައިލެންޑަށް ދަތުރުކުރާ ދިވެހިންނަށް މިކަމުގެ ދަތިތަކާ ކުރިމަތިލާން ޖެހޭނެއެވެ. ފަނަރަ ދުވަހުގެ މުއްދަތަކީ ބޮޑެތި ބަލިތަކަށް ފަރުވާ ހޯދުމަށް ނުވަތަ އޮޕަރޭޝަންތަކަށްފަހު ޑޮކްޓަރަށް ދެއްކުމަށް މަޑުކުރަންޖެހޭ ހާލަތްތަކުގައި އެކަށީގެންވާ މުއްދަތަކަށް ނުވުމުން، ދަތުރު ރޭވުމުގައި އިތުރު ސަމާލުކަމެއް ދޭން ޖެހޭނެއެވެ. މި ބަދަލާއެކު ދިވެހިންނަށް ކުރިމަތިވާނެ މައިގަނޑު ކަންތައްތަކުގެ ތެރޭގައި: ފަނަރަ ދުވަހަށްވުރެ ދިގު މުއްދަތަކަށް މަޑުކުރާނަމަ ކުރިއާލައި ވިސާއަށް އެދެން ޖެހުން. ވިސާގެ ކަންކަމަށް ހޭދަވާ ފައިސާ އިތުރުވެ، ދަތުރުގެ ޖުމްލަ ހަރަދު ބޮޑުވުން. އެޕްލިކޭޝަނަށް ފީއެއްގެ ގޮތުގައި 1,000 ތައި ބާތު (30 ޔޫއެސް ޑޮލަރު) ދައްކަން ޖެހޭނެ. ކުއްލި ހާލަތްތަކުގައި ދަތުރުކުރުމަށް އޮންނަ ފަސޭހަކަން ކުޑަވުމާއި، ދަތުރު ރޭވުމަށް ގިނަ ވަގުތު ހޭދަވުން. ގިނަ ދިވެހިންނަކީ ވިޔަފާރި މުދާ ގަތުމަށާއި، އާއިލާއާއެކު ޗުއްޓީ ހޭދަކުރުމަށް ގިނަ ދުވަސްތަކެއް ވަންދެން ތައިލެންޑުގައި މަޑުކުރާ ބަޔަކަށް ވާއިރު، މި އާ އުސޫލުގެ ދަށުން އެފަދަ ދަތުރުތަކަށް ބޮޑެތި ހުރަސްތަކެއް އެޅިގެންދާނެއެވެ. އާ އުސޫލަށް އަމަލުކުރަން ފެށުމުގެ ކުރިން، މިހާރު ތައިލެންޑުގައި ތިބި ފަތުރުވެރިންނަށް، އެ މީހުންނަށް ލިބިފައިވާ މުއްދަތު ހަމަވަންދެން އެ ގައުމުގައި މަޑުކުރެވޭނެ ކަމަށް ކަމާބެހޭ ފަރާތްތަކުން ވަނީ އަންގާފައެވެ. ނަމަވެސް، އާ ނިޒާމަށް އަމަލުކުރަން ފެށުމަށްފަހު، 15 ދުވަހަށްވުރެ ދިގު މުއްދަތަކަށް ތައިލެންޑަށް ދަތުރުކުރާ ދިވެހިން ޖެހޭނީ ތައިލެންޑުގެ އީ-ވިސާ ޕްލެޓްފޯމް މެދުވެރިކޮށް ކުރިއާލައި ވިސާ ހޯދާށެވެ. މި ޕްލެޓްފޯމް މެދުވެރިކޮށް ވިސާއަށް އެދޭއިރު، ދަތުރުކުރާ ބޭނުމާއި، ހުންނާނެ ތަނާއި، އަދި އެނބުރި އަންނާނެ ޓިކެޓު ފަދަ މައުލޫމާތުތައް ފުރިހަމައަށް ހުށަހަޅަން ޖެހޭނެއެވެ. އެހެންކަމުން، ކުރިއަށް އޮތް ތަނުގައި ތައިލެންޑަށް ދަތުރުކުރަން ރާވާ ފަރާތްތަކުން، ދަތުރުގެ މުއްދަތަށް ބަލައި، ބޭނުންވާ ވިސާގެ ކަންކަން ދުރާލައި ހަމަޖެއްސުމަކީ ވަރަށް މުހިންމު ކަމެކެވެ. ތައިލެންޑުގެ ސަރުކާރުން މި ބަދަލުތައް ގެންނަނީ އެ ގައުމުގެ ރޯޔަލް ގެޒެޓުގައި ޝާއިއުކުރުމަށްފަހުގައެވެ. ގެޒެޓުގައި ޝާއިއުކުރާތާ 15 ދުވަހުގެ ތެރޭގައި އާ އުސޫލަށް އަމަލުކުރަން ފަށާނެއެވެ.