އީރާނާ ދެކޮޅަށް ކުރަމުންދާ ހަނގުރާމައިގެ ހަމަލާދިނުމުގެ މަރުހަލާ ނިމިއްޖެ ކަމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ރޭ ވިދާޅުވެއްޖެ އެވެ.
ރޫބިއޯ ވިދާޅުވީ، އީރާނާ ދެކޮޅަށް އެމެރިކާއިން ކުރިއަށްގެންދިޔަ އަސްކަރީ ހަމަލާދިނުމުގެ އޮޕަރޭޝަންތައް މިހާރު ނިމުމަކަށް އައިސްފައިވާ ކަމަށެވެ. ނަމަވެސް، ހޮރްމުޒް ކަނޑުއޮޅީގައި އީރާނުން އާ ހަމަލާތަކެއް ދީފި ނަމަ، އޭގެ ރައްދުގައި "ފަނާކުރަނިވި" ހަމަލާތަކެއް ދޭނެކަމުގެ އިންޒާރު އޭނާ ދެއްވި އެވެ.
ރޫބިއޯ މިހެން ވިދާޅުވީ، ނާޒުކު ހަނގުރާމަ މެދުކަނޑާލުމުގެ އެއްބަސްވުމެއް އޮތް ނަމަވެސް، އެ މުހިންމު ސަރަހައްދުގައި ނުތަނަވަސްކަން ދެމިއޮތް ދަނޑިވަޅެއްގަ އެވެ. އެމެރިކާގެ އަސްކަރީ އޮފިޝަލުން ވިދާޅުވި ގޮތުގައި، ބޭނުންވެއްޖެ ހިނދެއްގައި އަލުން ހަމަލާތައް ފެށުމަށް ފައުޖުތައް އޮތީ ތައްޔާރަށެވެ.
ޖެނެރަލް ޑޭން ކޭން ވިދާޅުވީ، އަމުރެއް ލިބިއްޖެ ނަމަ ބޮޑެތި އަސްކަރީ އޮޕަރޭޝަންތައް އަލުން ފެށުމަށް އެމެރިކާގެ ސެންޓްރަލް ކޮމާންޑް އޮތީ ތައްޔާރަށް ކަމަށެވެ. އަދި އެމެރިކާއިން މިވަގުތު ކެތްތެރިކަން އިސްކުރުމަކީ ހަމަލާދިނުމުގެ އަޒުމެއް ނެތުން ކަމަށް އެއްވެސް ދުޝްމަނަކު ހީކޮށްގެން ނުވާނެ ކަމަށް ވެސް އޭނާ ވިދާޅުވި އެވެ.
ރައީސް ޑޮނަލްޑް ޓްރަމްޕް ވަނީ އިތުރު މީހުން މަރުވުމަށް ބޭނުންފުޅުނުވާ ކަމަށް ވިދާޅުވެ، އެއްބަސްވުމަކަށް އައުމަށް އީރާނަށް ބާރުއަޅުއްވާފަ އެވެ. ޓްރަމްޕް ވަނީ މި ހަނގުރާމައަކީ "ކުޑަ ކުރިމަތިލުމެއް"ގެ ގޮތުގައި ސިފަކުރައްވައި އީރާނަށް ކާމިޔާބު ހޯދުމުގެ އެއްވެސް ފުރުސަތެއް ނެތް ކަމަށް ވިދާޅުވެފަ އެވެ.
އީރާނުގެ މަޖިލީހުގެ ރައީސް މުހައްމަދު ބާގިރު ގާލިބާފް ވަނީ އެ ސަރަހައްދުގައި އޮތް އެމެރިކާގެ ނުރައްކާތެރި ނުފޫޒު ކުޑަވެގެންދާނެ ކަމަށް ވިދާޅުވެ ރައްދު ދެއްވާފަ އެވެ. މީގެ އިތުރުން، ހޮރްމުޒް ކަނޑުއޮޅީގައި ކަނޑައަޅާފައިވާ މަގުތަކުން ބޭރުވާ އުޅަނދުފަހަރަށް ހަރުކަށި ރައްދެއް ދޭނެ ކަމުގެ އިންޒާރު އީރާނުގެ ރިވޮލިއުޝަނަރީ ގާޑްސްއިން ވެސް ވަނީ ދީފަ އެވެ.
ޔޫއޭއީން ބުނި ގޮތުގައި، ވިދިވިދިގެން ދެވަނަ ދުވަހު ވެސް އީރާނުން ފޮނުވާލި މިސައިލްތަކާއި ޑްރޯންތަކެއް ވަނީ ހުއްޓުވާފަ އެވެ. ނަމަވެސް އީރާނުން މިފަދަ އެއްވެސް ހަމަލާއެއް ދީފައިވާ ކަމަށް އިންކާރު ކުރެ އެވެ.
ނުތަނަވަސްކަން ހުރި ނަމަވެސް، އެމެރިކާގެ ކަނޑުގެ ސިފައިންގެ ހިމާޔަތާއެކު މާސްކް ކުންފުނީގެ އުޅަނދުތައް ހިމެނޭހެން ބައެއް ވިޔަފާރި އުޅަނދުފަހަރުގެ ދަތުރުތައް މިހާރު ވަނީ އަލުން ފަށާފަ އެވެ.
ޔޫރަޕިއަން ޔޫނިއަން (އީޔޫ)ގެ ވެރިން ކަމަށްވާ އުރުސުލާ ފޮން ޑާ ލޭޔަން އާއި ޖަރުމަނުގެ ޗާންސެލަރު ފްރެޑްރިކް މާޒް، ފްރާންސްގެ ރައީސް އިމަނުއެލް މެކްރޮން އަދި އިނގިރޭސި ބޮޑުވަޒީރު ކިއަރު ސްޓާމާ ވަނީ ޑިޕްލޮމެޓިކް މަޝްވަރާތައް އަލުން ފެށުމަށް ގޮވާލައްވާފަ އެވެ. އެ ބޭފުޅުން އިންޒާރު ދެއްވި ގޮތުގައި، ގަލްފް ސަރަހައްދުގެ ދަތުރުފަތުރަށް ބުރޫއެރުން މިގޮތަށް ކުރިއަށްދާ ނަމަ، މުޅި ދުނިޔޭގެ އިގްތިސާދަށް އޭގެ ނޭދެވޭ އަސަރު ކުރާނެ އެވެ.